2 Bibɔrb 17 - Uwumbɔr aagbaŋ

Israel yaab aabɔr Hosea aabɔr

¹ Juda yaab aabɔr Ahas aanaan ni aabin kipiik ni lileler ni, le Ela aajapɔɔn Hosea jin Israel aanaan, le ki nan bi Samaria aatiŋ ni ki joo waanib ki ti saa ŋibin ŋiwae.

² U nan tun Uwumbɔr titunwanbir, u mu aa nan tee pii Israel yaab aabɔrb bi nan puen u kal lijal ngbaan pu na.

³ Asiria aatiŋ aabɔrkpaan Salmaneser nan faa u butɔb; le Hosea nan di ubaa tii u ke u nyaŋ u le ki pa tipar tii u libiln mɔmɔk.

⁴ Tɔ, libiln libaa ni, le Hosea nan tun Ijipt yaab aabɔr So chee, ke u nan ter u, le kaa ki pa libiln libiln aapar tii Asiria aatiŋ aabɔrkpaan. Salmaneser aah ŋun kina na, le u cha bi chuu Hosea ti laŋ kiyondiik ni.

Samaria aatiŋ aah ber pu na

⁵ Salmaneser nan di waajab koo Israel aatiŋ ni, le ki ti gob Samaria aatiŋ. Bi nan bi nima ki ti saa ŋibin ŋitaa,

⁶ nima le nan ye Hosea aanaan aabiwawaer ni, le Siria aatiŋ aabɔrkpaan ti nyaŋ Samaria aatiŋ, le ki chur Israel aanib tinaagbiir buen Asiria aatiŋ ni, le ki ti di bi ponn ni bibaa kaan Hala aatiŋ ni, le ki kaan biken Habor Aamɔɔl chee, Gosann aapepel ni, le ki kaan biken mu Media aatim ni.

⁷ Israel yaab aah nan tun Bidindaan Uwumbɔr titunwanbir na le nan cha Samaria aatiŋ ber. Uwumbɔr nan gaa bi Ijipt yaab aabɔr aaŋaal ni ki nyan ni bi Ijipt aatiŋ ni na, le bi nan dooni ŋiwaa,

⁸ le ki dii Uwumbɔr aah nan jenn nyan binib bi baatiŋ pu buyoonn Israel yaab choo na aakaal, le ki gaa ikaal i Israel aatiŋ aabɔrb nan naan tii bi na.

⁹ Israel aanib nan tun ŋitun ŋi Bidindaan Uwumbɔr aa nan gee na la. Bi nan maa tiwaadir baatim mɔmɔk ni, bi nan maa ti ntiwaatiir ni, le ki maa ti ntikpaam mu ni.

¹⁰ Bi nan siin siin ŋigongon mɔmɔk, ni busub bumɔk kpa mboon na taab ŋiwaabimbin ni liwaapii Asera aanaŋ,

¹¹ le ki seer nnyɔknii ŋiwaabimbin mɔmɔk pu, ki dii binib bi Uwumbɔr nan jenn nyan bi kitiŋ ngbaan pu na aasan. Bi nan di baabiin aatun fiin Uwumbɔr aaŋuul,

¹² le ki yii Uwumbɔr aah nan bui bi ke bi taa li dooni ŋiwaa pu na.

¹³ Uwumbɔr nan tun ni waatuun, ni waabɔnabr ke bi nan sak Israel ni Juda aanib ke: “Di cha man nimi aatunwanbir aasan, ki kii maakaal i bi ikaal i m nan di tii niyaajatiib na, ni maah di i tii ni maatutum bi ye maabɔnabr na.”

¹⁴ Le baan kii tii u; bi nan kpa tafalaaŋun ke biyaajatiib bi kaa nan di naadii tii Bidindaan Uwumbɔr na la.

¹⁵ Bi nan yii kaa kii waamɔkm, baa nan joo tipuur ti u nan puu tii biyaajatiib na, le kaa di waah nan sak bi pu na yin nibaa. Bi nan dooni waafam tiib, le ki mu ŋa fam bibaa, le ki nan dii ŋitimbol ŋi mann goln bi na aakaal ki yiil Uwumbɔr aah bui ke bi taa li ŋani ŋitimbol ngbaan aah ŋani pu na.

¹⁶ Bi nan bii Bidindaan Uwumbɔr aakaal mɔmɔk, le ki naan tikur aanaajabi ilee ki dooni i; bi nan ki naan liwaapii Asera aanaŋ mu, ki dooni iŋmabi, le ki dii liwaal Baal.

¹⁷ Bi nan kɔr bijapɔtiib ni bibisatiib ki joo seer mmii ni tii ŋiwaa; bi nan buu tibɔɔr bibɔɔb, ni bipɔnijoob chee, le ki di bibaa tii tiwan ni kaa ŋan Uwumbɔr chee na pel pel, le ki fiin waaŋuul.

¹⁸ Uwumbɔr aaŋuul nan fii Israel yaab pu, le u nyan bi ubaa chee, ki di cha Juda aanaan baanja.

¹⁹ Tɔ, Juda aanib mu aa nan kpaan kii Bidindaan Uwumbɔr aakaal; bi mu nan gaa Israel aanib aah nan naan ikaal i na la.

²⁰ Le Uwumbɔr nan yii Israel aanib mɔmɔk, ki daa bitafal ki di bi tii baadim bi kpa mbiin sakpen na, le ki ti baan nyan bi ubaa chee.

²¹ Uwumbɔr aah yakr Israel yaab, Juda yaab chee doo na, le Israel yaab di Nebat aajapɔɔn Jeroboam ŋa baabɔr. Jeroboam nan cha bi suln Uwumbɔr bɔr, le ki di bi koon titunwanbir kpaan ni.

²² Bi nan dii Jeroboam le ki tun titunwanbir ti mɔmɔk u tun na,

²³ le Uwumbɔr ti baan nyan bi ubaa chee, ke waatutum bibɔnabr aah sak bi ke u ga ŋa pu na. Kina pu le Asiria aajab nan chur Israel aanib tinaagbiir buen Asiria aatiŋ ki pu bi beenin bi na.

Asiria yaab aah maa kal Israel aatiŋ ni pu na

²⁴ Asiria aatiŋ aabɔrkpaan nan nyan binib Babiloŋ, ni Kuf, ni Ifa, ni Hamaf, ni Sefafaim aatim ni, le ki di bi kaan Samaria aatim ni, waah nan chur Israel aanib bi tinaagbiir nima chee na pu. Bi nan gaa ntim ngbaan le ki koo nima.

²⁵ Baah nan puen kal nima chee na, baa nan dooni Uwumbɔr, kina pu le u nan cha ichinn dan ki nan ku bi ponn ni bibaa.

²⁶ Bi nan bui Asiria aatiŋ aabɔrkpaan ngbaan ke waah di binib bi ti kaan kaan Samaria aatim ni na aa nyi kitiŋ ngbaan Aawumbɔr aakaal, kina pu na, Uwumbɔr ngbaan cha ichinn bi ku bi.

²⁷ Le ubɔrkpaan ngbaan bui ke: “Giin man taah chur bitotoorb bi tinaagbiir na ubaa; cha u gir nima, ki ti li koo nima, aan ki li mɔk binib ngbaan kitiŋ ngbaan Aawumbɔr aakaal.”

²⁸ Kina pu le baah nan jenn Israel yaab aatotoor u Samaria aatiŋ pu na gir ki ti koo Betel aatiŋ ni, le ki bi nima ki mɔk binib ngbaan baah ga li dooni Uwumbɔr pu na.

²⁹ Tɔ, binib bi nan koo Samaria ni na nan beenin naani baawaa, le ki di ŋi ŋa Israel yaab aah nan maa tiwaadir ti na ponn ni. Linibol mɔk nan naan laawaa laah koo ntim mu ni na la:

³⁰ Babiloŋ aanib nan naan baawaal Sukof Benof la; le Kuf aanib naan Negal aawaa; le Hamaf aanib naan Asima aawaa;

³¹ le Ifa aanib naan Nibhas, ni Taatak aawaa; le Sefafaim aanib kɔr baabim ki seer mmii ni tii baawaa Adramelek, ni Anamelek.

³² Binib bimina nan dooni Uwumbɔr mu, le ki nyan bibaa ni aanib mɔk aabɔŋ le bi ye baawaa aawaadam ke bi li toor kitork nima tii bi.

³³ Kina pu na, bi nan dooni Uwumbɔr, le ki mu ki dooni baawaa baah nyan ni ntim mu ni na aakaal aah mɔk pu na.

³⁴ Bi beenin joo baakaal le ki nan saa din na. Baa dooni Uwumbɔr, kaa kii tii ikaal, ni mmɔkm mu u nan di tii Jakob aayaabitiib na. Jakob le Uwumbɔr nan ki yin ke Israel na.

³⁵ Uwumbɔr nan puu tipuur tii Israel yaab, le ki bui bi ke: “Taa ki dooni ŋiwaa man; ni taa gbaan ŋinimbiin ni, ki taa dii ŋi, ki taa toor kitork tii ŋi.

³⁶ Ni li kii min u di mpɔɔn ni liyabr nyan ni nimi Ijipt aatiŋ ni na aamɔb; ni li gbaani nnimbiin ni, ki toor kitork tii mi.

³⁷ Ni li joo ikaal ni mmɔkm mu m ŋmee tii nimi na. Ni taa ki kii tii ŋiwaa,

³⁸ ki taa suln maah puu tipuur ti tii nimi na bɔr.

³⁹ Ni kii min Nidindaan Uwumbɔr aamɔb, le m ga gaa nimi, nimi aadim chee lii.”

⁴⁰ Le binib ngbaan aa nan kpa ŋuntii, le ki yii ki beenin dii baabimbikpok aasan.

⁴¹ Kina pu na, binib ngbaan nan dooni Uwumbɔr le ki mu ki dooni baawaa; le biyaabitiib beenin ŋani kina ki nan saa din.