1 Bibɔrb Aabɔr 29 - Uwumbɔr aagbaŋ

Bi nan tii ipiin bi ti maa Uwumbɔr Aadichal

¹ Ubɔr David nan bui binib bi mɔmɔk kuun na ke, “Njapɔɔn Solomonn le Uwumbɔr lee, tɔ, u mu laa par kaa kee kpa lituln aanimbiwoln. Lituln ngbaan ye litukpaan la, ba pu? naa ye libɔrdichal li unibɔn ban u li koo li ponn ni na, li ye Tidindaan Uwumbɔr Aadichal la.

² M pɔɔn mbaa ki ban Uwumbɔr Aadichal ngbaan aawanbankaan. Nima le ye salmaa, ni tikunabr, ni tikumann, ni tikur, ni idɔ, ni ŋitakpanyaan aabɔŋ aabɔŋ, ni ŋitakpapiin.

³ M ki tii ni jer nimina mɔmɔk na, nima le ye tikunabr ni salmaa. Maah gee Uwumbɔr Aadichal sakpen pu na, le m nyan nima mbaa aawan ponn ni tii.

⁴ Maah tii salmaa bamɔnn u na ga pii ndibim bɔtɔ lichur, ni tikunabr bamɔnn ti mu ga pii ndibim bɔtɔ ŋichur ŋilee ni imonko ilee ke bi nan di toor Uwumbɔr Aadichal aagon,

⁵ ni tiwan ni mɔmɔk biwanŋab ga nan ŋa na. Tɔ, ŋma mu ga tii Uwumbɔr ubaa pu aapiin?”

⁶ Le itaŋaal pu aayidam, ni ŋinibol aaninkpiib, ni butɔb aajab aaninkpiib, ni nnaan aatun aayidam, nyan sil ke bi ga tii Uwumbɔr Aadichal aatuln pu tiwan nimina:

⁷ Salmaa u aanyunyuun ga pii ndibim bɔtɔ ŋichur ŋitaa ni ikui iniin na, ni tikunabr ti aanyunyuun ga jer ndibim bɔtɔ ŋichur ŋilole ni ikui iloob na, ni tikumann ti aanyunyuun ga pii ndibim bɔtɔ ŋichur kipiik ni ŋitaa ni ikui iŋmu, ni tikur ti aanyunyuun ga pii ndibim bɔtɔ ŋichur imonko itaa ni kipiik ni ŋiŋmu.

⁸ Binib bi nan kpa ŋitakpanyaan na nan di tii Jehiel, u ye Liifai aanii ki nyan ni Gesonn aataŋaal ni na, u di ŋa Uwumbɔr Aadichal aawangol ni.

⁹ Binib ngbaan nan di ngeehm ŋmeen le tii Uwumbɔr, le ni nan mɔ bi pam ke bi nan tii sakpen. Ubɔr David mu aapopiin le nan ti nyaŋ bi mɔmɔk.

David aah pak Uwumbɔr pu na

¹⁰ Binib bi nan kuun ni na aanimbiin ni, le Ubɔr David nan pak Uwumbɔr. U nan bui ke, “Uwumbɔr, tiyaaja Jakob Aawumbɔr, kipak ye sin yaan le ki ti saa n‑yoonn mu kaa kpa ndoon na.

¹¹ Nnaan, ni mpɔɔn, ni kipak, ni kinyaan ye sin yaan la. Sin le yeh tiwan nimɔk bi paacham ni taab na, le aa ye ubɔr u jer bitinjoob mɔmɔk na.

¹² Nkam ni liwankpal mɔmɔk nyan ni sin chee la, le aa joo saapɔɔn joo tiwan mɔmɔk, le ki ga ŋmaa cha unii mɔmɔk kan liyimbil ni mpɔɔn.

¹³ Tɔ, timi Aawumbɔr, ti doon si, le ki pak saayimbil li kpa kipak na.

¹⁴ “Tiwan mɔmɔk nyan ni sin chee la, le m ni maanib aan ŋmaa tii si nibaa. Saah tii timi ni na le ti ki joo giin ni tii si.

¹⁵ Uwumbɔr, aa nyi ke ti bi limɔfal lee ponn ni ke biwɔwɔm ni bicham na, ke tiyaajatiib aah nan bi pu na la. Timi aamɔfal aawiin naahn kijunjuŋ ki jer cha na la, le taa ŋmaa minn nkun.

¹⁶ Tidindaan Uwumbɔr, ti kuun liwangol limina mɔmɔk ke ti nan di maa lidichal ki nyuŋ saayimbil li bi chain na la. Tɔ, ni mɔmɔk mu tee nyan ni sin chee la, le ki ye sin yaan.

¹⁷ M nyi ke aa tɔŋni unii mɔk aasui lik, le aasui piin binib bi aabimbin ŋan na pu. Mbimbinyaan ni ngeehm ponn ni le m di nsui mɔmɔk tii si nimina mɔmɔk ki kan ke binib bi mɔmɔk kuun do na kpa mpopiin le ki joo ni si ipiin.

¹⁸ Uwumbɔr, tiyaajatiib Abraham, ni Aisak, ni Jakob Aawumbɔr, cha kina aageehm ni lineen li bi saanib aasui ni, ki cha bi li ŋani saageehn n‑yoonn mɔmɔk.

¹⁹ Tii njapɔɔn Solomonn nsuubaan aaneen aan u di kii saah siin tiwan ni mɔmɔk na, ki cha u maa Saadichal li m gor tiwan nee mɔmɔk siin na.”

²⁰ David nan bui binib ngbaan ke, “Pak Nidindaan Uwumbɔr man.” Le binib bi mɔmɔk kuun nima na pak Uwumbɔr, u ye biyaajatiib Aawumbɔr na, le ki gbaan kitiŋ ki nyuŋ uma Uwumbɔr, ni ubɔr mu.

²¹ Kitaak aah woln na, le bi kɔr tiwakor ke kitork na, ki di tii Uwumbɔr, le binib ngbaan ŋman. Bi nan ki kɔr inaaja lichur, ni ipihja lichur, ni ipihbi lichur kpee, le ki di ni mɔmɔk see mmii ni, kitork aabimbiln paab. Bi nan ki joo ni ŋisubil aadaan aapiin mu.

²² Kina pu na, bi nan jin ki nyun Uwumbɔr aanimbiin ni liyaadaal ngbaan, ki nan kpa mpopiin sakpen. Bi nan ki gir moon lelee ke Solomonn le ye ubɔr. Bi nan kaan u nnaan Uwumbɔr aayimbil pu, le ki di Sadok mu ŋa utotoor.

²³ Le Solomonn jin ute aanaan mu Uwumbɔr nan siin na. Waanaan nan kal, le Israel aatimbol mɔmɔk kii waamɔb.

²⁴ Bininkpiib mɔmɔk, ni butɔb aajab mɔmɔk, ni David aajapɔtiib mɔmɔk nan puu ke bi ga li si Solomonn aachaŋ ni ke u ye baabɔr.

²⁵ Uwumbɔr nan cha litimbol ngbaan mɔmɔk san Solomonn le ki cha u kan liyimbil ki jer ubɔr umɔk puen u ki joo Israel aatimbol na.

Ubɔr David aanaan aabɔr mɔmɔk

²⁶ Jese aajapɔɔn David nan joo Israel aatimbol mɔmɔk ki ti saa ŋibin imonko ilee la.

²⁷ U nan bi Hebronn aatiŋ ni ki ye ubɔr ki ti saa ŋibin ŋilole la, le ki kal nnaan aajal pu Jerusalem aatiŋ ni ki ti saa ŋibin piitaa ni ŋitaa.

²⁸ U nan por sakpen le ki nin kpo. U nan kpa liwangol, le waanib mɔmɔk pak u, le waah nan kpo na, ujapɔɔn Solomonn kal waajal pu.

²⁹ Ubɔr David aanaan aah piin ki ti doo pu na aabɔr bi Uwumbɔr aabɔnabr bitaa bimina, Samuel, ni Natann, ni Gad aah nan ŋmee pu na ni.

³⁰ Tibɔr ngbaan tuk timi waah nan ye ubɔr pu na, ni waah nan kpa mpɔɔn pu na, ni tiwan ni ŋa u na, ni tiwan ni ŋa Israel aatimbol, ni nnaan mu nan mann goln u na la.