1 Samuel 7 - Uwumbɔr aagbaŋ

¹ Le Kiriaf Jearim aajab buen ti yoor Uwumbɔr Aakaal Aadakaa ki di buen uja ubaa u bi yin u ke Abinadab na aadichal, ligongoln paab, ki nan nyan ujapɔɔn u bi yin u ke Eleasar na ke u li lik dakaa ngbaan.

Samuel aah joo Israel yaab pu na

² Uwumbɔr Aakaal Aadakaa nan yunn Kiriaf Jearim aatiŋ ni pam, u nan pii nima ŋibin moninko. N‑yoonn mue na, Israel yaab mɔmɔk nan wii ki ban nterm Uwumbɔr chee la.

³ Le Samuel bui Israel aanib ke, “Ni yaa ban ke ni fenn ki gir ni Uwumbɔr chee kan, see ni nyan ŋiwaa, ni liwaapii Astaate aanaŋ ŋi bi nikaasisik ni na, ki di nibaa tii Uwumbɔr kookoo, ki li dooni uma baanja, le u ga gaa nimi Filistia yaab aapɔɔn chee lii.”

⁴ Kina pu le Israel yaab nyan ŋiwaa Baal ni Astaate mae, le ki dooni Uwumbɔr baanja.

⁵ Le Samuel tun yin Israel yaab mɔmɔk ke bi ti kuun Mispa aatiŋ ni, le ki len ke, “M ga ti mee Uwumbɔr tii nimi, nima chee.”

⁶ Kina pu le bi mɔmɔk kuun Mispa ni. Bi nan ban nnyun le ki kpir tii Uwumbɔr, le ki lul bumɔb liyaadaal, nwiin ti lir. Bi nan len ke, “Ti tun Uwumbɔr titunwanbir.” Mispa ni, nima chee, le Samuel nan toor Israel yaab bi nan kpa tɔb tibɔr na aakaasisik ni.

⁷ Filistia yaab aah ŋun ke Israel yaab kuun Mispa ponn ni na, le Filistia aabɔrb biŋmu na, ni baajab, fii buen ke bi ti tak bi. Israel yaab nan ŋun bi pu, le ijawaan chuu bi,

⁸ le bi bui Samuel ke, “Li beenin mee Tidindaan Uwumbɔr aan u gaa timi Filistia yaab bee chee lii.”

⁹ Le Samuel kɔr upiih, ki toor kitork, ki di see mmii ponn ni tii Uwumbɔr, le ki mee Uwumbɔr ke u ter Israel yaab, le Uwumbɔr kii waameel ngbaan.

¹⁰ Buyoonn Samuel bi toor kitork ngbaan na, le Filistia yaab dan ke bi nan tak bi. Libuul ngbaan ni, le Uwumbɔr teen paacham ke utaal na, bi pu. Le bilan ŋmal, le ijawaan chuu bi, le bi san.

¹¹ Le Israel aajab nyan Mispa ni, ki di paan Filistia yaab ngbaan pu, ki ti ban bi koo Bef Kar, ki ku bi ki cha.

¹² Samuel nan yoor litakpal ki di ŋum Mispa ni Senn aakaasisik ni, ki bui ke, “Uwumbɔr le ter timi ki nan saa din,” le ki yin li ke, “Nterm Aatakpal.”

¹³ Kina le Uwumbɔr nan nyaŋ Filistia yaab, le kaa ki cha bi koo ni Israel yaab aatiŋ ponn ni n‑yoonn mumɔk Samuel nan bi limɔfal ponn ni na.

¹⁴ Filistia yaab nan giin Israel aatim mu bi Ekronn ni Gaf aatim aakaasisik ni aan bi nan jenn gaa na, tii Israel yaab, kina pu na, Israel yaab nan ki kan baatiŋ mɔmɔk. Le nsuudoon mu dan Israel yaab ni Kanaann yaab aakaasisik ni.

¹⁵ Samuel le nan joo Israel yaab buyoonn u nan bi limɔfal ponn ni na.

¹⁶ Libiln mɔmɔk ni kan, u nan chuun ki manni Betel, ni Gilgal, ni Mispa, ki toor binib bi kpa tɔb tibɔr na aakaasisik ni,

¹⁷ le ki gir buen waatiŋ Rama ponn ni, nin chee u ti ki ye ubɔlen na. U nan maa kitork aabimbiln Rama aatiŋ ni tii Uwumbɔr.