Aisaya 29 - Uwumbɔr aagbaŋ

Tibɔbir ti ga dan Jerusalem pu na

¹ Uwumbɔr aatork aabimbiln, li ye Jerusalem na, kuln a. Kitisakpeŋ ki ubɔr David nan koo ki ponn ni na kuln a. Cha libiln libaa bee ŋilee jer, ŋi ni ŋaajim, ni mu aawanpɔɔn aajim,

² le Uwumbɔr ga di tibɔbir lii kitisakpeŋ ki bi yin ki ke “Uwumbɔr aatork aabimbiln” na pu. Ikpowiil ni iwiil ga li bi ki ponn ni, le kitisakpeŋ ngbaan mɔmɔk ga li gbii nsin ke kitork aabimbiln paab na.

³ Uwumbɔr ga mann gob kitisakpeŋ ngbaan, ki tak ki.

⁴ Jerusalem ga li naahn utekpiir aawiin mu bi kitiŋ taab, ki pɔɔni mubaa ke muneel nyan ni titan ni na la.

⁵ Jerusalem aatiŋ, biwɔwɔm bi tak si na ga buen ke libuln aah daar titan joo cha pu na, le baajab bi kpa ijawaan na ga buen mala ke kimook aah dii libuln pu na.

⁶ Libuul ngbaan ni, le Uwumbɔr Mpɔɔnsakpiindaan ga gaa nimi lii. U ga cha utaal gben, le kitiŋ mu ga deŋ. U ga cha kibuŋ ki pɔɔ na ni imii dan;

⁷ n‑yoonn ngbaan le ŋitimbol ngbaan aajab bi bi tak kitisakpeŋ ki ye Uwumbɔr aatork aabimbiln ngbaan na aajawan ga lir ke naah ye tidaŋ le na, ki naahn ke unii aah dɔ geen kinyeek ki dak ilandak pu na.

⁸ Ŋitimbol ŋi mɔmɔk kuun tɔb chee ke ŋi ti tak Jerusalem na ga li naahn uja u nkon ban mu ku u, u dɔ daŋni tidaŋ ke u bi ji tijikaar ki finn kaa jin nibaa na; ki ki naahn uja u nnyunyuu joo u, u dɔ daŋni tidaŋ ke u bi nyu nnyun ki finn ki kan ke nnyunyuu beenin joo u na.

Nsurm mu bi yii mu na

⁹ Li ye bijɔrb man. Li ye bijoom man. Li ye bidagbiib bi kaa nyun ndaan na man. Li chuun gbeer ke naah nyun ndaan le na.

¹⁰ Uwumbɔr le cha ni doon ki geen kaan finn mala. Nimi Uwumbɔr aabɔnabr le ba ye binib aanimbil, le Uwumbɔr ŋum ninimbil.

¹¹ Tibɔkpiirkaan mɔmɔk ga li bɔr ni chee la; ni ga li naahn kigbaŋ ki bi kpab ki na la. Aa yaa di ki tii unii u nyi tigbann na, ki bui u ke u karn ki tii si kan, u ga bui ke waa ŋmaa, ke ki kpab la.

¹² Aa yaa di ki tii unii u kaa nyi tigbann na ke u karn ki tii si kan, u ga bui si ke waa nyi tigbann.

¹³ Uwumbɔr bui ke, “Binib bimina bui ke bi dooni mi la, le baadoon aa kpa tataa, bisui bi nibaa wɔb la. Bi joo biyaajatiib aakaal i bi di ŋa bisui ni ki ŋmaa teer i n‑yoonn mɔmɔk na la, ke ni ye Uwumbɔr aakaal la.

¹⁴ Le m yaa cha tibɔbir tibaa jer kan, tiken ki fuu ni, le ni gar bi. Binib bi kpa nlan na ga kpaln bijɔrb, le baalan ngbaan ga bee fam.”

N‑yoonn mu choo na aamakl

¹⁵ Binib bi joo baalandak bɔrni Uwumbɔr na aamɔfal junn a. Bi bɔrni le ki ŋani baatunwanbir ki dak ke ubaa aan kan bi, ubaa mu aan li nyi baah ŋani pu na.

¹⁶ Bi labr tiwan mɔmɔk chiŋni la. Nilani ye tiwankpaan, uyakmaal aan tiyakr? Tiwan ni unii naan ni na aan ŋmaa bui udaan ke, “Sin le aa naan mi,” ni mu aan ŋmaa bui u ke, “Saa nyi saah bi ŋani pu na.”

¹⁷ Liyataŋakl libaa bi ke, naan yunn le kichook kpaln baah ko nin chee na, le baah ko nin chee na ga ki kpaln kichook.

¹⁸ Nwiin ngbaan daal yaa nan fuu ni kan, bitafakpaab ga ŋun baah karni kigbaŋ kibaa pu na, le bijoom bi nan bi mbɔmbɔɔn ni na ga likr binimbil ki li waa.

¹⁹ Bigiim, ni binib bi sunn bibaa taab na ga ki kan mpopiin mu Israel yaab Aadindaan Uwumbɔr u bi chain na tii bi na.

²⁰ Binib bi muk biken ki lik seen Uwumbɔr na aamɔfal ga doo. U ga kuln titunwanbirdam mɔmɔk aamɔfal.

²¹ Binib bi bii biken ki biini titunwanbirdam aatun pu kaa dar bitafal, ki mu geei inyamɔn aan bibamɔndam aa kani baabamɔn na, Uwumbɔr ga kuln bi.

²² Kina pu na, Israel yaab Aadindaan Uwumbɔr u nan nyan Abraham tibɔr ni na len ke, “Maanib, naan ki ji inimɔɔn; ninimbil wɔb aan ki li kpa inimɔɔn.

²³ Ni yaa nan kan mbim mu m ga tii nimi na kan, le ni ga tii naadii ke m sil ye nimi Israel yaab Aawumbɔr u bi chain na. Ni ga pak mi ki san mi ijawaan.

²⁴ Bijɔrb ga bae nlan ki bee baah ga dii nsan mu na, le binib bi ŋulni n‑yoonn mɔmɔk na ga li gur kpa mpopiin ki gaa nsurm.”