2 Bibɔrb Aabɔr 34 - Uwumbɔr aagbaŋ

Juda Aabɔr Josia aabɔr

¹ Josia nan ye ŋibin ŋiniin aanii le ki jin Juda aanaan, ki koo Jerusalem aatiŋ ponn ni ki joo waanib ki ti saa ŋibin piitaa ni libaa.

² U nan ŋa tiwan ni piir Uwumbɔr aasui na; u nan dii uyaaja Ubɔr David aah nan dii nsan mu na, ki joo Uwumbɔr aakaal kin kin.

Josia aah nyan sil ŋiwaa aadoon pu pu na

³ Josia aah nan jin nnaan ki ti saa ŋibin ŋiniin, aan ki laa beenin ye unachipɔnbo na, le u piin ki dooni uyaaja Ubɔr David Aawumbɔr. Ki nyan n‑yoonn ngbaan ki ti saa ŋibin ŋinaa aapuwɔb, le u piin ki ber tiwaadir, ni liwaapii Asera aanaŋ, ni ŋiwaa ŋi mɔmɔk gur na.

⁴ U nan cha waajab gbaa wɔi Baal aawaa aatork aabimbin, ki gbaa ber ŋibimbin ŋi pu bi nan seer nnyɔknii na. Bi nan nan liwaapii Asera aanaŋ ni ŋiwaa ŋiken le ni ti kpaln ntayon, le bi di ntayon ngbaan yaa yaa binib bi nan toor ŋi na aakaakul pu.

⁵ U nan see biwaadam bi nan dooni ŋi ngbaan na aakpab ŋiwaa aatork aabimbin ngbaan pu. U nan ŋa kina le ki ki toor nyan Juda ni Jerusalem aajɔŋ mɔmɔk chain.

⁶ U nan ŋa tiwanbaan ngbaan Manase, ni Efraim, ni Simeonn aatim, ni ŋilangben mɔmɔk ni, ki di kina ti nyan dandar ŋŋangan wɔb, Naftali aapepel ni.

⁷ Ŋŋangan wɔb aanaan aapepel mɔmɔk ni u nan gbaa wɔi ŋiwaa aatork aabimbin, ni Asera aanaŋ, le ki nan ŋiwaa ŋi ti kpaln ntayon ki gbaa wiil nnyɔknii aabimbin mɔmɔk le ki nin gir kun Jerusalem aatiŋ ni.

Baah nan kan Nkaal Aagbaŋ pu na

⁸ Waanaanjil aabin kipiik ni ŋiniin ponn ni, Ubɔr Josia aah nan toor nyan kitiŋ, ni Uwumbɔr Aadichal ŋiwaa aadoon aajɔŋ pu doo na, le u tun bijab bitaa ke bi ti toor Tidindaan Uwumbɔr Aameen Aadichal. Bijab ngbaan le nan ye: Safann u aate nan ye Asalia na, ni Jerusalem aatiŋ aayidaan Maaseya, ni Joahas aajapɔɔn Joa, u nan ye kitiŋ aaninkpekpaan ubaa na.

⁹ Liifai yaab bi ye Uwumbɔr Aadichal ni aakikiib na aah nan gaa ŋimombil ŋi na, bi nan di ŋi tii Utotoorninkpel Hilkia. Bi nan gaa ŋi Efraim ni Manase aanib, ni Israel yaab aanaan ni aanib biken na, ni Juda, ni Benjaminn, ni Jerusalem aanib chee la.

¹⁰ Bi nan di ŋimombil ngbaan di tii bijab bitaa bi aatuln ye ke bi toor Uwumbɔr Aadichal na la,

¹¹ le bi mu di ŋi tii bikpikpiib ni bidimaab ke bi di daa ŋitakpal ni ŋikpan ŋi bi ga di maa Uwumbɔr Aadichal aadir ti Juda aabɔrb nan cha ti bii na.

¹² Bijab bi nan tun lituln ngbaan na nan ye binib la. Liifai yaab binaa bimina le nan lik baah tun pu na. Bima le nan ye Jahaf, ni Obadia, bi nan ye Merari aataŋaal ni aanib na, ni Sekaria ni Mesulam bi mu nan ye Kohaf aataŋaal ni aanib na. Liifai yaab nan ki ye binib bi nyi lilahngaal na la.

¹³ Liifai yaab biken le lik binib bi joo ni tidimaawan na, ki ki lik binib bi tun ŋitun ŋiken aabɔŋ na pu, le biken mu ŋmee ŋitun ni tibɔr aabɔŋ bilni, bee ki tun bikikiib aatuln.

¹⁴ Baah bi yoor ŋimombil baah joo tiwan siini kidiik ki ponn ni na, le Hilkia kan kigbaŋ ki ponn ni Uwumbɔr aakaal bi na. I nan ye ikaal i Uwumbɔr nan di tii Moses na la.

¹⁵ Hilkia nan bui Safann ke, “M kan Ikaal aagbaŋ, Uwumbɔr Aadichal ni do.” U nan di kigbaŋ ngbaan tii Safann,

¹⁶ le Safann di ki ti tii ubɔr. U nan bui ke, “Ti tun saah bui timi ke ti tun lituln li na mɔmɔk.

¹⁷ Ti yoor ŋimombil ŋi nan dɔ Uwumbɔr Aadichal ni na ki di ŋi ŋum bitutum ngbaan ni binib bi lik bi pu na;”

¹⁸ le ki ki len ke, “Hilkia le di kigbaŋ kimina tii mi,” le ki karn ki tii ubɔr.

¹⁹ Ubɔr aah ŋun kigbaŋ ngbaan aah len pu na, le u daa kar waawanpeenkaan ijawaan ni itaakpayɔl pu,

²⁰ le ki bui Hilkia, ni Safann aajapɔɔn Ahikam, ni Mikaya aajapɔɔn Abdonn, ni libɔrchiln ni aagbaŋmeer Safann, ni ubɔr aatutunn Asaya ke,

²¹ “Li cha man ki ti baa Uwumbɔr, min ni binib bi gur Israel ni Juda aatim ni na pu. Baa ki bee man kigbaŋ kimina aamɔkm aah ye pu na. Tiyaajatiib aah yii Uwumbɔr aamɔboln, kaa ŋa kigbaŋ kimina aah bui ke bi ŋa pu na, u gee ti pu liŋuul a.”

²² Ubɔr aamɔboln ngbaan pu le Hilkia ni biken nan buen upii u bi yin u ke Hulda na chee bi ti baa lik. U nan ye Uwumbɔr aabɔnabpii le ki koo baah laa maa Jerusalem ponn ni ŋidichapɔɔn lipepel li na ni. Uchal le nan ye Tikfa aajapɔɔn Salum. Salum aayaaja le nan ye Harhas. Uchal ngbaan le nan ye Uwumbɔr Aadichal ponn ni aawanpeenkaan aaninkpel. Bi nan ŋeer tuk upii ngbaan tiwan ni ŋa na,

²³ le u tuk bi ke bi gir ti di Uwumbɔr aabɔr timina tuk ubɔr ke,

²⁴ “M ga di tibɔbir ti ŋmee kigbaŋ ki bi karn tii ubɔr na ni le di daa Jerusalem ni kaanib mɔmɔk aatafal.

²⁵ Bi yii mi le ki dooni ŋiwaa, li ki di baah tun pu na mɔmɔk fiin maaŋuul. Maaŋuul fii Jerusalem aanib pu, kaan sɔŋ.

²⁶ Min, Israel yaab Aawumbɔr aah kpa pu ki joo cha ubɔr wɔb na sɔ: Aa pel tibɔr ti bi kigbaŋ ngbaan ni na,

²⁷ le aa kpeln saabimbin ki sunn aabaa taab nnimbiin ni, ki daa kar saawanpeenkaan ki wii buyoonn aa ŋun maah nyan sil ke m daa Jerusalem aatiŋ, ni kaanib aatafal pu na. M ŋun saameel,

²⁸ le maan ki cha ntafadaan mu ba choo Jerusalem aatiŋ pu na dan see saakun aapuwɔb. M ga cha aa kpo nsuudoon ni la.” Bijab ngbaan nan di tibɔr ngbaan nan tuk Ubɔr Josia.

Josia puu tipuur ke u ga kii Uwumbɔr aamɔb

²⁹ Ubɔr Josia nan kuun Juda ni Jerusalem aasalolm mɔmɔk,

³⁰ le bi mɔmɔk kpaan dii buen Uwumbɔr Aadichal ni, le bitotoorb ni Liifai yaab ki di kpee binib bi mɔmɔk gur ki ye biwankpadam ni bigiim na mɔmɔk dii buen. Bi mɔmɔk aanimbil ni nima, le ubɔr karn tipuur aagbaŋ ki bi kan ki Uwumbɔr Aadichal ni na mɔmɔk, mpɔɔn pu.

³¹ U nan si gbɔk nnaan aajaatɔlk na, le ki puu tipuur tii Uwumbɔr ke u ga di usui mɔmɔk kii waamɔb, ki li joo waakaal ni waamɔkm, ki ŋa tipuur ngbaan aah ban pu aan ni ŋmee dɔ kigbaŋ ngbaan ni na.

³² U nan cha Benjaminn aanib ni binib bi mɔmɔk nan bi Jerusalem ponn ni na puu ke bi ga li joo tipuur ti bi puu tii biyaajatiib Aawumbɔr na aah ban ke bi ŋa pu na.

³³ Ubɔr Josia nan gbaa ber ŋiwaa ŋi sukr ponn ni na, Israel yaab aapepel mɔmɔk ni, le n‑yoonn mumɔk u nan bi limɔfal ni na, u nan cha binib ngbaan dii biyaajatiib Aadindaan Uwumbɔr.