Yeremia 32 - Wunta Mempori

Po'olia lere gagi pe'inia inso tondonino i Yehuda anu ta hawe

¹ Pau inso ndi Ondae i Ue hawe ndi Yeremia a nta'u kohopulu poparentaano i Sedekia, mokoledo to Yehuda. Onaemo ta'u ko hopulu ka oalu poparentaano i Nebukanesa.

² I tempo atuu sorodaduno mokole i Babeli kumaduo Yerusale, ka nabi Yeremia tinaha a kintala podagaia anu kongko a langkanaeno mokoledo to Yehuda.

³ Hangano i Sedekia, mokoledo to Yehuda, i'ontoomo i ra'ai ka ipotae, ”Tembio ka upompau anu ta gagi: Kanandiomo pau-Do i Ue: Menteeano, Aku meweengakono kota andio a ngkaeno mokole i Babeli, ka ipentorokio;

⁴ kanatuu koa mbo'u i Sedekia, mokoledo to Yehuda, nahi ta tola inso a ngkaedo to Kasidimi, tendeano manasa ta pineweengako a ngkaeno mokole i Babeli anu ta mepau saru i Sedekia tepopo'aro, mata saru mata;

⁵ ka i'amba i Sedekia ta wawao i Babeli ka i ra'aimo onae ta mo'ia, hawe ka Kuperioo, kanandiomo pau-Do i Ue; ka tewala mpetea komiu umewai ira to Kasidimi atuu, nahi komiu mponangi!”

⁶ Motaeomo i Yeremia, ”Pau-Do i Ue hawe ndi ongkue, kanandio:

⁷ Mentee ntu'u, i Haname'eli, anano i Salumi, maamamu, ta hawe ndi omue ka motae: Oliomo lereku anu i Anatoti, hangano omuemo anu hinao pabawamu tumolosio ka umolio.

⁸ Menunu saru pau-Do i Ue atuu, haweomo i Haname'eli, anado maamaku ndi ongkue a kintala podagaia, ka motae: ’Oliomo lereku anu i Anatoti i wita Benami atuu, hangano omuemo anu hinao pabawa mompe'ue ka pabawa montolosi; oliomo atuu!’ Onaemo ka kuto'orio, nine onaemo atuu pau-Do i Ue.

⁹ Gagi ku'olio lere anu i Anatoti atuu inso ndi Haname'eli, anado maamaku, ka montimbaako ira doi mobeano hopulu ka opitu sikala salaka.

¹⁰ Ongkue moburi wunta pe'olia ka tumondonio umarino mempinoboi sakosii saru salaka atuu tinimbaako pontimba.

¹¹ Ka ku'amba umalao wunta pe'olia anu me'ihi atorano ka pompakosi atuu, moiko anu pinonaako pontondoni maupo polimbano anu nahi pinonaako pontondoni;

¹² ka ku'amba meweengakono wunta pe'olia atuu ndi Baruki anano i Neria anano i Mahasea i arono i Haname'eli, anado maamaku, i arodo luwuno sakosii anu meburingkaeomo wunta pe'olia atuu, ka i arodo luwuno to Yehuda anu mekongko a kintala podagaia atuu.

¹³ I arodo kuparentao i Baruki, kupotae,

¹⁴ ’kanandiomo pau-Do Ueno luwuakoano, Ue Alado to Isaraeli: Ala iramo wunta andio, moiko wunta pe'olia anu pinonaako tondonino atuu maupo polimbano anu nahi pinonaako tondonino andio, naaomo luwuno atuu a laro bolusa wita pulu, ka ipokompo'ia tehine.

¹⁵ Hangano kanandiomo pau-Do Ueno luwuakoano, Ue Alado to Isaraeli: Raha, bonde ka lere anggoro ta inoli mbo'u i wita andio.’

¹⁶ Umarino kupeweengakono wunta pe'olia atuu ndi Baruki anano i Neria, mekakai akumo ndi Ondae i Ue, kupotae:

¹⁷ Oo, Ue Ala! Menteeano, Saru roso-Miu anu langkai ka tokia anu tererendu Ipokogagiomo langi ka tolino. Nahina maupo te'asa anu nahi Ipolio!

¹⁸ Omiumo anu mopokitao pompehohawa-Miu a mapasowu-sowuno mia ka anu mombalo salado ama a luwuno anado umarino ondae. Oo Ue Ala anu langkai ka moroso, nee-Miu onaemo Ueno luwuakoano,

¹⁹ langkai a laro ntinoo-Miu ka maramba a wineweu-Miu. Mata-Miu tewile kumitao luwuno peleludo anano mia anu paguruo sompo mia menunu saru peleluno ka menunu saru wuano wineweuno.

²⁰ Omiu anu mopokitao luwuno petondoni ka anu mengkinohali-haliako i wita Masiri, hawe oleo andio a nto Isaraeli ka luwuno mia, onaemo ka Iweweuo nee-Miu, kana a oleo andio.

²¹ Saru luwuno petondoni ka anu mengkinohali-haliako, saru kae anu moroso ka tokia anu tetande saru mongkokongiria anu langkai Iwawa iramo bawaa-Miu Isaraeli mpeluarako inso i wita Masiri.

²² Omiu weeako ira wita andio, kana anu Idandiakonomo sumpa a uempu'udo ka doweeako ira, asa wita anu hadio ntu'u susu ka siu hoani.

²³ Ka do'amba mpewinsokio ka mpetorokio, sine nahi domperorongeakono pau-Miu ka nahi domentuwu montonda Songka-Miu. Luwuno anu Iparentaako ira ka domeweweuo, nahi domeweweuo. Onaemo pu'uno ka Ipotiiako ira luwuno masolaa andio.

²⁴ Menteeano, luwuno rere watu pongkadua tekenseomo pinoko'umpeda ka dompoko'alao kota. Hangano ponai, mokoninggoa ka haki leleno kota atuu pineweengako a ngkaedo to Kasidimi anu mpeteaakono. Ka hapa anu pinau-Miu atuu gagiomo; mentee ntu'u, Omiu isa'a kumitao.

²⁵ Sine Omiu, oo Ue Ala, mepau Komiumo ndi ongkue, ’Lere atuu oliakonomo salaka ka poboi iramo sakosii.’ Kahinaano, kota atuu pineweengakoomo a ngkaedo to Kasidimi.”

²⁶ Pau-Do i Ue hawe ndi Yeremia, kanandio,

²⁷ ”Menteeano, Ongkuemo Ue, Ueno luwuno anu tuwu. Hinaoke anu nahi Kupolio?

²⁸ Onaemo pu'uno kanandiomo pau-Do i Ue: Menteeano, Kupeweengakono kota andio a ngkaedo to Kasidimi ka a ngkaeno i Nebukanesa, mokole i Babeli, ka ta mongko'alao.

²⁹ To Kasidimi anu mpeteaakono kota andio ira me'aiwa mesongkoo ka mokomo'aio mbo'u luwuno raha anu a wawo atono mia mpotunu pesomba a Baala ka mpopesombaako pesomba tinawa a luwuno pinesombai susua ka dompokotesingkao tekuda-Ku.

³⁰ Hangano to Isaraeli ka to Yehuda mpoweweu butu anu mosa'o a pongkita-Ku mompu'u tempo imongura; mentee ntu'u, to Isaraeli butu mpokotesingkao tekuda-Ku hangano wineweuno kaedo, kanandiomo pau-Do i Ue.

³¹ Oo, kota andio mokotesingkaomo mosa'ono aroa ka tensilano tekuda-Ku mompu'u ipinontade hawe oleo andio, onaemo pu'uno asalakono Aku metadiakono inso i aro-Ku,

³² hangano luwuno mosa'oa anu wineweudo to Isaraeli ka to Yehuda anu mpokotesingkao tekuda-Ku, hangano ondae, luwuno mokole ka mia pinemota'udo, luwuno sando mpesomba ka nabido, to Yehuda ka palilino Yerusale.

³³ Dompebungkui Aku ka nahi domewolilio rupado ndi Ongkue. Maupo Kupaguru ira mpiha, nahi dobehe merongeo ke mperioo petunduhi.

³⁴ Domenaa ira pinesombaido anu mokoburu a raha anu nineeako montonda nee-Ku, mengkokoburutio.

³⁵ Domewangu ira po'ianga pompesombaiado Baala i Lembono Beni-Hinomi, ka dompesombaakono anado tama ka beine ndi Moloki, maupo nahi Kuhori meparentaako ndi ondae. Ka mbo'u nahi hori hina i laro aroa-Ku ka dompoweweu mokoburua andio, ranta mokontehalao Yehuda.

³⁶ Onaemo pu'uno, kanandiomo pau-Do i Ue, Ue Alado to Isaraeli, mongkona kota anu pinaumu pineweengakoomo a ngkaeno mokole i Babeli hangano ponai, mokoninggoa ka haki lele:

³⁷ Menteeano, Aku pumpu ira inso a luwuno wita, ba isua Kusiarawo ira hangano tekuda-Ku, tensilano tekuda-Ku ka mongkokongirino bamburu-Ku. Aku mokule ira a mpo'ianga andio ka weweu ira rodo dompo'ia.

³⁸ Ondae ira megagi bawaa-Ku ka Ongkue gagi Ue Alado.

³⁹ Aku moweeako ira asa aroa ka asa sala ntuwua, ka domedoito ndi Ongkue asa ntinuwu gagi moikoado ka anado umarino ondae.

⁴⁰ Aku mowutu pedandia nahina tampulaano saru ondae, nine nahi Aku mebungkui ira, tendeano moweweu moiko ndi ondae. Aku numaao i laro aroado dumoitoa-Kune, ka si dome'olai inso ndi Ongkue.

⁴¹ Hangano ondae ta mawongko aroa-Ku moweweu moiko ndi ondae. Aku weweu ira mentuwu mpetenunu i wita andio, tompaano aroa-Ku ka tompaano sumanga-Ku.

⁴² Hangano kanandiomo pau-Do i Ue: Kana Kupotiiomo a tongku andio luwuno masolaa anu mongkokongiri andio, kanatuumo Aku motiio ndi ondae luwuno moikoa anu Kudandiako ira.

⁴³ Mia ta umolio mbo'u lere i wita andio anu pinaumiu: Onae atuu po'ianga anu londa nahina mia ka pinotuwu, ka pineweengakoomo mbo'u a ngkaedo to Kasidimi.

⁴⁴ Mia ta umoliakono salaka luwuno lere, meburio wunta pe'olia, mentondonio ka mpopoboi sakosii i wita Benami, i horino Yerusale, a luwuno kotano Yehuda, a luwuno kota i Mentorukuno, a luwuno kota i Wita Pongku ka a luwuno kota i wita Nege. Hangano Aku momuleo teweweudo, kanandiomo pau-Do i Ue.”