2 Bibɔrb Aabɔr 1 - Uwumbɔr aagbaŋ

Ubɔr Solomonn aah mee Uwumbɔr ke u tii u nlan pu na

¹ Ubɔr David aajapɔɔn Solomonn nan ye Israel aanaan aabɔrkpaan la, le Udindaan Uwumbɔr nan ŋa tinyoor ŋa u pu ki tii u mpɔɔn sakpen.

² Ubɔr Solomonn nan di limɔboln tii butɔb aajab aaninkpiib bi lik bijab lichur lichur pu na, ni bi lik bijab nkub nkub pu na, ni Israel aaninkpiib mɔmɔk, ni bidichadam mɔmɔk, ni Israel aanib bi gur na mɔmɔk,

³ ke bi mɔmɔk dii u buen Gibeonn aatiŋ ni ki ti doon Uwumbɔr. Tiwan ni cha bi nan buen nima chee na le ye ke Uwumbɔr aatutunn Moses aah nan ŋa Uwumbɔr Aabool li nteersakpiin ni na nan bi nima chee la.

⁴ Tɔ, Uwumbɔr Aakaal Aadakaa ma nan bi Jerusalem ponn ni, libool li ni Ubɔr David nan ti yoor ni Dakaa ngbaan Kiriaf Jearim ki nan di siin na ponn ni.

⁵ Hur aayaabil Besalel, u aate nan ye Uri na aah nan ŋa tikumann aatork aabimbiln li na mu nan bi Gibeonn aatiŋ ni, Uwumbɔr Aabool chee. Ubɔr Solomonn ni binib ngbaan mɔmɔk nan doon Uwumbɔr nima chee la.

⁶ Libool ngbaan aabisamɔb chee le ubɔr nan toor kitork ki doon Uwumbɔr. U nan cha bi kɔr tiwakor lichur le ki di see mmii ni, kitork aabimbiln ngbaan paab.

⁷ Liyaadaal ngbaan aanyeek le Uwumbɔr nan koo Solomonn pu ki baa u ke, “Aa gee ke m tii si ba?”

⁸ Le Solomonn gar u ke, “Aa nan gee nte David n‑yoonn mɔmɔk la, le ki cha m jin waanaan.

⁹ Ndindaan Uwumbɔr, cha saah nan puu tipuur ti tii nte na gbiin. Aa di mi ŋa binib bi wiir ki ti nyaŋ na aabɔr la.

¹⁰ Kina pu na, tii mi nlan mu m ga ŋmaa di joo bi na. Ni yaa kaa ye kina kan, m ga ŋa kinye aan ki joo saanisakpem bimina?”

¹¹ Uwumbɔr nan gar Solomonn ke, “Aa lee tiwan ni ŋan na la. Aa yii, kaa mee ke m tii si liwangol, bee nkam, bee liyimbil, bee m ku saadim tii si, bee m tii si limɔfafɔfɔŋ, le ki tee ban nlan mu aa ga ŋmaa di joo maanib, bi pu m di si ŋa ubɔr na.

¹² M ga tii si nlan ni ichiin; ki ki kpee na, m ga ki tii si liwangosakpeln, ni nkam, ni liyimbil ki jer ubɔr umɔk puen si jin nnaan na, ni bi kaa kee jin na.”

Ubɔr Solomonn aapɔɔn ni waawangol

¹³ Ubɔr Solomonn nan nyan Gibeonn aatiŋ ni, Uwumbɔr Aabool li chee u ti doon Uwumbɔr na ki gir kun Jerusalem ni. Nima chee le u ti kal ki joo Israel aanib.

¹⁴ U nan kpa itaan aatɔroku tiib lichur ni ikui inaa, ni kijaak aataan ŋichur kipiik ni ŋilee. Ibaa nan bi Jerusalem ponn ni, le ki cha iken mu bi ntim muken ponn ni.

¹⁵ Waayoonn, tikunabr ni salmaa nan wiir Jerusalem aatiŋ ni ke ŋitakpal na la, le santina mu aadɔ wiir ke sufam bu si Juda aataataab aagongon ni na.

¹⁶ Waaninkpiib le nan lik itaan i nyan ni Musri, ni Silisia aatim ni na,

¹⁷ ni itaan aatɔroku tiib bi nyan ni Ijipt aatiŋ ni na aatuln. Bima le nan kooh itaan ni itaan aatɔroku tiib tii Hef yaab ni Siria yaab aabɔrb. Bi nan kooh itaan aatɔroku ubaa tikunabr aamombil ikui iloob la, le ki kooh utaan ubaa mɔk tikunabr aamombil nkub ni piiŋmu.