1 Bibɔrb Aabɔr 19 - Uwumbɔr aagbaŋ

David aah nyaŋ Amonn ni Siria yaab pu na

¹ Nee aapuwɔb le Amonn aabɔr Nahas kpo, le ujapɔɔn Hanunn jin waanaan.

² Le Ubɔr David bui ke, “Ni ŋan ke m ŋa Hanunn tiŋann ke ute Nahas aah nan ŋa mi pu na.” Kina pu le u nan tun binib ke bi ti doon u likpuul. Baah ti fuu Amonn aatiŋ ni ki doon Ubɔr Hanunn na,

³ le Amonn yaab aayidam bui ubɔr ngbaan ke, “Aa dak ke aate aanyuŋ pu le David tun ni bijab bee ke bi nan doon si likpuul aa? Naa ye kina pu. U tun ni bi ke bi nan pekr kitiŋ kee la, aan u ŋmaa nyaŋ timi.”

⁴ Le Hanunn chuu David aatuuntiib ngbaan, ki kuu bilangban lipepel libaabaa, ki gii gii baawanpeenkaan mu bikpimɔju mɔk, ki di bi lii ke bi li cha.

⁵ Inimɔɔn pu, baa nan ki ŋmaa gir kun. David aah ŋun baah ŋa bi pu na, le u naŋ tuk bi ke bi gaar Jeriko aatiŋ ni aan bilangban ngbaan ki pa ni waahr.

⁶ Ubɔr Hanunn ni Amonn yaab nan bee ke bi ŋa David baadin, le bi buen ti pan tikunabr aamombil ŋichur piitaa ni ŋinaa tii Mesopotamia aapaacham wɔb, ni Maaka, ni Soba aatim mu bi Siria aatiŋ pu na aajab ke bi nan ter bi butɔb ni.

⁷ Bi nan pan ŋichur piitaa ni ŋilee aataan aatɔroku tiib, ni bijab bi ŋaal tɔroku tiib na, ni Maaka aabɔr aajab, le bi nan ti kuun kal gbaŋ Medeba. Le Amonn yaab mu nyan ni baatim mɔmɔk ni ki gor ke bi ti jan kijaak.

⁸ David aah ŋun tibɔr ngbaan na, le u tun Joab ni waajab mɔmɔk ke bi ti ŋeer tɔb.

⁹ Amonn yaab nan nyan ki lul sil baatiyil Raba aabisamɔb, le bibɔrb bi nan dan ke bi nan ter bi na mu lul sil mpaan pu.

¹⁰ Joab nan kan ke baadim aajab ban ke bibaa li bi upuwɔb le biken mu li bi umɔb wɔb ki tak u, kina pu le u nyan Israel aajab bi nyi butɔb aabɔr mbamɔm na, ki cha bi sil toŋ Siria yaab,

¹¹ le ki di bi gur na tii unaal Abisai, le u mu di bima ngbaan lul sil toŋ Amonn yaab.

¹² Joab nan bui u ke, “Aa yaa ti kan ke Siria yaab yaa bi nyaŋni mi kan, dan ki nan ter mi, Amonn yaab mu yaa bi nyaŋni si kan, m mu ga dan nan ter si.

¹³ Li kpa lipobil man ki li pɔɔ. Cha ti jan man timi aanib ni Uwumbɔr aatim pu. Cha Uwumbɔr aageehn ŋa.”

¹⁴ Joab ni waajab nan chii ke bi ti tak Siria yaab, le Siria yaab san yaa.

¹⁵ Amonn yaab aah kan Siria yaab bi san na, le bi mu san cha Abisai ni waajab, ki gir koo baatiŋ ni. Le Joab gir kun Jerusalem.

¹⁶ Siria yaab ngbaan nan bee ke Israel yaab nyaŋ bi, le bi kuun baajab bi bi Yufrates Aamɔɔl aawipuul wɔb na, le ki di bi ŋa Soba aatiŋ Aabɔr Hadadeser aajab aaninkpel Sobak aaŋaal ni.

¹⁷ David aah ŋun ti na, le u kuun Israel aajab, le bi puur Jɔɔdann Aamɔɔl, ki cha bi lul sil ki toŋ Siria aajab ngbaan. Kijaak ngbaan nan piin,

¹⁸ le Israel yaab jenn Siria aajab giin bipuwɔb. David ni waajab nan ku Siria aajab bi joo itaan aatɔroku tiib na ŋichur ŋilole, ki ku bitandam mu ŋichur imonko ilee. Bi nan ki ku Siria aajab aaninkpel Sopak mu.

¹⁹ Bibɔrb bi nan bi Siria aabɔr Hadadeser aataab na aah kan ke Israel yaab nyaŋ bi na, le bi ŋa bi chee nsuudoon aamɔbaan ki kpaln baatutum. Le Siria yaab aa nan ki kaa ke bi ter Amonn yaab.