Aisaya 30 - Uwumbɔr aagbaŋ

Kimɔbaan ki kaa kpa tinyoor na

¹ Uwumbɔr len ke, “Binib bi joo Juda aatiŋ na aamɔfal junn a; ba pu? bi yii maamɔb. Bi dii isan i maa mɔk bi na; le bi ni biken kpaani kimɔbaan ki maa tuk bi ke bi kpaan na, le ki moo joo titunwanbir kpae titunwanbir pu.

² Bi chaa Ijipt aatiŋ ni ti ban nterm kaa puen baa mi waahr. Bi ban ke Ijipt yaab li kii bi, kina pu na, bi di naadii tii Ijipt aabɔrkpaan.

³ Ubɔrkpaan ngbaan mu aan ŋmaa ter bi, le Ijipt yaab aaterm ngbaan ga ti doo tibɔbir ni la.

⁴ Hali baah nyan Juda aaninkpiib bi ke bi ti li bi Ijipt aatisakpem Soann ni Hanes ni na kpaan fuu nima;

⁵ Juda aanib mu ga nan wii nwiin pu ke bi di bibaa tii Ijipt aatimbol li kaan ŋmaa ter bi na; buyoonn bi ban nterm na kan, litimbol ngbaan aan ŋmaa ter bi.”

⁶ Uwumbɔr aah len tiwakor ti bi nteersakpiin ngbaan ni na aabɔr ti na sɔ: “Juda aaninkpiib ngbaan chuun isan i kpa tibɔbir na pu, ni nin chee ichinn koo na, ni nin chee iwaa i bir na bi na, ni nin chee tipeewanbir ti fii paacham na koo na. Bi di ipiin i kpa kidaak na buu baabon, ni laakumii mam pu, bi ti tii litimbol li kaan ŋmaa tii bi nterm mubaa na.

⁷ Ijipt aaterm aa kpa tinyoor. Kina pu le m naan Ijipt aatiŋ liyimbinaankee ke, ‘Kipeewanbiik ki kaa ŋmaa ŋa nibaa na.’”

Binib bi kaa kii Uwumbɔr aamɔb na

⁸ Uwumbɔr bui mi ke m ŋmee ŋa kigbaŋ ponn ni binib ngbaan aah bi pu na, aan ni li dɔ, kaan li kpa ndoon, baatunwanbir aah bi pu na.

⁹ N‑yoonn mɔmɔk baa keei Uwumbɔr aah tuk bi pu na, ki geei inyamɔn n‑yoonn mɔmɔk, kaa pel Uwumbɔr aah mɔk bi pu na.

¹⁰ Bi tuk Uwumbɔr aabɔnabr ke bi ŋmin. Bi len le ke, “Taa bui man timi mbimbin mu ŋan na aabɔr. Bui man timi taah ban ti ŋun pu na. Cha ti li joo timi aajoon.

¹¹ Siir cha timi nsan man. Taa ban ti ŋun Israel yaab Aawumbɔr u bi chain na aabɔr.”

¹² Tɔ, Israel yaab Aawumbɔr u bi chain na aah len pu na sɔ: “Nitafal aa bi maah tuk nimi pu na ni, le ki tee kii tii inyamɔn ni kijaak ma.

¹³ Ni jin libɔkpol a. Ni naahn ligoln li fɔk ki taa nween ki ti saa kitiŋ na la, libuul lee ni le ni ga lir.

¹⁴ Ni wii yak yak ke tiyakr aabuul na la, ni wii yak yak sakpen le kisanjaŋ aan ki li bi, bi di moo mmii, bee bi di kab nnyun nkin ponn ni.”

¹⁵ Israel yaab Aadindaan Uwumbɔr u bi chain na le len waanib chee ke, “Gir ni man ki nan kii tii mi suuna, le ni ga kan mpɔɔn ni ŋŋmarm.” Le ni yii kaa ŋa kina.

¹⁶ Ni tee fenn le ke ni san ŋmar nimi aadim chee, itaan i ŋmaa san na pu. Ni ye mbamɔn la, ni san ŋmar baanja le ni ga ŋa. Ni dak ke nimi aataan ŋmaa san mala la, le binib bi san dii nimi na aataan ŋmaa san mala sakpen ki ti nyaŋ nimi aataan.

¹⁷ Nimi aajab lichur yaa kan nimi aadim aaja ubaa kan, bi ga san, le nimi aadim ngbaan aajab biŋmu ga ŋmaa cha nimi aajab mɔmɔk san. Nibaa aan gur nimi aajab ni, see nimi aatuutaa u ni di ŋum ligongoln paab na baanja.

¹⁸ Nee mɔmɔk pu na, Uwumbɔr beenin si kii ke u san nimi kinimbaak. Waah tun ni ŋan na pu na, u gor ke u san nimi kinimbaak. Binib bi di bibaa tii Uwumbɔr na kpa mpopiin.

Uwumbɔr ga ŋa tinyoor ŋa waanib pu

¹⁹ Nimi binib bi koo Jerusalem ponn ni na aan ki wii iwiil. Uwumbɔr san nimi kinimbaak, le ni yaa wii ki yin u ki ban nterm kan, u ga kii nimi aayim.

²⁰ Uwumbɔr ga cha ni kan limukl; le uma ubaa ga li bi nima ki mɔk nimi waasan, kaan ki bɔr.

²¹ Ni yaa yenn nsan ki fenn buen ŋŋangii wɔb, bee ŋŋangan wɔb kan, ni ga ŋun waaneel nipuwɔb len ke, “Nsan le na. Dii mu man.”

²² Ni ga yoor naah di tikunabr naan nimi aawaa ŋi na, ni naah di salmaa naan ŋi na, ki di ti mee ke ŋi ye tijɔŋ la, ki tar ke, “Taa ki ban ti kan nimi.”

²³ N‑yoonn mumɔk ni bun nimi aajikaabim na kan, Uwumbɔr ga cha utaal nu, aan mu muun ki ŋa mbamɔm, le nimi aawakor mu ga kan timoor pam ki ŋmɔ.

²⁴ Nimi aanaaja ni ibon i ko nimi aasar na mu ga kan timoor ti ŋan na ki ŋmɔ.

²⁵ Nwiin mundaal ni ti nyaŋ nimi aadim, ki gaa baadifɔfɔŋ, ki ku baanib na, ibun ga puu nnyun ŋijoo, ni ŋigongon mɔmɔk pu.

²⁶ Uŋmal ga li wiin ke nwiin na, le nwiin ga moo woln ki jer mu aah ti wiin pu na, ki naahn ke iwiin ilole le aah di kpaan ki wiin nwiin mubaa daal na. N‑yoonn mu Uwumbɔr ga poo waanib aabuun i u tii bi aan i yann na, le nimina mɔmɔk ga ŋa.

Uwumbɔr ga daa Asiria yaab aatafal

²⁷ Uwumbɔr aapɔɔn ni waapak ga nya ni paacham. Waaŋuul ye mmii ni iŋmanyuu la. U yaa len tibɔr kan, ti seer ke mmii na la.

²⁸ U yaa chuun kan, libuln lolni u pu nsan ke nwam mu yoor tiwan mɔmɔk na la. Li ŋar ŋitimbol mɔmɔk ŋŋaan ki kuln ŋi, ŋaatunwanbir pu.

²⁹ Le nimi Uwumbɔr aanib ga li kpa mpopiin ki gaa ilahn ke naah ŋani pu kinyeek ki ni ji Uwumbɔr aajim mubaa na. Ni ga li kpa mpopiin ke binib bi waa kulufeeŋ aawaal ki cha Uwumbɔr u ye Israel yaab aakikiir na Aadichal ni na.

³⁰ Uwumbɔr ga cha unii mɔmɔk ŋun waaneel mu kpa mpɔɔn na pu, ki ŋun waaŋuul mu pu; le imiigaal, ni ŋitaayiyir, ni ŋitaatakpal, ni utaasakpiin ga li bi.

³¹ Asiria yaab yaa ŋun Uwumbɔr aaneel mu kpa mpɔɔn na pu, ki ŋun waatafadaan aah bir pu na pu kan, ijawaan ga chuu bi.

³² Uwumbɔr yaa faa bi ki ki gir faa bi kan, waanib ga li waa liwaal ki dii ŋigangan ni tibar aah gbaa pu na. Uwumbɔr ubaa le ga jan Asiria yaab kijaak.

³³ N‑yoonn mu jer na, bi nan puen toor libuul li ponn ni bi ga nan di Asiria aabɔrkpaan ngbaan see mmiisakpiin ni na. Li nyoo le ki waa, le bi pii idɔ ti gbiin li; le Uwumbɔr ga fuur mmiigaal mu ti gaa u ni idɔ ngbaan li ponn ni.