Yesaya 27 - Wunta Mempori

Isaraeli ta kinadudui 27:1-13

¹ I tempo atuu Ondae i Ue Ira weweuo pohuku mompake ponai-Do anu montaso, langkai ka moroso a Lewiata, ule anu molore, a Lewiata, ule anu monggelo-nggelo, ka Ira mepateo ule naga anu a ntahi.

² I tempo atuu ta hina lere anggoro anu tekosi, ”Penanimo mongkona onae!

³ Ongkue, Ue, anu dumagaio; sompo tempo Kusisiwuio. Kasihina anu sumosanggolio, meene wongi Kudagaio;

⁴ nahi tensila tekuda-Ku. Tewala mohawe Aku ewo ka rui ndi onae, Aku mompari-pari mepate ira, Aku tumunu ira ka ipingko,

⁵ sangkadio tewala mpo'ungke ira pekaduduia ndi Ongkue ka mpo'ungke manangai saru Ongkue, oo mpo'ungke sintuwu saru Ongkue!”

⁶ A oleo anu ta hawe, i Yako ta mehaka, Isaraeli ta gagi hadio ka mentumba ka wawontolino ibuketiakono hasilino.

⁷ Nde Doropu ira i Ue bawaa-Do kana Doropuo mia anu rumopu ira? Ke Dopepate irake bawaa-Do kana Dopepateo mia anu mepate ira?

⁸ Saru tumambao ka sumaari ira, mekara-kara Komiumo saru ondae. Dotadiako iramo pepuurino angi-Do anu mokora i tempono angi i sabaano oleo.

⁹ Onaemo pu'uno, kanandiomo ta pinahihi salano i Yako ka ndiomo wuano tewala ipoko'olaio halano: Ira weweuo luwuno watu pontunua pesomba kana watu kapuru anu rinawo-rawo, ranta nahina mbo'u karu pelahumoaa ka meda pontunua dupa anu mo'ia mentade.

¹⁰ Hangano kota anu mebente atuu gagi boni-boni, asa po'ianga anu pinokomooa ka bininta kana pada one; ana nsapi ta mongkaa ewo ka melungku i ra'ai mokopingko ira sampano keu.

¹¹ Tewala mokariomo sampa-sampano, asalakono ta pinudu; ira me'aiwa beine ka mempakeo gagi keu ponahu. Hangano, onaemo andio asa tongku anu nahi molino pinewowolodo, onaemo pu'uno, onae nahi Dopehohawao anu mokogagio ka nahi Dopehohawao anu weweuo.

¹² I tempo atuu Ondae i Ue Ira monsesa mompu'u i Koro Eparata hawe i Koro Masiri, ka omiu komiu mepinumpu nte'o'asa, hei to Isaraeli!

¹³ I tempo atuu ta pinuuri tawuwua langkai, ka ira mehawe ondae anu ntetadi i wita Asiuri saru ondae anu mentinadi i wita Masiri ka dompenggolontu mpesomba ndi Ondae i Ue a ntorukuno anu mempori, i Yerusale.