2 Samuel 8 - Uwumbɔr aagbaŋ

David aah nyaŋni butɔb ponn ni pu na

¹ Naah yunn siib na, le David ki buen ti tak Filistia yaab, ki nyaŋ bi, le ki gaa baatisakpeŋ bi chee.

² Le u ki nyaŋ Moab yaab mu. U nan cha waah chur bi tinaagbiir na doon kitiŋ, le u ti nyan binib bitaa ponn ni bilee ki ku bi. Kina pu le Moab yaab gur tun tii u, ki pa lampoo tii u.

³ U nan nyaŋ Siria aatiŋ ki bi yin ki ke Soba na aabɔr Hadadeser u ye Rehob aajapɔɔn na. Hadadeser aah nan cha u ti gaa Yufrates aapaacham aapepel buyoonn na, le u nan ti nyaŋ u.

⁴ U nan chur waajab bi dik itaan pu na ikui kipiik ni ilole la, ki chur bijab bi chuun bitaa pu na mu ŋichur moninko. U nan nyan itaan i ga ŋeer itaan aatɔroku mam nkub na, le ki gaa kpar i gur na aataachur.

⁵ Siria yaab bi bi Damaskus aatiŋ ni na aah nan tun bijab ke bi ti ter Hadadeser na, le David ti tak bi, ki ku baajab ŋichur moninko ni ŋilee,

⁶ le ki kaan kaan bijab baatim ni, le bi kpaln waatutum ki pa lampoo tii u. Uwumbɔr nan tii David linyaŋ, ni kookoo.

⁷ David nan gaa Hadadeser aajab aaninkpiib aah nan joo salmaa aajaak aapen ŋi na, ki di buen Jerusalem aatiŋ ni.

⁸ U nan ki yoor tikumann mu pam, Hadadeser aatim mu bi yin mu ke Beta ni Berotai na ponn ni.

⁹ Hamaf aatiŋ aabɔr u bi yin u ke Toi na nan ŋun ke David nyaŋ Hadadeser aajab mɔmɔk.

¹⁰ Le u tun ujapɔɔn Joram, ke u ti doon ki pak ubɔr David, waah nyaŋ Hadadeser, u ni uma Toi faa tɔb butɔb sakpen na pu. Joram nan joo salmaa, ni tikunabr, ni tikumann aapiin ti tii David.

^11-12 Ubɔr David nan di ipiin ngbaan, ni tikunabr, ni salmaa u u nan gaa Edom, ni Moab, ni Amonn, ni Filistia, ni Amalek yaab chee na, ni waah nan gaa Hadadeser chee ni na tii Uwumbɔr.

¹³ David aah nan buen ti ku Edom aajab ŋichur kipiik ni ŋiniin, kifataŋ ki bi yin ki ke N‑yaan Aafataŋ na ni, ki gir ni na, le waayimbil moo nyan paacham.

¹⁴ U nan kaan kaan bijab Edom aatim mɔmɔk ni, le Edom yaab kpaln waatutum. Uwumbɔr nan tii David linyaŋ nimɔk u buen na.

¹⁵ David nan joo Israel aanib mɔmɔk, le ki nan ŋani waanib mɔmɔk mbamɔm.

¹⁶ Joab u aana nan ye Seruya na le nan ye David aajab aaninkpel; le Ahilud aajapɔɔn Jehosafat nan joo kitiŋ ngbaan aagbann;

¹⁷ le Ahitub aajapɔɔn Sadok, ni Abiatar aajapɔɔn Ahimelek nan ye bitotoorb, Seraya nan ye nnaan ngbaan aagbaŋmeer;

¹⁸ le Jehoyada aajapɔɔn Benaya nan ye bijab bi kii David na aaninkpel, le David aajapɔtiib mu nan ye bisusurb.