2 Samuel 13 - Uwumbɔr aagbaŋ

Amnonn aah bii uninkpan Tamar pu na

¹ David aajapɔɔn Absalom nan kpa ninkpan ubaa, le bi yin u ke Tamar. U nan ye usapɔɔn u ŋan pam na la, le kaa kee kpa chal. Amnonn mu nan ye David aajapɔɔn uken la, le u ni Absalom aa nan tee kpaan na, le u nan gee Tamar kibɔtiik.

² Waah nan gee u sakpen pu aan nsan aa nan bi ke u doon u chee na, le ni ŋa u tibunbunn; ba pu? waah kaa nan kee nyi uja na, waa nan kpa nsan ke u ni uja sil tɔb chee.

³ Amnonn mu nan tee kpa jɔlankpar ubaa, le bi yin u ke Jonadab u aate nan ye David aakpel Sama na.

⁴ Le Jonadab nan bui Amnonn ke, “Aate le ye ubɔr, le iwiin mɔmɔk kan, aa bi ke naah kaa mɔ si le na. Ba muk si?” Le Amnonn bui u ke, “Nsui koo nte aabo Absalom aaninkpan Tamar ni sakpen.”

⁵ Le Jonadab bui u ke, “Ŋmann ke saa pɔɔ la, ki ti doon. Aate yaa dan u nan lik si kan, bui u ke, ‘M gaŋ si ke aa cha nninkpan Tamar dan nan li tii mi tijikaar. M ban ke u nan ŋa tijikaar ngbaan do, nin chee m ga li waa u na, aan ki nan di ti tii mi ubaa.’”

⁶ Kina pu le Amnonn ŋmann ke u bun la, le ki koo ti doon. Ubɔr David nan buen u ti lik u, le Amnonn bui u ke, “M gaŋ si ke aa cha Tamar dan ki nan ŋa maab siib do, nin chee m ga li waa u na, aan ki nan di bi tii mi ubaa.”

⁷ Le David tun ti bui Tamar, libɔrchiln ni ke, “Li cha Amnonn do ki ti ŋa tijiir tii u.”

⁸ Le u buen ki ti mui u dɔ kidiik ni. Le u lee n‑yon, ki buun mu, ki ŋa maab nin chee Amnonn waa u na. U nan ken maab ngbaan,

⁹ le ki nyan bi kimaasambik ni ti tii u ke u ŋmɔ; le u yii kaan ŋman. U nan bui u ke, “Cha binib mɔmɔk nya lipaal.” Le bi mɔmɔk nyan.

¹⁰ Le u bui u ke, “Sin aabaa li joo ni maab ngbaan maah dɔ nin chee na, ki nan di tii mi.” Le u yoor maab ngbaan ki di buen u chee.

¹¹ Waah ti bi joo tii u na, le u bib chuu u ki bui ke, “Cha m doon aa chee.”

¹² Le u bui ke, “Aayii. Taa chuu mi mpɔɔn aan m ŋa inimɔɔn aawan nimina. Ni kpa ijawaan.

¹³ M ga ki ŋa kinye ki ŋmaa yaar n‑yil binib ni. Le aa ga jinn aabaa inimɔɔn Israel aanib ni. M gaŋ si, pɔɔk aabaa ki bui ubɔr; m nyi ke aa yaa len kan, u ga di mi tii si.”

¹⁴ Le u yii, kaa ŋun tii u; le waah pɔɔ jer u na, u nyaŋ u ki doon u chee mpɔɔn.

¹⁵ Amnonn aah ŋa kina doo na, le u nann u; u nan gur nan u ki jer waah nan gee u sakpen pu na, le ki bui u ke, “Li chaa nya.”

¹⁶ Le Tamar bui ke, “Aayii, aa yaa jenn nyan mi kina kan, nima le kpa tibɔbir jer saah laa ŋa pu na.”

¹⁷ Le Amnonn aan ŋun tii u, le ki yin ni waatutunn ki nan bui u ke, “Taa ki cha m kan upii wee do. Tur u nyan lipaal ki laŋ kidiik ngbaan.”

¹⁸ Le ututunn ngbaan tur u nyan ki laŋ kidiik ngbaan. Tamar nan pee libɔkul li fɔk aan liŋaal mu fɔk ki ŋan, aan ubɔr aabisatiib bi kaa nyi uja na nan peeni n‑yoonn ngbaan na la.

¹⁹ U nan di nfatan puŋ uyil, le ki dar kar waabɔkul, le ki di uŋaal biin unimbil pu, ki wii cha.

²⁰ Uninja Absalom aah kan u na, le u baa u ke, “Amnonn ti muk si la aa? M gaŋ si, nninkpan, taa cha ni bii aasui sakpen. Aaninja le ye u, kina pu na, taa bui ubaa tibɔr ngbaan.” Kina pu le Tamar nan koo Absalom do, ubaa baanja, mpombiin ni.

²¹ Ubɔr David aah nan ŋun tibɔr ngbaan na, le usui nan fii sakpen.

²² Le Absalom nan nann Amnonn, waah chuu uninkpan Tamar ki doon u chee mpɔɔn pu pu na, kaan ki kpaan len u chee tibɔr.

Absalom teen uninkpan aapɔln

²³ Ŋibin ŋilee aah jer na, le Absalom nan bi chee waapiih aakor nin chee bi yin ni ke Baal Hasor, aan ni bi Efraim aatiŋ chee na, le ki yin ubɔr aajapɔtiib mɔmɔk ke bi dan nima.

²⁴ U nan buen Ubɔr David chee le ki ti bui ke, “Mpɔɔndaan, m ban m chee maapiih aakor la. Aa ni saaninkpiib ga ŋmaa dan nan ji njim ngbaan aa?”

²⁵ Le ubɔr bui ke, “Maabo, taan ŋmaa dan. Ti yaa dan kan, ni ga nan li ye si limukl la.” Absalom aa nan kii, le ubɔr mu aa kii tii u, le ki len tinyoor aaliin ki ŋa u pu.

²⁶ Le Absalom ki baa ke, “Kina kan, aa ga ŋmaa cha nkpel Amnonn dan aa?” Le ubɔr baa u ke, “U dan nan ŋa ba?”

²⁷ Le Absalom beenin gaŋni u, le David ti cha Amnonn ni ujapɔtiib biken mɔmɔk dii Absalom buen. Absalom aah nan ŋa tijikaar ti na nan ŋeer ubɔr aajikaar.

²⁸ Le u sak waatutum ke, “Li lik Amnonn man, le u yaa ti nyun ndaan gbii, aan m tii nimi nsan kan, ni ku u. Ni taa san ijawaan. Ni ga li ye maabɔr la. Ni chuu nibaa ki taa joo beeni.”

²⁹ Le bitutum ngbaan nan dii Absalom aah mɔk bi pu na ki ku Amnonn. David aajapɔtiib bi nan gur na nan diŋ baawakor ti naahn ibon na pu, le ki san.

³⁰ Baah laa bi nsan ni ki choo kun ni na, le binib bui David ke, “Absalom ku aajapɔtiib mɔmɔk a, ubaa aa gur.”

³¹ Le ubɔr fii sil, ki dar kar waawanpeenkaan mpombiin pu, le ki lir kitiŋ. Waatutum bi nan bi u chee nima na mu nan dar kar baawanpeenkaan.

³² Tɔ, David aakpel Sama aajapɔɔn Jonadab le nan bui u ke, “Mpɔɔndaan, baa ku aajapɔtiib mɔmɔk. Amnonn baanja le kpo. Aa ga nan ŋmaa bee ke Absalom nan ŋa nlandak mumina ki nyan n‑yoonn mu Amnonn nan chuu uninkpan Tamar ki doon u chee na la.

³³ Kina pu na, taa kii saah ŋun tibɔr ti ke bi ku aajapɔtiib mɔmɔk na; Amnonn baanja le bi ku.”

³⁴ N‑yoonn mue na Absalom nan san. Libuul ngbaan ni le uja u nan si kii kitiŋ ngbaan liyaadaal ngbaan na kan kinipaak bi Horonaim aasan ni, ki sunn ligongoln choo. Le u buen ti bui ubɔr waah kan pu na.

³⁵ Le Jonadab bui David ke, “Maah ba len pu na aa ye ee? Aajapɔtiib le choo na.”

³⁶ Waah len kina doo buyoonn na, le David aajapɔtiib koo ni, le ki piin ki wii, le David ni waaninkpiib mu nan wii pam.

^37-38 Absalom nan san buen Amihud aajapɔɔn Ubɔr Talmai chee, Gesur aatiŋ ni la, ki ti koo nima ki ti saa ŋibin ŋitaa. David nan wii ujapɔɔn Amnonn pu ni ti yunn pam,

³⁹ le waah nan suln Amnonn aakun pu na, le u nan ki gur neen ujapɔɔn Absalom aakam sakpen.