Yunu 1 - Wunta Mempori

I Yunu molai inso a mpepoboi-Do i Ue 1:1-17

¹ Haweomo pau-Do i Ue ndi Yunu anano i Amitai, kanandio,

² ”Lakomo pontuturako i Niniwe, kota anu langkai atuu, pebooliakonomo pepopoto'ori ndi ondae, hangano wineweudo mosa'o haweomo ndi Ongkue.”

³ Sine i Yunu molai lumako i Tarasisi, olai inso i aro-Do i Ue. Onae lumako i Yapo ka ihaweo i ra'ai asa kapala anu ta melungka lumako i Tarasisi. I'owahio sewano pelempaano, ka i'amba mewuatako a ngkapala atuu lumako i Tarasisi merongaako ira, olai inso i aro-Do i Ue.

⁴ Sine Ondae i Ue mompotii umangi a ntahi, ka i'amba gagiomo opue langkai, ranta kapala atuu tedeimo koa ka iterawo.

⁵ Mia mpo'angga a ngkapala atuu medoito, singge mia meboo-booli a mpinesombaino. Domentadio a laro ntahi luwuno inulano kapala atuu mpokomonongkoo. Kontongaano atuu, i Yunu metiiomo i larono kapala anu i totono ntu'u, mepombole i tu'ai ka tekoturi rodo.

⁶ Haweomo petewawa a ngkapala atuu tepohaweakono ka ipotae, ”Kana'umpe omue mokompoturi rodo ntu'u? Pewangumo, peboolimo ndi Ondae Ue Alamu, bara'ura Ondae Ue Ala atuu Ira merio kita, kasi tomemasola.”

⁷ Ka do'amba mpepau asa mia ka asa mia, ”Aiwamo tompotende undi, ka tomento'orio, hangano isema masolaa andio umalu kita.” Mpontende iramo undi ka undi atuu tedonta ndi Yunu.

⁸ Dompotaeakono, ”Pauakami, hangano isema masolaa andio umalu kita. Hapa po'anggaamu ka isua insoamu? Hapa witamu ka inso a tongku isua omue?”

⁹ Sangkino ndi ondae, ”Ongkue to Ibarani, kudoitoako Ira Ue, Ue Alano asa wawolangi anu mokogagio tahi molue ka wawo wita.”

¹⁰ Luwuno mia atuu tedoa medoito ka dompotae ndi onae, ”Hapamo anu wineweumu?” Luwuno mia atuu mento'orio, nine onae molai, olai inso i aro-Do i Ue, hangano mongkona atuu ipauako iramo.

¹¹ Mpesikeno ira, ”Hapa anu asalakono kami meweweuo ndi omue, ka ipenaa-naa bombano tahi?” Hangano tahi tedoa langkai bombano.

¹² Isangki ira, ”Imentande akumo, impetadiakunemo a laro ntahi, manasa tahi ta menaa-naa ka nahi alukomiu mbo'u. Hangano kuto'orio, nine hangano koa ongkue ka i alukomiu opue langkai andio.”

¹³ Luwuno mia atuu tendeano mpebose ira mewawao kapala atuu mepokule i wita, sine nahi domempolio, hangano tahi tedoa mebomba umalu ira.

¹⁴ Ka do'amba mpebooli ndi Ondae i Ue, dompotae, ”Oo Ue si po'inee kami wainto memate hangano penaano mia andio. Si popotembia kami reano mia anu nahina salano, hangano Omiu Ue, moweweu Komiumo kana po'ehe-Miu.”

¹⁵ Ka do'amba mentandeo i Yunu, ka mpetadiakono a laro ntahi. Umarino atuu tahi menaa-naaomo mebomba.

¹⁶ Mia atuudo gagi tedoa ira medoito ndi Ondae i Ue, ka do'amba mpesombaako pesomba sinumbele ndi Ondae i Ue saru mpedandiako mpontanga.

¹⁷ A pompakosi-Do i Ue haweomo asa bou langkai anu ta tumeleo i Yunu. I Yunu mo'ia a laro kompono bou atuu otolu oleo otolu wongi tehineno.