2 Bibɔrb 10 - Uwumbɔr aagbaŋ

Baah ku Ahab aayaabitiib pu na

¹ Ubɔr Ahab aayaabitiib imonko itaa ni kipiik le nan koo Samaria aatiŋ ni. Jehu nan ŋmee kigbaŋ le ki tun ti tii kitiŋ ngbaan aajojoob, ni kaanikpaam, ni Ahab aayaabitiib aah bi binib bi aaŋaal ni na. Kigbaŋ ngbaan nan len ke:

² “Nimi le joo ubɔr aayaabitiib; le itaan aatɔroku tiib, ni itaan, ni tijawan, ni ntim mu kpa mpɔɔn aan bi maa ŋigon gob mu na, bi niŋaal ni. Kina pu na, n‑yoonn mu ni kan kigbaŋ kimina na,

³ ni nyan ubɔr aayaabitiib ngbaan ponn ni u ŋeer nnaan na ki di u kaan nnaan, ki jan u pu.”

⁴ Ijawaan sakpiin nan chuu Samaria aatiŋ aajojoob. Le bi bui ke, “Ubɔr Joram ni Ubɔr Ahasia aa nan ŋmaa kpak Jehu, tima ga ŋa kinye aan ki ti kpak u?”

⁵ Kina pu le libɔrdichal ni aaninkpel, ni kitiŋ ngbaan aaninkpel, ki di kpee kaanikpaam, ni ubɔr aayaabitiib aajojoob di inaŋ imina tun Jehu chee: “Ti ye saatutum la, le ki ga ŋa saah bui timi ke ti ŋa pu na mɔmɔk. Tɔ, taan ŋmaa di ubaa kaan nnaan, ŋa saah dak aasui ni pu na.”

⁶ Le Jehu ki gir ŋmee bi kigbaŋ kiken ke: “Ni yaa si nchaŋ ni, ki ga ŋa maah siin pu na kan, fen kinakokoona, ni fe li joo ni Ubɔr Ahab aayaabitiib aayil nan tii mi Jesreel aatiŋ ni.” Ubɔr Ahab aayaabitiib imonko itaa ni kipiik ngbaan nan bi Samaria aatiŋ aanikpaam aaŋaal ni le bi lik bi.

⁷ Jehu aagbaŋ ngbaan aah pii bi na, le Samaria aatiŋ aasalolm ngbaan ku Ahab aayaabitiib imonko itaa ni kipiik ngbaan mɔmɔk, ki di baayil ŋa tibɔɔkur ni, ki di ti tii Jehu, Jesreel aatiŋ ni.

⁸ Baah tuk Jehu ke bi joo ni Ahab aayaabitiib ngbaan aayil na, u nan bui ke bi yakr ŋi ŋikpuk ŋilee pu, ki di bil kitiŋ ngbaan aabisamɔb chee ki ti woln kitaak.

⁹ Naah woln kichakpiik ni na, le u buen mbisamɔb ngbaan chee le ki ti bui binib bi si nima chee na ke, “Min le nan kpokl Ubɔr Joram pu ki ku u; naa ye nimi aataani. Tɔ, ŋma ku bimina mɔmɔk?

¹⁰ Nimina le mɔk ke Uwumbɔr aah nan len Ahab aayaabitiib aabɔr pu na mɔmɔk ga gbiin. Uwumbɔr ŋa waah nan cha waabɔnabr Elaija puu pu na.”

¹¹ Le Jehu ku Ahab aado yaab bi mɔmɔk koo Jesreel aatiŋ ni na mu, ki ku waaninkpiib mɔmɔk, ni ujɔtiibamɔm, ni waatotoorb; ubaa kina aa nan gur.

Baah ku Ubɔr Ahasia aado yaab pu na

¹² Jehu nan nyan Jesreel aatiŋ ni le ki cha Samaria aatiŋ ni. Waah cha ki ti fuu nin chee bi yin nima chee ke, “Bipihkpaab Aakookoo yaan” na,

¹³ le u ton Juda yaab aabɔr Ahasia u kaa ki bi na aado yaab bibaa, le ki baa bi ke, “Ni ye ŋma mam?” Le bi gar u ke, “Ti ye Ahasia aado yaab la. Ti cha Jesreel ke ti ti doon Ubɔrpii Jesebel aabim, ni libɔrchiln ni aanib biken la.”

¹⁴ Le Jehu bui waajab ke, “Di niŋaal chur bi man.” Le bi chur bi mpɔɔn, le u ku bi libugeln libaa chee nima. Bi nan ti kpaan binib imonko ilee ni bilee la, le bi ponn ni ubaa kina aa nan ŋmar.

Baah ku Ahab aado yaab bi mɔmɔk gur na pu na

¹⁵ Jehu nan ki di kal nsan pu, le Rekab aajapɔɔn Jonadab ti ton u nsan ni. Jehu nan doon u le ki bui u ke, “M ni sin aalandak kpaan la. Aa ga ter mi ii?” Le Jonadab kii ke, “M ga ter si.” Le Jehu bui u ke, “Kina kan, tii mi ŋŋaal.” Bi nan tii tɔb iŋaal, le Jehu ter u aan u koo u chee waataan aatɔroku ni,

¹⁶ ki bui u ke, “Dii mi ki ti kan maah di mbaa tii Uwumbɔr kookoo pu na.” Le bi nan kpaan dii ti fuu Samaria aatiŋ ni.

¹⁷ Baah ti fuu nima chee na, Jehu nan ku Ahab aado yaab mɔmɔk, kaa cha ubaa ŋmar. Uwumbɔr nan bui Elaija ke kina le ga ŋa.

Baah ku binib bi dooni liwaal Baal na pu na

¹⁸ Jehu nan kuun Samaria aanib nan kpaan le ki bui bi ke, “Ubɔr Ahab nan dii liwaal Baal siib, m ma ga dii li sakpen.

¹⁹ Kuun ni man liwaal Baal aabɔnabtiib mɔmɔk, ni binib bi dooni li na mɔmɔk, ni laatotoorb mɔmɔk. Ubaa taa gur; m ban m ti toor kitork sakpeŋ le tii liwaal Baal, le umɔk yii kaa dan na, bi ga ku u.” Jehu nan pen bi nlan kina le ke u di ku binib bi mɔmɔk dooni liwaal Baal na.

²⁰ Tɔ, le Jehu bui ke, “Siin man nwiin mu ti ga di doon, ki nyuŋ liwaal Baal na.” Bi nan moon mmoon mumina,

²¹ le Jehu cha lilambil buen Israel aatiŋ mɔmɔk pu. Binib bi mɔmɔk dooni liwaal Baal na nan dan, ubaa aa nan yii kaa dan. Bi mɔmɔk nan koo Baal aawaadiik ni, ki gbiin ki maa maa.

²² Le Jehu bui utotoor u joo baatork aabɔkul na ke u nyan ni ŋi nan tii binib bi mɔmɔk dooni li na.

²³ Nee aapuwɔb le Jehu ni Rekab aajapɔɔn Jonadab dii koo kiwaadiik ngbaan ni, le u tuk binib bi bi nima na ke, “Cha binib bi dooni liwaal Baal na baanja li bi do, ki taa cha binib bi dooni Uwumbɔr na ubaa koo ni.”

²⁴ Le u ni Jonadab koo ke bi ti toor kitork ki see mmii ni tii liwaal Baal. U nan ban bijab imonko inaa siin lipaal le ki bui bi ke: “Ni ku binib bimina mɔmɔk, unii u cha ubaa ŋmar na ga di ubaa aamɔfal le pa.”

²⁵ Jehu aah toor kitork ngbaan doo na, libuul ngbaan ni le u bui bikikiib na, ni bininkpiib ke, “Koo man ki ti ku bi mɔmɔk; ni taa cha ubaa ŋmar.” Bi nan fuur baajaak aajum ki di koo, ki ti ku bi mɔmɔk, le ki fuul bi nyan ni lipaal, le ki koo ponn ni aawaadiik ni,

²⁶ ki ti yoor ni baah di jaatɔlk u siin nima na, ki nan see u mmii.

²⁷ Kina le bi nan kuln liwaal aajaatɔlk ngbaan, ni kiwaadiik ngbaan, le ki di kiwaadiik ngbaan ŋa kibiniidiik, le ki beenin ye kibiniidiik ki nan saa din wee.

²⁸ Jehu aah nan kuln liwaal Baal aadoon Israel aatiŋ pu pu na le na.

²⁹ Tɔ, u nan tee dii Ubɔr Jeroboam, u nan di Israel aanib koon titunwanbir ponn ni ke bi li dooni salmaa aanaaja naankee ilee i bi nan di siin Betel, ni Dann aatim ni na.

³⁰ Uwumbɔr nan bui Jehu ke, “Aa ŋa Ahab aayaabitiib tiwan ni mɔmɔk m ban ke aa ŋa na. Kina pu na, m puu ke aayaabitiib aayaabisɔsɔk ga li ye Israel aatiŋ aabɔrb.”

³¹ Tɔ, Jehu aa nan di usui mɔmɔk kii Israel yaab Aadindaan Uwumbɔr aakaal; u nan labr dii Jeroboam u nan di Israel yaab koon titunwanbir ni na aasan la.

Jehu aakun aabɔr

³² N‑yoonn ngbaan le Uwumbɔr piin ki bi bar Israel aapepel aawiwiir. Siria aatiŋ aabɔr Hasael nan gaa Israel aapepel

³³ li bi Jɔɔdann Aamɔɔl aawipuul wɔb na, ki di dii ŋŋangii wɔb ki ti saa Aroer aatiŋ ki bi Anonn Aamɔɔl chee na. Ŋipepel ŋimina nan bi nima wɔb la: Gilead ni Basann aapepel, nin chee Gad ni Rubenn aanibol, ni Manase aanibol li bi liwipuul wɔb na nan koo na.

³⁴ Jehu aah nan ki tun ŋitun ŋi mɔmɔk na, ki kpee waajakaan pu, mɔmɔk bi Israel Aabɔrb Aatun Aagbaŋ ni la.

³⁵ U nan kpo le bi di u sub Samaria aatiŋ ni, le ujapɔɔn Jehoahas nab waanaan pu.

³⁶ Jehu nan bi Samaria aatiŋ ni ki ye Israel yaab aabɔr ki ti saa ŋibin moninko ni ŋiniin la.