2 Bibɔrb 11 - Uwumbɔr aagbaŋ

Juda aatiŋ aapiibɔr Atalia aabɔr

¹ Ubɔr Ahasia aana Atalia aah kpaan ŋun ujapɔɔn aakun pu na, le u siin ke bi ku libɔrdichal ni aanib mɔmɔk.

² Ubɔr Ahasia aajapɔɔn Joas baanja le nan san ŋmar. Bi nan ban bi ku u ni biken la, le upuul Jehoseba gaa u lii. Jehoseba aate le nan ye Ubɔr Jehoram, le ute aabo ye Ubɔr Ahasia. Jehoseba nan di Joas ni waabiyoor koon Uwumbɔr Aadichal ni aadijɔk kibaa ni, le ki di u bɔr ke Atalia taa kan u ki ku u.

³ Jehoseba nan cha ubo ngbaan ni waabiyoor bɔr Uwumbɔr Aadichal ni, le u kpiini u ki ti saa ŋibin ŋiloob, le Atalia nan ye upiibɔr ki joo kitiŋ.

⁴ Tɔ, libilolole ponn ni, le utotoor Jehoyada nan tun yin ni libɔrdichal aakikiib aaninkpiib, ni libɔrchiln ni aakikiib le ki nan tuk bi ke bi dan Uwumbɔr Aadichal ponn ni, le ki ti cha bi kii ki puu ke bi ga ŋa waah dak pu na. U nan di Ubɔr Ahasia aajapɔɔn Joas mɔk bi,

⁵ le ki bui bi ke: “Ni yaa bi lituln ni Likpaakool daal kan, ni yakr nfum mutaa, aan liker libaa li kii libɔrdichal;

⁶ liken mu li kii mbisamɔb mu bi yin mu ke Sur Aabisamɔb na, le kookoo aaker na mu li si kii mbisamɔb mu bi bikikiib biken na aapuwɔb na.

⁷ Ŋiker ŋilee ŋi fii lituln ni Likpaakool daal na ga li si kii Uwumbɔr Aadichal ki kii ubɔr Joas.

⁸ Ni ga fuur nimi aajaak aajum le ki li si kii Ubɔr Joas, ki li dii u waah cha nimɔk na. Unii umɔk ŋɔŋ ni pu na, ni ku u.”

⁹ Bininkpiib ngbaan nan kii Jehoyada aah tuk bi pu na, le ki joo ni baajab u chee, bi nan joo ni binib bi fii lituln pu Likpaakool daal na, ni bi bi lituln pu na.

¹⁰ U nan di David aakpaatunn ni kijaak aapen ŋi nan bi Uwumbɔr Aadichal ni na tii bininkpiib ngbaan,

¹¹ le ki di bijab bi fuur baajaak aajum ki joo na siin goln Uwumbɔr Aadichal aabisamɔb ke bi li kii ubɔr.

¹² Le Jehoyada di Joas nyan ni, le ki di kibɔryikpupuk chiŋ u, le ki di nnaan aakaal i joo nnaan na ŋum u. Le bi nan di nkpan kpir uyil pu ki kaan u nnaan. Binib nan kpaar biŋaal le ki teen ke: “Limɔfafɔfɔŋ li bi ubɔr chee.”

¹³ Upiibɔr Atalia nan ŋun bikikiib ni binib aafuuk ngbaan pu, le ki san mala ki buen Uwumbɔr Aadichal ni, nin chee kinipaak nan kuun na.

¹⁴ Nima chee le u ti kan ubɔrpɔɔn ngbaan si Uwumbɔr Aadichal aajaatɔlk chee, nkaal aah mɔk ke bi ŋa ubɔr pu na. Butɔb aajab aaninkpiib ni binib bi pii kakaan tiib na le nan si gob u, le binib ngbaan mɔmɔk kpa mpopiin aafuuk ki pii kakaan tiib. Atalia nan daa kar waawanpeenkaan mpombiin pu, le ki teen mpɔɔn pu ke, “Linibiil, linibiil.”

¹⁵ Jehoyada aa nan ban ke bi ku Atalia, Uwumbɔr Aadichal chee, kina pu le u bui butɔb aajab aaninkpiib ngbaan ke: “Di u bɔ dii bikikiib aakaasisik ni, ki ku unii umɔk ban ke u gaa u lii na.”

¹⁶ Bi nan tɔk u kaakaan la, le ki di u buen libɔrdichal ni, ki ti ku u mbisamɔb mu bi yin mu ke, “Utaan Aabisamɔb” na chee.

Jehoyada aah nan cha binib kpeln pu na

¹⁷ Utotoor Jehoyada nan cha Ubɔr Joas ni binib ngbaan nan puu tipuur tii Uwumbɔr ke bi ga li ye waanib la; u ni ubɔr ni binib ngbaan mu nan ki puu tipuur tii tɔb.

¹⁸ Le binib ngbaan buen liwaal Baal aawaadiik ni, ki ti tur ki lii; bi nan gbaa wii laawaabimbin, ni baah maa ŋiwaa ŋi siin ki ponn ni na, le ki ku Matann, u ye liwaal Baal aawaadaan na, laawaabimbin taab. Jehoyada nan kaan bikikiib Uwumbɔr Aadichal taab,

¹⁹ le u ni bininkpiib, ni ubɔr aakikiib, ni libɔrdichal aakikiib mɔmɔk, ni kitiŋ ngbaan aanib mɔmɔk nan chɔr gɔngɔn le ki cheen ubɔr nyan Uwumbɔr Aadichal ni ki di buen libɔrdichal ni ki ti di u kaan libɔrjal pu.

²⁰ Mmɔɔn le nan ti ban mu ku binib ngbaan mɔmɔk, le kitiŋ ni nan ŋmin chii, ba pu? bi nan ku Atalia libɔrdichal ponn ni.

²¹ Joas nan ye ŋibin ŋilole aanii le ki jin Juda aanaan.