Yosua 1 - Wunta Mempori

Parenta-Do i Ue ndi Yosua ka irontuo wita Kana'a

¹ Mansano mate i Musa tetenaado i Ue, mepau Iramo i Ue ndi Yosua anano i Nunu, tetenaado i Musa atuu, kanandio,

² ”Tetenaa-Ku i Musa mateomo; gagi kanandio pepatindamo, pesakiako i Koro Yarade andio, omue ka luwuno tongkumu, ka ulako ia inia anu Aku weako ira, ia to Isaraeli atuu.

³ Sompo wita pelandaamu Aku weeakomiu, kana anu Kudandiakono i Musa.

⁴ Inso i pada one ka torukuno Libano anu i asambalino atuu hawe ia ngkorono langkai, onaemo Koro Eparata, luwuno witado to Heti, hawe ia Ntahi Langkai i sookano oleo, luwuakoano atuu ta gagi witamu.

⁵ Isemamokoa nahi ta hina mia moko'ewaiko asa ntinuwumu; kana Kukongkomio i Musa, kanatuu koa mbo'u Kukongkomiko. Nahi Aku mo'ineeko ka bintako.

⁶ Peteao, ka pokorosoo aroamu, nde omue anu ta gagi petewawado tongku andio mpe'ueo wita anu Kudandiako ira ka mesumpa ia ue mpu'udo ka domewineeako.

⁷ Tendeano, peteao ka pokorosoo aroamu tem oleo aroa, pompe'inandai ba upelelu montonda songka anu itenaakomu i Musa, tinena-Ku ndi omue, sipansia i koana ke imanggali, ka ume'ura isuamokoa ulako.

⁸ Sitekolupe popauo wunta Taura andio, sine penootio ia meene ka woongi, ka upompe'inandai koa melelu montonda luwuno anu teburi ilarono, nde ba kanandio pelempamu ta moiko ka kome'ura.

⁹ Nde komba Kutenaakomu ke: Pokomorosoo aroamu? Sidoito, ka motewe aroamu, nde Ondae i Ue, Ue Alamu kumongkomiko, isua-suamokoa ulako.”

¹⁰ Metenaomo i Yosua, ia luwuno petewawa sorodadudo tongku atuu, ipotae,

¹¹ ”Imelakomo ia luwuno kemado ka utena ira, kanandio: Imempatindao kaangamiu, nde ilarono otolu oleo komiu mensakio koro Yarade andio ka komiu melako mensapoio inia anu Ira wee komiu i Ue, Ue Alamu, ka impo'iangario.”

¹² A nto Rube, ka nto Gadi, ka ia tongku Manase asantia atuu motaeomo i Yosua, kanandio,

¹³ ”Impewowoloo pe'oliwino i Musa tinena-Do i Ue atuu, ndi omiu kanandio: Ondae i Ue, Ue Alamu Ira weeakomiu rodoa ka inia andio;

¹⁴ Luwuno beine, ka nana'otemiu, ka pinotuwumiu, moiko impo'ia ia inia anu iweakomiu i Musa ndi omiu anu i asatowano koro Yarade, sine omiu luwuno pongkiari anu mosia ntu'u, asalakono komiu mpesakiako mpese'elungi ira pepaekompomiu saru sangka mpetea, ka imentulungi ira,

¹⁵ ranta Ondae i Ue moweeako ira rodoa ia pepaekompomiu kanakoa mbo'u ndi omiu, ka ira mbo'u impo'iangario inia anu ta weeako ira i Ue, Ue Alamu. Umari atuu moikoomo impekule i inia miu ka impo'iangario anu iweakomiu i Musa tetenaa-Do i Ue atuu i asatowano koro Yarade, te'alaako i sabaano oleo.”

¹⁶ Onaemo ka domesangkio i Yosua, dompotae, ”Luwuno anu itenaakami, kami meweweuo, isua koa kimentinena kami melako;

¹⁷ kana kimperorongeakono songkano i Musa, kanatuu koa mbo'u kimperorongeakomiu. Butu, Ondae i Ue, Ue Alamu, Ira wela kumongkomi komiu, kana Dokongkomio i Musa.

¹⁸ Isemamokoa anu umewaio petenamiu ka nahi perorongeakono paumiu, hapamokoa itenaakono, ta hinuku mate. Butu, peteao ka pokorosoo aroamu!”