Yehesikieli 44 - Wunta Mempori

Pewowa langkai sabaano oleo anu tetondo 44:1-3

¹ Ka i'amba wawa aku mekule a mpewowa langkai i bungkuno inso a mpo'ianga mempori, anu me'aro i sabaano oleo; pewowa langkai andio tetondo.

² Ka Do'amba i Ue mepau ndi ongkue, ”Pewowa langkai andio asalakono tetondo mpiha, si inungkahi ka si hina maupo te'asa mia mewinso inso i tu'ai, hangano Ondae i Ue, Ue Alado to Isaraeli, mewinso Iramo telaloio; onaemo pu'uno pewowa langkai atuu asalakono tetondo mpiha.

³ Butu mokole atuu, hangano onae mokole moiko ipentoro i ra'ai mongkaa kaanga i aro-Do i Ue. Mokole atuu ta mewinso telalo a bansalano pewowa langkai ka ta meluarako inso i tu'ai.”

Pontiso mongkona mesomba ka luwuno sando mpesomba 44:4-31

⁴ Ka i'amba wawa aku telalo a mpewowa langkai utara lumako i arono Raha Mempori. Kukitao, mentee ntu'u, Raha-Do i Ue buke maramba-Do i Ue. Ka ku'amba menggolontu mesomba.

⁵ Ondae i Ue mepau ndi ongkue, ”Hei anano mia, pekokoongakono temoiko, pepenteeo ka perorongeakono ntu'u luwuakoano anu Aku pauo ndi omue mongkona luwuno atorano Raha-Do i Ue ka luwuno songkano. Pekokoongakono temoiko pesalaa mewinso a Raha Mempori ka luwuno pesalaa meluarako a mpo'ianga mempori atuu.

⁶ Pauako iramo suku Isaraeli, suku puu mpe'ewa atuu: Kanandiomo pau-Do Ue Ala: Sompoomo luwuno wineweumiu anu mokoburu atuu, hei suku Isaraeli.

⁷ Omiu mpo'inee ira mia mehawe anu nahi dopetindi ka maupo nahi dompetindi aroa mpewinso a laro po'ianga mempori-Ku ranta Domengkokoburutio Raha-Ku tempono impopesombaako kaanga-Ku, onaemo taba ka rea, kaanga-Ku atuu. Hangano kanatuu saru luwuno wineweumiu anu mokoburu imehapuomo pedandia-Ku.

⁸ Omiu nahi mpekariao luwuno parewa-Ku anu mempori ka imentande ira ka impoweweu anu komiu meweweuo ndi Ongkue a mpo'ianga mempori-Ku.

⁹ Onaemo pu'uno, kanandiomo pau-Do Ue Ala: Nahina maupo te'asa mia inso a luwuno mia hawe anu nahi petindi ke maupo nahi petindi aroano, moiko ipewinso a laro po'ianga mempori-Ku, humbee sompo mia hawe anu kongko i tonga-tongado to Isaraeli.

¹⁰ Sine, luwuno to Lewi anu me'olaiako inso ndi Ongkue, tempono to Isaraeli mepansia inso ndi Ongkue mentondao luwuno lahumoado, ta tumembio hukuno.

¹¹ A mpo'ianga mempori-Ku ondaemo anu mpodagai a luwuno pewowa langkaino Raha Mempori ka mpopekakaako a laro Raha Mempori. Ondaemo anu mponsumbele pesomba tinunu ka pesomba sinumbele tiado tongku ka mpo'angga mpekakaako ira.

¹² Dompekakaako iramo tongku i arodo luwuno lahumoado, ka a nsuku Isaraeli megagi iramo watu tetidua, anu dumontai ira a laro sala mpoweweu. Onaemo pu'uno, mesumpa Aku mongkona ondae, kanandiomo pau-Do Ue Ala, nine ira mentembio hukudo ondaedo.

¹³ Nahi ira me'umpeda ndi Ongkue mpolempao anggaano sando mpesomba i aro-Ku ke maupo umpedaakono luwuno parewa-Ku anu mempori ke luwuno pesomba tedoa mempori; ira mentembio mokoburua hangano luwuno wineweudo anu mokoburu.

¹⁴ Ongkue pakosi ira gagi puu mpo'angga a Raha Mempori meweweuo luwuno pompekakaakoa ka luwuakoano anu kinere i tu'ai.

¹⁵ Sine, luwuno sando mpesomba to Lewi inso a inuleno i Sadoki anu mpo'angga a mpo'ianga mempori-Ku tempono to Isaraeli mepansia inso ndi Ongkue, ondaemo anu ira me'umpeda ndi Ongkue mpoweweu pesomba ka mpo'angga i aro-Ku pompesombaako ndi Ongkue taba ka rea, kanandiomo pau-Do Ue Ala.

¹⁶ Ondaemo anu ira mpewinso a laro mpo'ianga mempori-Ku ka me'umpedaakono meda-Ku ka domeweweuo pesomba ka mpo'anggaa-Kune.

¹⁷ Tempono ira mpewinso inso a luwuno pewowa langkaino kintala i larono, ondae asalakono mpopokona sangka lena. Nahi moiko dompopake sangka wulu bimba tempono dompo'angga a luwuno pewowa langkaino kintala i larono ke tempono dompoweweu pesomba a Raha Mempori.

¹⁸ Ondae asalakono pompake peboo ulu lena ka saluara lena, ka si dompopake peboo ntonga anu weweu ira memoko'iso.

¹⁹ Tempono dompeluarako melako a kintala i bungkuno tepohaweako ira bawaa-Do i Ue atuu, ondae asalakono melohuo sangka anu pinokonado tempono dompoweweu pesomba ka menaao a laro luwuno bolongko mempori, ka i'amba pinokona sangka susua, ka si domegagi mempori bawaa hangano sangkado sando mpesomba atuu.

²⁰ Wuudo nahi moiko ikineru ke pino'inee ondau, tendeano asalakono ipinole owowa.

²¹ Luwuno sando mpesomba si dompo'inu anggoro tempono dompewinso a kintala i larono.

²² Tuwu beine ke asa beine anu iponsuaomo tamano nahi moiko dome'alao gagi kombiado. Butu asa beine da moondo inso a inuledo suku Isaraeli ke asa tuwu beineno sando mpesomba moiko dome'alao.

²³ Ondae asalakono paguru ira bawaa-Ku mongkona teposisinggeno olono anu mempori ka anu nahi mempori ka pauako ira teposisinggeno olono anu mokoburu ka anu morina.

²⁴ I larono asa kara-kara ondae asalakono domegagi puu mpobitara ka mpobitara montonda luwuno atora-Ku. Ondae asalakono mpe'ini a luwuno songka ka pompakosi-Ku a luwuno oleo langkai-Ku ka mpokomemporio oleo Saba-Ku.

²⁵ Ondae si dome'umpeda a mia mate hangano tewala kanatuu ondae gagi memokoburu. Butu saru wata ngkoroino ama ke inedo, anado tama ke beine, aka ka uaido tama, aka ka uaido beine anu napi pekombia, moiko domengkokoburutiakono koroido.

²⁶ Umarino mepokomorina onae asalakono mesikori opitu oleo.

²⁷ A oleo ipewinso mbo'u a mpo'ianga mempori, a kintala i larono, ta moweweu pesomba a mpo'ianga mempori, onae asalakono mompesombaako pesomba po'onini halano, kanandiomo pau-Do Ue Ala.

²⁸ Ondae nahi dompohawe tia pusaka, hangano Ongkuemo tia pusakado. Si poweeako ira wita tiado i Isaraeli, hangano Ongkuemo tiado.

²⁹ Pesomba kaanga, pesomba po'onini hala, ka pesomba pontolosi sala, ondaemo anu asalakono mengkaano ka luwuno anu pinesusua i Isaraeli onaemo tiado.

³⁰ Anu lalu moiko inso a wua amba-ambano hapamo koa ka pesomba pinesusua inso a hapamo koa i olodo luwuno pesomba pinesusuamiu onaemo tiado sando mpesomba; saru mbo'u anu lalu moiko inso a ntarigu jelaimiu asalakono imeweeako ira sando mpesomba ka ipohawe ronso rahamiu.

³¹ Luwuno wata ngkoroi ke toreano kumaano kondehora lambaha, moiko manu-manu maupo kondehora, si domengkaano sando mpesomba.”