1 Bibɔrb 21 - Uwumbɔr aagbaŋ

Nabof aasubil aasaak aabɔr

¹ Uja u bi yin u ke Nabof na nan kpa ŋisubil aasui aasaak kibaa aan ki bi gbɔk Ubɔr Ahab aabɔrdichal, Jesreel aatiŋ ni.

² Daalbaadaal le Ahab nan bui Nabof ke, “Saasubil aasui aasaak aah bi gbɔk maabɔrdichal na, di ki tii mi. M ban m di kitiŋ ngbaan ŋa tikpifar aasaak la. M ga tii si ŋisubil aasui aasaak ki ŋan jer kina na; aa yaa ti ki gee kan, m ga pa si kidaak ki ŋan na.”

³ Le Nabof bui u ke, “N‑yaajatiib aafaal le m jin ŋisubil aasui aasaak kimina; Uwumbɔr aayimbil pu, maan ŋmaa di ki tii si.”

⁴ Ahab nan di nsuubiin le gir kun, le waaŋuul fii Nabof aah tuk u pu na pu. U nan ti doon waawandookaan pu, le ki di unimbil kpaa lidigbimal, kaan ji tijiir.

⁵ Upuu Jesebel nan buen u chee le ki ti baa u ke, “Ba ŋa aasui bii kina? Ba ŋa saan ji tijikaar?”

⁶ Le u gar u ke, “Ni ye Nabof aah tuk mi tibɔr ti na pu. M bui u ke u cha m daa waasubil aasui aasaak, u yaa ti ki gee kan, m ki tii u kitiŋ kiken kima ngbaan pu, le u yii ke waan tii mi.”

⁷ Le Jesebel gar u ke, “Tɔ, sin le ye ubɔr aan ŋma? Fiin, cha aasui li piin aan ki ji tijikaar. M ga gaa Nabof aasubil aasui aasaak ngbaan tii si.”

⁸ Le upii ngbaan buen ki ti ŋmee tigbann, le ki di Ahab aayimbil paan ti pu, ki di waapɔɔn mu nyii ti pu, le ki cha ti buen bininkpiib, ni binikpaam bi bi Jesreel aatiŋ ni na chee.

⁹ Tigbann ngbaan nan len ke: “Siin kimɔlul aawiin man, ki yin binib mɔmɔk nan kpaan, ki cha Nabof kal bininyuum aakakaa chee,

¹⁰ ki ban bibiindam bibaa aan bi nan len unimbil ni ke u puun lii Uwumbɔr ni ubɔr mɔmɔk pu. Ni yaa ŋa kina kan, ni di u nya kitiŋ ngbaan ni, ki ti yur ŋitakpal ku u.”

¹¹ Jesreel aaninkpiib ni binikpaam ngbaan nan ŋa Jesebel aah nan siin pu na.

¹² Bi nan siin kimɔlul aawiin, le ki yin ni binib mɔmɔk nan kpaan, le ki tii Nabof bininyuum aakakaa chee.

¹³ Bibiindam bilee ngbaan nan fii sil binib ngbaan mɔmɔk aanimbil ni, ki len ke u puun lii Uwumbɔr ni ubɔr mɔmɔk pu, kina pu le bi nan di u nyan kitiŋ ngbaan ni n‑gbaan ki yur ŋitakpal ku u.

¹⁴ Le bi nan ti tuk Jesebel ke: “Bi ku Nabof a.”

¹⁵ Jesebel aah ŋun tibɔr ngbaan na, libuul ngbaan ni le u tuk Ahab ke, “Nabof kpo a. Tɔ, li cha ti gaa ŋisubil aasui aasaak ki u nan yii ke waan di kooh tii si na.”

¹⁶ Libuul ngbaan ni le Ahab buen ŋisubil aasui aasaak ngbaan ni ke u ti gaa ki.

¹⁷ Le Uwumbɔr bui waabɔnabr Elaija u nyan ni Tisbe aatiŋ ni na ke,

¹⁸ “Li cha Samaria Aabɔr Ahab chee. Aa ga ti kan u Nabof aasubil aasui aasaak ni, ki ban ke u gaa ki.

¹⁹ Tuk u ke mi Uwumbɔr le bui u ke, ‘Aa ku uja ngbaan doo le ki ban aa ki gaa waawangol mu uu?’ Bui u ke maah len pu na sɔ: ‘Libuchachaan li ponn ni ibɔ lakr Nabof aasin na, nima chee le i ga lakr aa mu aasin.’”

²⁰ Ahab aah kan Elaija na, le u baa u ke, “Maadin, aa pii ni mi do oo?” Le Elaija gar u ke, “Een, m pii ni si. Aa di aabaa tii ke aa li tun ni kaa ŋan Uwumbɔr chee na la.

²¹ Kina pu le Uwumbɔr bui si ke, ‘M ga joo ni tibɔbir aa pu. M ga kuln aa ni uja umɔk bi saadichal ni na. M ga kuln binachipɔm ni bininkpiib mɔmɔk la.

²² Saadichal ga ŋa ke Nebat aajapɔɔn ubɔr Jeroboam aadichal na, ki ki bi ke Ahija aajapɔɔn Ubɔr Baasa aadichal na. Saah fiin maaŋuul ki cha Israel yaab tun titunwanbir pu na, le ni ga ŋa kina.’

²³ Uwumbɔr aah len Jesebel mu aabɔr pu na le ye ke, ibɔ ga ŋmɔ uwon Jerseel aatiŋ ni.

²⁴ Saadichal ni aanii u kpo kitiŋ ponn ni na, ibɔ le ga ŋmɔ u, le umɔk kpo timoor ni na, nangba tiib ga gbaa u.”

²⁵ Ubaa aa nan ki neen titunwanbir aatuln Uwumbɔr chee ke Ahab na. Upuu Jesebel mu le nan pai u le u tun.

²⁶ Waatunwanbir ti nan nyaŋ sakpen na le nan ye ŋiwaa aadoon pu. Israel yaab aah nan tur koo ni Amor yaab aatiŋ ni buyoonn na, kina le Amor yaab nan tun titunwanbir le Uwumbɔr nan jenn bi kitiŋ ngbaan pu.

²⁷ Elaija aah nan len doo na, le Ahab daa kar kar waawanpeenkaan, ki chuu peer ni, le ki di tiwan ni saak kuub na peen, ki yii tijikaar, ki doo tiwanpeenkaan ngbaan ni, le usui bii, le u chuun lik gbilngbiln.

²⁸ Uwumbɔr nan bui waabɔnabr Elaija ke,

²⁹ “Aa kan Ahab aah sunn ubaa taab nnimbiin ni pu na aa? Waah ŋa pu na, maan cha tibɔbir dan u pu buyoonn u laa fu na; ujapɔɔn aamɔfal ni, le m ga cha tibɔbir dan Ahab aadichal pu.”