Aisaya 24 - Uwumbɔr aagbaŋ

Uwumbɔr ga daa dulnyaa yaab aatafal

¹ Uwumbɔr ga kuln kitiŋ kee aan ki gur nkuun. U ga mur fenn kitiŋ kee, ki yaa kaanib.

² Unibɔn mɔmɔk ga ji falaa baan la: Uwumbɔr aatotoorb, ni binib, ni binaagbiib ni baaninkpiib, ni binib bi daa na, ni bi kooh na, ni binib bi pinni tiwan na, ni binib bi kpa ki pinni tii bi kaa kpa na, ni biwankpadam ni bigiim, bi mɔmɔk ga ji falaa baan.

³ Kitiŋ kee ga doon nkuun, kaan ki li kpa nibaa. Uwumbɔr le len, le ni ga ŋa kina.

⁴ Kitiŋ kuur ki yɔl a; dulnyaa mɔmɔk aanib aataakpab yɔl; taab ni paacham bur a.

⁵ Binib ngbaan bii kitiŋ la; bi kool Uwumbɔr aakoobil ki bii tipuur ti u nan puu ke ti li bi ki cha n‑yoonn mu kaa kpa ndoon na.

⁶ Kina pu le Uwumbɔr puun lii kitiŋ pu. Kaanib bi pa baah tun pu na pu la. Bi ponn ni siib le ga gur.

⁷ Ŋisubil ŋi bi joo ŋani ndaan na aasui yɔl a, le ndaan aabɔr pɔɔk. Unii umɔk nan kpa mpopiin na aasui bii dandana,

⁸ le mpopiin aabar ni ŋigangan ŋi nan gbaa na ŋmin.

⁹ Baah nan nyu ndaan ki gaa mpopiin aalahn i na doo a, ubaa aan ki lak ndaan aamɔɔn.

¹⁰ Kitiŋ ponn ni aawan mɔmɔk ŋa yɔl yɔl, le binib laŋni bibaa ŋani baadichal ni ke bi ŋmar.

¹¹ Ndaan aah kaa ki bi na, le binib tar kitiŋ ponn ni. Mpopiin doo kookoo a; mu doo kitiŋ kee pu a.

¹² Kitisakpeŋ ngbaan gur ŋilangben ŋmeen la, le kaabisamɔi aajaaleŋ mam wiir doo a.

¹³ Kina le ga ŋa dulnyaa aatimbol mɔmɔk ni. Ni ga li naahn tijikaar aacheen yoonn la, buyoonn bi gbaa ker olif aakpan aasubil isui pu doo, ki ker ŋisubil ŋi gur na mu doo pu na.

¹⁴ Le binib bi ŋmar na ga gaa ilahn mpopiin pu. Binib bi bi liwilir wɔb na ga len Uwumbɔr aapɔɔn aah bi pu na,

¹⁵ le binib bi bi liwipuul wɔb na ga nyuŋ u. Binib bi bi nnyusakpem aagbaan na ga nyuŋ Uwumbɔr u ye Israel yaab Aadindaan na.

¹⁶ Ti ga ŋun dulnyaa aatingbaan i bi dandar na aanib gaa ilahn ki pak Uwumbɔr u ŋan na. Nee mɔmɔk pu na le m bui ke maa kpa limakl. Nwon kpo doo a. Bibɔmbɔtukb beenin tuk tibɔr, le baabiin moo kpae.

¹⁷ Ni mɔmɔk li pel m chee man, ijawaan bi, ŋibuu bi, le gaawɔb mam mu bi ki kii nimi.

¹⁸ Unii umɔk pɔɔn ubaa ke u nya ijawaan ni na ga lir libuul ni; le umɔk pɔɔn ubaa ke u nya libuul ni na, gaawɔb ga chuu u. Ntaanyusakpem ga nya paacham ki lir ni, le ŋitinyik ga deŋ.

¹⁹ Kitiŋ ga taa iween, ki wii, ki puu.

²⁰ Kitiŋ ga li deŋni ke udagbiir aah chuun gbeer pu na, ki yeŋni ke libool aah yeŋni kitaabuŋ ni pu na. Dulnyaa aatunwanbir nyɔɔn u lii kitiŋ; ki ga lir, kaan ki fii kpala.

²¹ N‑yoonn choo, le Uwumbɔr ga daa ipɔɔn i bi paacham na, ni bibɔrkpaam bi bi taab na aatafal.

²² Uwumbɔr ga kuun bibɔrkpaam ŋa kiyondiik ni ke biyom aah bi mbuu ni pu na. U ga piin bi kiyondiik ni ki ti saa bundaal u ga daa bitafal na.

²³ Uŋmal ga bɔnn, le nwiin aan ki li wiin; ba pu? Uwumbɔr Mpɔɔnsakpiindaan ga ŋa ubɔrkpaan. U ga li ye Jerusalem u bi Sionn aajool pu na aabɔr, le binib ngbaan aaninkpiib ga kan waah nyuun sakpen pu na.