Aisaya 28 - Uwumbɔr aagbaŋ

Uwumbɔr sak Israel yaab

¹ Tibɔbir bi Israel aanaan pu. Kipak ki nnaan ngbaan aaninkpiib nan kpa na bi gbaar lir ke nsupuun mu bi di tuun baabɔryikpupur pu na la; ba pu? bi ye bidagbiib la. Bi di tulalee di gbaa biyil ŋi bi tu ŋi paacham na pu, le ki mu aa ŋmaa buen nibaa chee, bi nyun gbii ki dɔ gbara nima chee.

² Uwumbɔr kpa unii ubaa u kpa mpɔɔn sakpen ki gor ke u ti tak bi na. Udaan ga fuu ni ke kibuŋ ki joo ni ŋitaatakpal na, ni utaasakpiin, ki naahn nwam mu san mala mala ki kpa mpɔɔn na, le ki ga biin kitiŋ ngbaan pu.

³ Bi ga taa taa bininkpiib bi ye bidagbiib ngbaan na aagaak ŋmal titan ni.

⁴ Kipak ki bininkpiib bi ye bidagbiib na nan kpa na bi gbaar ke baah ker ŋikakan ŋi puen puir na mala pu na la.

⁵ Nwiin mubaa choo, le Uwumbɔr Mpɔɔnsakpiindaan aapak ga li naahn ubɔr aayikpupuk ki tuu nsupuun na aah kpa kipak pu na, ki tii waanib bi ŋmar na.

⁶ U ga tii bibɔjirb ibamɔn aalan, ki pɔɔk bikikiib bi kii kitisakpeŋ ngbaan aabisamɔi na aataakpab n‑yoonn mu binib dan bi nan tak bi na.

Uwumbɔr aabɔnabtiib bi ye bidagbiib na

⁷ Hali Uwumbɔr aabɔnabtiib ni Uwumbɔr aatotoorb na nyun ndaan ki chuun yenni. Bi nyun ndaan sakpen, le ki chuun gbeer ki lir. Uwumbɔr aabɔnabtiib ngbaan nyun ndaan ki gbii a; kaa ki beer tibɔkpiirkaan ti Uwumbɔr joo tii ni bi na; le bitotoorb na mu nan nyun ki gbii, kaa ŋmaa toor binib aabɔr ti bi joo ni bi chee na.

⁸ Baah ka nin chee nyu ndaan na ye tiwuln ŋmeen la, nibaa chee aa gur ki ŋan.

⁹ Bi len tibɔr ti kaa ŋan na m pu. Bi len ke, “Ŋma aan uja wee dak ke u mɔk tiwan? Ŋma neen waabɔr ti u nabr na? Ti ŋan tii mbim mu laa lii libiil na la.

¹⁰ U pɔɔni ubaa ke u mɔk timi ŋibɔbil ngbaan aatataa aah ye pu na.”

¹¹ Tɔ, ni yaa kaan pel ni m chee kan, Uwumbɔr ga di biwɔwɔm bi len ŋitimbol yayan aaliin na ki di mɔk liwamɔkl.

¹² U tii ni mɔmɔk lifuur ni mmɔɔn, le ni yii kaa pel u chee.

¹³ Kina pu le Uwumbɔr ga mɔk nimi ŋibɔbil ngbaan mɔmɔk aatataa aah ye pu na. Le ni yaa yoor litaal limɔk na kan, ni ga gbeer. Ni ga kan iween, gaawɔb mam ga chuu nimi, aan bi di nimi ŋa kiyondiik ni.

Sionn aatakpajal

¹⁴ Tɔ, nimi bigaadam bi joo Jerusalem aanib bimina na, li pel man Uwumbɔr aah len pu na.

¹⁵ Ni bui ke nimi ni nkun ŋa tɔb kijɔtiik aan ni ni kitekpiitiŋ kpaan a. Ni dii inyamɔn ki dak ke ŋŋmann pu le ni ga ŋmar, ki tii naadii ke tibɔbir yaa fuu ni kan, ni ga nya ti ni.

¹⁶ Nima pu le Tidindaan Uwumbɔr len ke: “M bi joo nsisii mu pɔɔ ki si chob na le siini Sionn aatiŋ ni. Mu ponn ni, m ga di litakpal li pɔɔ na ki di siin mu aalɔlɔŋ ni. Unii umɔk gaa u ki kii na aan ji inimɔɔn.

¹⁷ Ibamɔn le ga li ye ŋŋmin mu bi ga li joo ŋaŋni nsisii ngbaan na, le mbimbinyaan ga li ye tiwan ni bi joo ŋaŋni mu aanyonyoo na.” Kitaabuŋ ki joo ni ŋitaatakpal na le ga ŋar inyamɔn i ni bui ke ni bi ima le pu na ŋŋaan, le nwam kuln tiwan ni mɔmɔk kii nimi na mɔmɔk.

¹⁸ Nimi ni nkun aah kpaan kimɔbaan ki na ga doo, le nimi ni kitekpiitiŋ aakpaam na mu ga doo. Tibɔbir yaa fuu ni kan, ni ga kuln.

¹⁹ Ni ga yun nimi, ki ki gir yun nimi kichakpiik mɔmɔk ni. Ni ga ji falaa ngbaan nwiin pu ni kinyeek. Tibɔchann timɔk Uwumbɔr ga joo ni na ga li joo ni ijawaan pɔɔn la.

²⁰ Ni ga li naahn uja u nan pɔɔni ubaa ke u doon tiwandookaan ni kaa fɔk na ni, ki joo tiwoor aakekeln li kaa pee na ke u di biin ubaa pu na la.

²¹ Uwumbɔr ga jan ke waah nan jan Perasim aajool pu, ni Gibeonn aafataŋ ni pu na, ke u ŋa waah ban ke u ŋa pu na; waah ga ŋa pu na aatataa ga li pɔɔ ti bee. U ga doo waatuln. U ga doo waatuln li aatataa bɔr na.

²² Taa laa man nsurm mu m joo tii nimi na. Ni yaa laa kan, naah ga ŋa pu aan ki ŋmar na ga moo pɔɔk. Uwumbɔr Mpɔɔnsakpiindaan tuk mi ke u ga kuln litingbaln ngbaan mɔmɔk.

Uwumbɔr aalan

²³ Li pel maah len pu na man; ŋun maah bi tuk nimi tibɔr ti na mbamɔm man.

²⁴ Ukpaal aa beer mpaan ke u ko kisaak ki gor ki kii waah ga bu buyoonn na n‑yoonn mɔmɔk kaa bu.

²⁵ U yaa kee beer mpaan doo kan, u bu ŋibaabil aasubil ni ikonjubɔn aasubil la. U bu imuul ni idi aapɔn, le ki bu njikaabim muken mu waakpaab ngbaan aagbaan.

²⁶ U nyi waah ga ŋa waatuln pu na; ba pu? Uwumbɔr mɔk u a.

²⁷ Waa joo likukul li filk na poi ŋibaabil ni ikonjubɔn aabil, u joo lidabil waatiir le poi.

²⁸ Waa gbaa wiir waamuubim ni waadibim, u nyi waah ga di inaaja aatɔroku poi mu pu, kaan taa wiir njikaabim ngbaan na.

²⁹ Nlan mumina mɔmɔk nyan ni Uwumbɔr Mpɔɔnsakpiindaan chee la. Uwumbɔr aah kpokl ke u tun pu na ye nlan la, le ni tun n‑yoonn mɔmɔk kaa bii.