2 Bibɔrb Aabɔr 2 - Uwumbɔr aagbaŋ

Baah gor ke bi maa Uwumbɔr Aadichal pu na

¹ Ubɔr Solomonn nan ŋa nlandak ke u maa Uwumbɔr Aadichal li ponn ni bi ga li dooni Uwumbɔr na, ni uma ubaa aabɔrdichal.

² U nan cha bijab ŋichur imonko itaa ni kipiik le nan chuun ban tiwan ni u ga di maa ŋidichal ngbaan na, le bijab ŋichur imonko inaa bi kpii ŋitakpal. Bijab ŋichur ŋitaa ni ikui iloob le nan lik bitutum ngbaan.

³ Solomonn nan tun Taya aatiŋ aabɔr Hiram chee ki len ke: “M ban ke aa kooh m pu tiwan ke saah nan kooh santina aadɔ tii nte Ubɔr David, buyoonn u nan bi maa waabɔrdichal na.

⁴ M bi maa Uwumbɔr Aadichal ke m nyuŋ Ndindaan Uwumbɔr la. Li ga li ye lidichal li bi chain, aan m ni maanib ga li seer tulalee aayon mu nu mɔ na tii u, ki dooni u na la. Nima chee le ti ga li joo boroboro u ye chain na tii u ipiin n‑yoonn mɔmɔk. Nima chee le ti ga li toor kitork ki joo seer mmii ni, kichakpiik ni, ni kijook mɔmɔk, ki kpee Likpaakool daal, ni Uŋmapɔɔn Aajim Aatork, ni iwinyaan iken na aatork, ki nyuŋni Tidindaan Uwumbɔr. U bui ke Israel yaab li ŋani kina n‑yoonn mɔmɔk.

⁵ Timi Aawumbɔr aah jer ŋiwaa mɔmɔk na, m ŋa nlandak ke m maa Uwumbɔr Aadichakpaan la.

⁶ Tɔ, ubaa mu aan sil ŋmaa maa lidichal tii Uwumbɔr, ba pu? paacham aah wiir sakpen pu na aa kpa mpaan ki tii u. Kina pu na, maah ban m maa Uwumbɔr Aadichal li na ga li ye nin chee ti ga li seer tulalee aayon tii Uwumbɔr na baanja la.

⁷ Cha unii u nyi ki ga ŋmaa naan tiwan ŋa salmaa, ni tikunabr, ni tikumann, ni tikur pu na, ki ŋmaa luu ŋitambɔn, ni ŋitanyaan, ni ŋitaman aakeken na dan. U ni nte David aah nan nyan biwanŋab bi Juda ni Jerusalem ponn ni na le ga nan kpaan tun lituln.

⁸ M nyi ke saakpikpiib nyi lituln pam, kina pu na, tii ni mi santina, ni lisalaasiil, ni santina uken na aadɔ i bi Lebanonn ni na.

⁹ M ga cha maajab dan ki nan ter saajab aan bi toor idɔ i wiir na, ba pu? maah ban m maa Uwumbɔr Aadichal li na ga li wiir ki ŋan sakpen.

¹⁰ M ga tii ni njikaabim bɔtɔ ŋichur imonko iniin, ni ŋisubil aadaan kpalba ŋichur ikui inaa, ni olif aakpan mu kpalba ŋichur ikui inaa.”

¹¹ Ubɔr Hiram nan ŋmee kigbaŋ ki gar Solomonn ke, “Uwumbɔr aah gee waanib na, le u di si ŋa baabɔr.

¹² Li pak Israel yaab Aadindaan Uwumbɔr man, u naan paacham ni taab na. U tii Ubɔr David ubolandaan u kpa ŋuntii, ki nyi tiwan sakpen, ki ŋa nlandak ke u maa lidichal tii Uwumbɔr, ki maa ubaa aabɔrdichal mu na.

¹³ M ga cha ulandaan u nyi tiwan sakpen ki ye uwanŋakpaan aan bi yin u ke Huram na dan.

¹⁴ Una nan ye Dann aanibol ni aanii ubaa la, le ute nyan ni Taya aatiŋ ni. U nyi waah ga di salmaa, ni tikunabr, ni tikumann, ni tikur, ni ŋitakpal, ni idɔ tun lituln pu na. U nyi waah ga ŋmaa di ŋitambɔn, ni ŋitanyaan, ni ŋitaman ŋa likekeln pu na. U ŋmaa naani tiwan mɔmɔk aabɔŋ tikur mɔmɔk aabɔŋ pu, ki ga ŋmaa dii unii aah mɔk u ke u naan tiwan pu na, ki naan ni kina. Cha u ni saawanŋab ni binib bi tun tii aate, Ubɔr David na, kpaan tun lituln.

¹⁵ Tɔ, di njikaabim ni ndaan, ni olif aakpan ni aa bui ke aa ga tii ni na tii ni timi.

¹⁶ Lebanonn aajoo ponn ni le ti ga gaa saah ban santina aadɔ i na mɔmɔk, ki buu i tam tɔb lipapaln, le ki di deen ni nnyusakpem ni ki nan saa Jopa aatiŋ mɔk. Aa ga ŋmaa nyan i nima ki di buen Jerusalem.”

Baah piin Uwumbɔr Aadichal aamaam pu na

¹⁷ Ubɔr Solomonn nan kahn biwɔwɔm bi mɔmɔk nan koo Israel aatiŋ pu na. Binib aakahm ngbaan nan bi ke ute David aah nan kahn pu na la. Biwɔwɔm bi mɔmɔk nan maa ka Israel aatiŋ pu na nan ye bijab ŋichur nkub ni piiŋmu ni ŋitaa, ni bijab ikui iloob la.

¹⁸ U nan nyan bi ponn ni bijab ŋichur imonko itaa ni kipiik ke bi li chuun tui ni lidichal ngbaan aawan, ni bijab ŋichur imonko inaa ke bi kpii ŋitakpal ŋijoo ni, le ki di bijab ŋichur ŋitaa ni ikui iloob ŋa bininkpiib bi lik baatuln na.