Yoeli 1 - Wunta Mempori

Puu mpau

¹ Pau-Do i Ue anu hawe ndi Yoeli anano i Petueli.

Pesapoido bawaano kosume gagi pohuku-Do i Ue

² Rongeomo andio, oo luwuno mia memota'u, imenta'oomo birimiu, oo luwuno palili! Horioke gagi kanandio i tempomiu, ke i tempodo uempu'umiu?

³ Imentutuluomo mongkona atuu a luwuno anamiu, ka po'inee iramo anamiu mentutuluako ira anado, ka luwuno anado a inule lembuino.

⁴ Hapa anu binintano kosume mongkaa ntededei, ikaano kosume melakopi, hapa anu binintano kosume mpelimba, ikaano kosume mpelonso, ka hapa anu binintano kosume mpelonso, ikaano kosume modoko mongkaa.

⁵ Hei anu wela molangu pewangumo, ka pengesemo! Ponsabangimo, hei luwuno anu marampo'inu anggoro hangano anggoro wo'ohu, hangano anggoro atuu rinontuomo inso a ngangamu!

⁶ Hangano asa tongku lumako sumapoio witaku, tongku anu moroso ka nahi pinokopau porokono; ngisino kana ngisino singa, ka tinduno kana tinduno singa waino.

⁷ Iweweuo keu anggoroku roopu, ka keu araku pudu-pudu; kulino piingko ikulisio ka i'amba metadiakono, ranta luwuno sampano gagi mopute.

⁸ Ponsabangimo kana ana beine anu mesangkaako sawu po'inombo hangano umbu ngkoroi, pinehohawano tempono imongura.

⁹ Pesomba kaanga ka pesomba tinawa tampulaomo inso a raha-Do i Ue; ka pompemasusa iramo sando mpesomba, puu pompekakaako-Do i Ue.

¹⁰ Lere ropuomo, wita mompokomasusa, hangano gandu ropuomo, anggoro mokariomo, lana tedeimo koa.

¹¹ Imemokoko'iimo, hei luwuno puu mpelere, imponsabangimo, hei luwuno puu mpo'angga lere anggoro ponsabangi hangano gandu ka jelai, hangano ropuomo sowia a lere.

¹² Keu anggoro mokariomo ka keu ara moleuomo; keu delima, keu kuruma ka keu apeli, luwuno keu i tonga mpada mokariomo. Mentee ntu'u, makuraomo mawongko inso a luwuno anano mia.

¹³ Pokonaomo sawu po'inombo ka ponsabangimo, hei luwuno sando mpesomba; imperaalikimo, hei luwuno puu pompekakaako meda pontunua pesomba; impewinsomo, imperatomo saru mompokona sawu po'inombo, hei luwuno puu pompekakaako-Do Ue Alaku, hangano pesomba kaanga ka pesomba tinawa, pinenaa-naaakoomo inso a raha-Do Ue Alamu.

¹⁴ Pesusuaomo oleo puasa, paleleomo tepumpua langkai; pumpu iramo mia memota'u ka luwuno palili wita a raha-Do i Ue, Ue Alamu, ka impeboolimo ndi Ondae i Ue.

¹⁵ Hei, oleo atuu! Mentee ntu'u oleo-Do i Ue rangkuomo, haweno gagi pabawa poropua inso ndi Ondae Anu Tedoa Pabawa.

¹⁶ Kombake i arono matato pingkoomo kaanga, mawongkoa ka po'unde-unde inso a raha-Do Ue Alato?

¹⁷ Wuku mpinopaho gagi mokari a batuno wita, luwuno goda moaomo ntu'u, ka luwuno si'e terongkaomo, hangano gandu pingkoomo.

¹⁸ Luwuno pinotuwu mpe'anaiki ira ntu'u ka luwuno bawaano sapi mbo'u pompemasusa, hangano nami hina mbo'u ewo a mpada tiado; asa bawaa mbo'u bembe bimba tetonda marasai.

¹⁹ Ndi Omiu, oo Ue, aku mebooli, hangano pingkoomo ikaano api wita pompakambia i pada one, ka langano api mokomo'aio luwuno keu a ntonga mpada.

²⁰ Luwuno mbo'u kondehora mo'ila ntekewoi ndi Omiu, hangano korono wela mo'are, mo'areomo, ka wita pompakambia mbo'u i pada one pingkoomo ikaano api.