Yesaya 20 - Wunta Mempori

Pohuku a nto Masiri ka Etiopia 20:1-6

¹ Tempono tadulako sorodadu anu tinenano i Sarigoni, mokoledo to Asiuri, hawe i Asidodi, meteaakono ka mongko'alao,

² a nta'u atuu Ondae i Ue mepau molalo i Yesaya anano i Amosi, ”Lakomo ka lohuomo sawu po'inombo a ntongamu ka lohuomo sandala inso a ngkarumu.” Onaemo ka iweweu kanatuu, melempa nahi pelemba ka nahi pe'empehi karu.

³ Mepau Iramo i Ue, ”Kana tetenaa-Ku i Yesaya melempa nahi pelemba ka nahi pe'empehi karu otolu nta'u tehineno gagi petondoni ka pepopoto'ori a nto Masiri ka Etiopia,

⁴ kanadiomo mokoledo to Asiuri ta wawa ira to Masiri gagi mia mentinawa ka to Etiopia gagi mia mentinadi, mota'u ka mongura. Luwuno nahina anu melemba, nahina anu me'empehi karu ka purido tengkita, gagi pompokongkodei a nto Masiri.

⁵ Mia ira mentededengke ka memongkoko'ii hangano Etiopia anu pinerorohido ka hangano Masiri anu pinemosiado.

⁶ I tempo atuu palilino wita i wiwino andio ira mpotae: Kitao, kanandiomo teweweudo mia anu pinerorohimami, kahinaano ndi ondae kimpelulu mpepetulungi ka kintekadudui inso ndi mokoledo to Asiuri. Kana'umpe mbo'u ka kami mentola?”