Yosua 5 - Wunta Mempori

Petindia ka oleo langkai Pasa i Giliga

¹ I tempono luwudo Mokole to Amori anu mpo'ia i sumooano oleo koro Yarade ka luwuno mokoledo to Kana'a ia wiwi ntahi, motae Ondae i Ue mokomo'areo koro Yarade i arodo to Isaraeli, onae ka dompokompesakiako, molusaomo aroado ka nami hina sumangado ira mpe'iwaliako ira to Isaraeli.

² I tempo atuu mepau iramo i Ue ndi Yosua, ”Poweweu piso inso ia watu ka itindi ira mbo'u.”

³ Moweweuomo piso inso ia watu ka itindi ira to Isaraeli i Pongkuno Kuli Katana.

⁴ Onaemo pu'uno ka i Yosua tumindi ira. Luwudo mia anu meluarako inso i Masiri, luwuno tama, luwuno sorodadu, memate iramo i pada one ia ntonga nsala, mansado mpeluarako inso i Masiri.

⁵ Nde luwudo mia anu mpeluarako inso i wita Masiri mpentindi iramo, sine luwudo mia anu hina i pada one ia mpelempaado meluarako inso i Masiri, napi domentinindi.

⁶ Nde patopulu nta'u tehineno to Isaraeli atuu dompelempa molaloo pada one, memate iramo luwu luwudo tongku atuu, onaemo sorodadu anu mpeluarako inso i Masiri, anu nahi domporonge pau-Do i Ue. Ndi ondae atuu Dosumpa iramo Ue, komba ira me'ineheako pewinso ia wita anu domedinandiako Ira i Ue saru mesumpa ndi ondae ue mpu'udo, ira mpeweengakono ndi ontae, wita anu tedoa hadio susu ka siu hoani.

⁷ Sine anado anu ta umeu ira, ondaemo anu tinindino i Yosua, nde ondae napi dompetindi, ia mpelempaado.

⁸ Mansado luwuno tongku atuu tinindi, mpo'ia iramo ia mpo'iangaado, ia kemado ranta ka dometompa.

⁹ Mepau iramo i Ue ndi Yosua, ”Oleo andio Ku'oniniomo salamiu i wita Masiri.” Onaemo ka po'iangaamiu atuu nineeako Giliga ranta kanandio.

¹⁰ Kontongaado mpo'ia i Giliga, to Isaraeli mporame-rame ira oleo Pasa, oleo kohopulu ka opaa wula atuu, ia ngkiniwia i lembono Yeriko.

¹¹ Umarino oleo Pasa oleo koa atuu mpongkaa iramo hasilino wita atuu, ka roti anu nahina ragino ka gandu anu hinole.

¹² Tisomono nami hina roti mana, umarido mpongkaa pae hasilino wita atuu. Gaagi to Isaraeli nami dompohawe mbo'u roti mana, sine ilarono ta'u atuu mpongkaa iramo hasilino wita Kana'a.

Petewawa Balatantara-Do i Ue

¹³ Mansano kumitao i Yosua inia Yeriko inso ia umpedaano, ikitao asa tama mentade i arono saru ponai a ngkaeno. I umpedaakono i Yosua ka ipesikeno, ”Omue atuu waliku ke iwaliku?”

¹⁴ Sangkino, ”Naahi, sine ongkue andio Tadulako Balatantara-Do I Ue. Kanandio hawe akumo.” Menggolontuomo i Yosua ra'ino hawe ia wita, mesomba ka ipesikeno, ”Hapa anu ta pinaumiu ndi ongkue?”

¹⁵ Tadulako Balatantara-Do i Ue atuu mepauakono i Yosua, ”Lohuo sapatumu, nde po'iangaamu mentade atuu mempori.” I Yosua tumondao kana anu pinauno.