Yeremia 41 - Wunta Mempori

¹ A wula ko'opitu haweomo i Sumaila anano i Netania anano i Elisama, asa mia inuleno mokole ka petewawa sorodaduno mokole anu langkai pangkano, saru hopulu mia ndi Gedalia anano i Ahikami i kota Misipa. Kontongaado mpongkaa roti mperonga-ronga i Misipa,

² mentadeomo i Sumaila anano i Netania saru hopulu mia anu perongano, ka mepateakono ponai i Gedalia anano i Ahikami anano i Sapani. Kanatuumo ipepateo i Gedalia anu pinotorono mokole i Babeli gagi pabawa i wita atuu.

³ Luwuno to Yehuda anu perongano i Gedalia i kota Misipa ka luwuno to Kasidimi, anu hinawe i ra'ai gagi sorodadu, ipepate ira mbo'u i Sumaila.

⁴ Tisomono umarino ipepateo i Gedalia, ka napi hina mia tumo'orio,

⁵ mehawe iramo mia inso i Sikemi, i Silo ka i Samaria, hadiodo halo pulu mia, saru danggo tekeru, sangkado teberi-beri ka koroido ntesosoreki. A ngkaedo hinao pesomba kaanga ka dupa ta pinesombaako a Raha-Do i Ue.

⁶ Ka i'amba i Sumaila anano i Netania meluarako inso i Misipa ta tepohaweako ira tekonai mengese asa ngkeu sala. Tempono itepohaweako ira, motaeomo ndi ondae, ”Lakomo ndi Gedalia anano i Ahikami!”

⁷ Tempono domehawe i tonga-tongano kota, i Sumaila anano i Netania ka luwuno mia anu perongano sumumbele ira. Ka i'amba wata ngkoroido pinepasiako a nsumuru.

⁸ Sine, i olodo hinao hopulu mia anu mpotae ndi Sumaila, ”Si pepate kami, hangano da hinao kaangamami tewuni i bungkuno kota: gandu, jelai, lana ka siu hoani!” Onaemo pu'uno nahi gagi domempinepate kana wali-walido.

⁹ Onaemo sumuru, po'iangano domempinetadiako luwuno wata ngkoroino mia anu pinepateno i Sumaila atuu onaemo sumuru langkai anu wineweuno Mokole Asa ta umaropio i Baesa, mokoledo to Isaraeli. Sumurumo atuu anu inihiino i Sumaila anano i Netania umihiiakono wata ngkoroi atuudo.

¹⁰ Ka i'amba i Sumaila wawa ira gagi mia mentinawa luwuno palili anu datebinta i Misipa atuu, luwuno ana beineno mokole ka luwuno mia anu da mpo'ia i Misipa anu inaa iramo i Nebusaradani, petewawa sorodadu podagai mokole atuu i totono pabawano i Gedalia anano i Ahikami. I Sumaila anano i Netania wawa ira gagi mia mentinawa, ka i'amba lumako ta me'asambaliako i witado inuleno i Amoni.

¹¹ Sine tempono i Yohanani anano i Kareahi ka luwuno sorodadu langkai pangkano anu perongano merongeo mongkona luwuno mosa'oa anu wineweuno i Sumaila anano i Netania,

¹² domepumpu iramo luwuno sorodadudo, ka do'amba mpelungka melako mpeteaakono i Sumaila anano i Netania. Dontepohaweakono umpeda limbo i Gibeoni.

¹³ Tempono luwuno palili anu perongano i Sumaila atuu mengkitao i Yohanani anano i Kareahi saru luwuno sorodadu langkai pangkano anu perongano, mpo'unde iramo.

¹⁴ Luwuno mia anu winawano i Sumaila inso i Misipa atuu gagi mia tinawa mpewolili ka dompolai ndi Yohanani anano i Kareahi.

¹⁵ Sine, i Sumaila anano i Netania saru halo pulu mia tola inso a ngkaeno i Yohanani ka melako i witado inuleno i Amoni.

¹⁶ Ka i'amba i Yohanani anano i Kareahi saru luwuno sorodadu langkai pangkano anu perongano pumpu ira luwuno palili anu da mentuwu nahi wawao i Sumaila anano i Netania inso i Misipa gagi mia tinawa, umarino mepateo i Gedalia anano i Ahikami. Ondae atuu tama, sorodadu, beine, nana'ote ka luwuno pegawai langkanae anu mewinawa mpekule inso i Gibeoni.

¹⁷ Ondae mpelempa mpiha ka mpenaa-naa a raha peratoa rahano i Kimihami umpeda Beteleme, a laro pelempaa te'aro i Masiri,

¹⁸ metangkoro ira to Kasidimi anu dinoitoakodo. Hangano, i Sumaila anano i Netania umariomo mepateo i Gedalia anano i Ahikami anu umari pinotorono mokole i Babeli gagi pabawa i wita atuu.