1 Samuel 12 - Uwumbɔr aagbaŋ

Samuel aah di tibɔr ti chɔi Israel yaab na

¹ Le Samuel bui Israel aanib ke, “M ŋa naah bui mi ke m ŋa pu na. M tii nimi ubɔr ke u li ye nimi aajojoor.

² N‑yoonn mue uma le ga li lolni ni pu nsan. M ma kan, n‑yikpir piir, le m por, le njapɔtiib bi ni chee. M nan ye nimi aayidaan tibir ni, ki nan saa din wee.

³ Min le na. M yaa ŋa ubaa tibaa kan, galn mi man dandana wee, Uwumbɔr ni waah lee ubɔr u na aanimbiin ni. M gaa ubaa aanaa bee ubaa aabon aa? M jin ubaa pem pem, bee m muk ubaa aa? M gaa ubaa chee igaŋgaŋlik aa? M yaa ŋa nimina ponn ni nibaa kan, m ga pa maah gaa ni na.”

⁴ Binib ngbaan gar u ke, “Aayii, saa jin timi pem pem, kaa muk timi; saa gaa ubaa chee nibaa.”

⁵ Le Samuel giin kii bi ke, “Uwumbɔr, ni waah lee ubɔr u na le ye seeraadam din wee ke maa kpa taani ubaa.” Le bi kii ke, “Een, Uwumbɔr le ye seeraadaan.”

⁶ Le Samuel ki len ke, “Uwumbɔr le nan lee Moses ni Aaronn, le ki nyan ni niyaajatiib Ijipt aatiŋ ni.

⁷ Tɔ, li si man naah si nin chee na, aan m galn nimi Uwumbɔr aanimbiin ni, ki teer nimi waah tun ŋitun sakpiin ŋi ki gaa nimi ni niyaajatiib lii na pu.

⁸ Jakob ni waadichal aah nan buen Ijipt, aan Ijipt yaab ti muk bi na, niyaajatiib nan wii ki ban nterm Uwumbɔr chee, le u tun ni Moses ni Aaronn, le bi nan nyan bi Ijipt ponn ni, ki nan di bi kaan kitiŋ kee pu.

⁹ Le binib ngbaan suln Bidindaan Uwumbɔr pu, le u mu cha Filistia yaab, ni Moab yaab aabɔr, ni Sisera, u ye Hasor aatiŋ aajab aaninkpel na, ni niyaajatiib jan, le bi nyaŋ niyaajatiib.

¹⁰ Le bi wii ki yin Uwumbɔr ke u ter bi, ki bui ke, ‘Uwumbɔr, ti tun titunwanbir; ti fenn tipuwɔb tii si, ki dooni ŋiwaa ŋi bi yin ŋi ke Baal ni Astaate na. Gaa timi, timi aadim chee lii, aan ti li dooni si.’

¹¹ Le Uwumbɔr nan tun ni Gideonn, le ki ki tun Barak, ki di Jefta paan ni, le ki nan di mi gbiln puwɔb. Ti mɔmɔk gaal nimi, nimi aadim chee lir, le ni bi nsuudoon ni.

¹² Naah nan kan ke Amonn yaab aabɔr Nahas ban u tak nimi na, le ni yii Uwumbɔr ke waa ki ye nimi aabɔr, le ki bui mi ke ni ban ubɔr le u li joo nimi.

¹³ “Tɔ, ubɔr u ni lee u na sɔ do; nimi le ban u, le Uwumbɔr di u tii nimi.

¹⁴ Nimi ni nimi aabɔr yaa nyuŋ Nidindaan Uwumbɔr ki tun tii u, ki ŋun tii u, ki dii waakaal, ki dii u mbamɔn kan, tiwan mɔmɔk ga li ŋan tii ni mɔmɔk.

¹⁵ Ni yaa kaa ŋun tii Uwumbɔr, kaa dii waakaal kan, u ga fenn lir nimi ni nimi aabɔr pu la.

¹⁶ Kina pu na, li si man naah si nin chee na, aan ki kan Uwumbɔr aah ban u ŋa tiwankpaan ni na.

¹⁷ Ni ye lipeel la, naa ye ee? Tɔ, m ga mee Uwumbɔr, le u ga cha utaal nu ki li tar. Nimina yaa ŋa kan, ni ga bee ke ni tun Uwumbɔr titunwanbir ti bir na, ke u tii nimi ubɔr.”

¹⁸ Samuel nan mee limeel, le Uwumbɔr cha utaal nun ki tar liyaadaal ngbaan. Le binib ngbaan mɔmɔk san Uwumbɔr ni Samuel mu ijawaan,

¹⁹ le ki bui Samuel ke, “Timi aaninkpel, ti gaŋ si, mee Aadindaan Uwumbɔr tii timi, aan ti taa kpo. Dandana wee ti bee ke taah ki ban ubɔr pu na le ye titunwanbir, ki kpee timi aatunwanbir tiken mɔmɔk pu.”

²⁰ Le Samuel bui ke, “Taa san ijawaan man. Naah tun titunwanbir sakpenn ti na, taa fenn nipuwɔb tii Uwumbɔr, li joo nisui mɔmɔk tun tii u man.

²¹ Taa chuun dii ŋiwaa man, ŋi ye yɔli la. Ŋiwaa aan ŋmaa ter nimi, kaan ŋmaa gaa nimi lii mu, ba pu? ŋaa fu.

²² Uwumbɔr puu tipuukpaan, kaan suln ni pu. U puu ke nimi le ga li ye waanib.

²³ M ma kan, Uwumbɔr taa cha m tun titunwanbir ke maan ki mee u tii nimi. M ga mɔk nimi nsan mu ŋan ke ni dii mu na.

²⁴ Kii tii Uwumbɔr man, ki di gaakii, ni nisui mɔmɔk tun tii u. Teer man litusakpeln li u tun tii nimi na.

²⁵ Ni mu yaa tee yii ki beenin tun titunwanbir kan, nimi, ni nimi aabɔr mɔmɔk ga kuln.”