Aisaya 36 - Uwumbɔr aagbaŋ

Asiria aabɔrkpaan aah faan Jerusalem yaab pu na

¹ Libiln kipiik ni linanar li ponn ni Hesekia nan ye Juda aabɔrkpaan na, le Asiria aabɔrkpaan Senakerib nan ti tak Juda aatim mu bi maa ŋigon kiir mu aan mu kpa tijawan na, ki nyaŋ mu.

² Baah nyaŋ mu kina na, le u tun waatɔb aajab aaninkpel ke u nya Lakis, ki di bijab bi wiir na buen Jerusalem aatiŋ ni, ki ti bui ubɔrkpaan Hesekia ke u kii tii ke uma Senakerib nyaŋ u a. Bijab aaninkpel ngbaan nan gaa nsan mu bikpaluub tun baatuln na, nin chee nnyunsan mu joo nnyun nyan ni kibɔɔk ki bi paacham na ni na.

³ Juda aanib bitaa nan ton bi nsan ni. Binib bitaa ngbaan le nan ye Hilkia aajapɔɔn Eliakim u ye ŋibɔrdichal aaninkpel na, ni Sebna u nan ye nnaan aabɔr mɔmɔk aaninkpel na, ni Asaf aajapɔɔn Joab u mu ŋmee nnaan aabɔr na.

⁴ Asiria aajab aaninkpel ngbaan nan bui binib bitaa ngbaan, ke baabɔrkpaan ban u bee tiwan ni cha ubɔrkpaan Hesekia mak sakpen kina na.

⁵ U baa bi ke, “Ni dak ke bumɔb aaliin ga ŋmaa nyaŋ tijar aalan ni mpɔɔn aa? Ni dak ke ŋma ga ter nimi aan ni sil kiir Asiria yaab?

⁶ Ni ka dak ke Ijipt yaab le ga ter nimi, tɔ, kina mu ga li naahn unii u di likal di ŋa waajaangbeek na la, li ga koo le ki saa uŋaal. Ijipt aabɔrkpaan bi kina le ki tii umɔk mak u pu na.”

⁷ Asiria aajab aaninkpel ngbaan ki len ke, “Bee ni ga bui ke ni lik Nidindaan Uwumbɔr na pu la? Uwumbɔr uchachaan ngbaan aawaachur, ni kitork aabimbin le Hesekia nan ber, ki bui Jerusalem ni Juda aanib ke bi mɔmɔk li chaa ti dooni Uwumbɔr, kitork aabimbiln libaa baanja chee.

⁸ Asiria aabɔrkpaan aayimbil pu le m ga cha ti kpokl nkpokl mubaa. Ni yaa kpa bijab ŋichur ŋilee kan, m ga ŋmaa tii nimi itaan kina.

⁹ Naa fuu Asiria aaja u kaa kpa tininkpir na, le ni ka dak ke Ijipt yaab ga tii ni nimi itaan aatɔroku mam ni bijab bi jak itaan ki jaa kijaak na.

¹⁰ Ni dak ke m di mbaa aapɔɔn le ki nan tak nimi aatiŋ ki kuln ki, kaa ye Uwumbɔr aaterm aa? Uwumbɔr ubaa le bui mi ke m nan tak ki, ki kuln ki.”

¹¹ Le Eliakim, ni Sebna, ni Joab bui bijab aaninkpel ngbaan ke, “Li len ti chee Aram yaab aaliin ni. Ti ŋun i. Taa len ti chee timi Israel yaab aaliin; binib bi mɔmɔk ka ligoln pu na bi pel la.”

¹² Le u gar bi ke, “Ni dak ke nimi ni nimi aabɔrkpaan ngbaan baanja pu le Asiria aabɔrkpaan tun ni mi ke m nan len tibɔr tee ee? Aayii, m bi len binib bi mɔmɔk ka ligoln pu na mu chee la, bi ga ŋmɔ bibaa aabin ki nyu bibaa aanyeen, ke ni mu aah ga ŋmɔ ki nyu pu na.”

¹³ Le bijab aaninkpel ngbaan fii sil paacham ki teen mpɔɔn pu Israel yaab aaliin ni ke, “Li pel man Asiria aabɔrkpaan aah bi tuk nimi pu na.

¹⁴ U sur nimi ke ni taa cha Hesekia ŋmann nimi. Hesekia aan ŋmaa gaa nimi lii.

¹⁵ Taa cha u ŋmann nimi ke ni li lik Uwumbɔr pu. Taa ka dak man ke Uwumbɔr ga gaa nimi lii aan ki kiir Asiria aajab, bi taa ŋmaa nyaŋ nimi aatisakpeŋ ngbaan.

¹⁶ Taa pel man Hesekia aah len pu na. Asiria aabɔrkpaan bui ke ni nya ni kitisakpeŋ ngbaan ni aan ki kii ke u nyaŋ nimi. U ga cha ni mɔmɔk ŋmɔ ŋisubil nimi aasar ni, ki ŋmɔ nimi aakakan, ki nyu nimi aanyunbun ni aanyun

¹⁷ ki ti saa n‑yoonn mu Asiria aabɔrkpaan ga ki gir kaan nimi litingbaln li bi ke nimi yaan na, nin chee ndaan aasui aasar bi, ni ga kan ndaan nyu na, ni nin chee ŋikalmaan bi, ni ga kan tijikaar ji na.

¹⁸ Taa cha Hesekia ŋmann nimi aan ni ka dak ke Uwumbɔr ga gaa nimi lii. Litimbol libaa aawaa ŋman ki gaa ŋaatim Asiria aabɔrkpaan chee ee?

¹⁹ Ŋi bi la chee dandana? Hamaf ni Apad yaab aawaa bi la? Sefafaim yaab aawaa bi la? Ubaa ŋmaa gaa Samaria yaab lii ii?

²⁰ Bayoonn ŋitingban ŋimina aawaa ŋman ki gaa ŋi Asiria aabɔrkpaan chee? Kina pu na, ba cha ni dak ke Uwumbɔr ga ŋmaa gaa Jerusalem ma lii?”

²¹ Tɔ, binib ngbaan nan ŋmin suuna, kaa gar, ke baabɔrkpaan Hesekia aah bui ke bi taa gar pu na; baa waar bimɔi.

²² Le Eliakim, ni Sebna, ni Joa daa kar baawanpeenkaan mpombiin pu, ki buen baabɔr Hesekia chee, ki ti bui u Asiria aajab aaninkpel ngbaan aah len pu na.