Yehesikieli 37 - Wunta Mempori

Pewanguno Isaraeli 37:1-14

¹ Pabawa-Do i Ue pabawai aku ka Dowawa aku meluarako molalo Penaa-Do. Donaa aku i tonga-tongano lembono, ka lembono andio bukeako hadio wuku.

² Dowawa aku melempa-lempa kumita ira wuku atuu, ka mentee ntu'u, porokono tedoa hadio a wawo lembono atuu; kitao, wuku atuudo tedoa mokari.

³ Mepau Ira ndi ongkue, ”Hei anano mia, polioke wuku andiodo wali pinotuwu?” Sumangki aku, ”Oo Ue Ala, Omiumo anu tumo'orio.”

⁴ Mepau Ira mbo'u ndi ongkue, ”Pauomo anu ta gagi mongkona wuku andiodo ka potaemo ndi ondae: Hei luwuno wuku anu mokari, rongeomo pau-Do i Ue!

⁵ Kanandiomo pau-Do Ue Ala a luwuno wuku andio: Kupoweekomiu penaa i laromiu, ka iwali mentuwu.

⁶ Aku weeakomiu luwuno ia, ka motuwuo ihimiu, saru tumutuwiakomiu kuli. Aku moweeakomiu penaa, ka iwali mentuwu. Ka komiu mento'orio nine Ongkuemo Ue.”

⁷ Ka ku'amba pauo anu ta gagi kana anu kupinarentaako. Kontongaaku pauo anu ta gagi, terongeomo uni, mentee ntu'u uni kekele, ka luwuno wuku atuu pada ntepo'asa saru anu susua.

⁸ Kontongaaku mepenteeo, kitao, hinao ia ndi ondae ka ihi mbo'u tuwu, ka i'amba kuli tumutuwio, sine napi hina penaado.

⁹ Pau-Do ndi ongkue, ”Pauomo anu ta gagi a mpenaa atuu, pauomo anu ta gagi, hei anano mia, ka potaemo a mpenaa atuu: Kanandiomo pau-Do Ue Ala: Hei penaa, aiwamo inso a opaa siuno angi, ka pepuurimo i larodo mia anu mempinepate atuu, ka dowali mentuwu.”

¹⁰ Ka ku'amba pauo anu ta gagi kana anu peparenta-Do ndi ongkue. Penaa mbo'u atuu mewinsoomo i larodo, onaemo ka dowali mentuwu ka mpelandaakono karudo, asa bawaa sorodadu anu tedoa hadio.

¹¹ Pau-Do ndi ongkue, ”Hei anano mia, wuku andiodo onaemo luwuno suku Isaraeli. Mentee ntu'u, ondaedo mpotae: Luwuno wukumami mokariomo ka pomperorohiamami tampulaomo; te'otuomo tuwumami.

¹² Onaemo pu'uno, pauomo anu ta gagi ka potaemo ndi ondae: Kanandiomo pau-Do Ue Ala: Mentee ntu'u, Ku'ungkahio luwuno kaburumiu ka wangu komiu inso i larono, hei bawaa-Ku, ka Aku wawa komiu i wita Isaraeli.

¹³ Komiu mento'orio nine Ongkuemo Ue, tempono Ku'ungkahi ira kaburumiu ka wangu komiu inso i larono, hei bawaa-Ku.

¹⁴ Aku weeakomiu Penaa-Ku, onaemo ka iwali mentuwu ka Aku numaa komiu i witamiu. Ka komiu mento'orio nine Ongkuemo, Ue, anu pauo ka weweuo, kanandiomo pau-Do i Ue.”

Poparentaa Isaraeli ka Yehuda wali pino'asa 37:15-28

¹⁵ Ka i'amba haweomo pau-Do i Ue ndi ongkue,

¹⁶ ”Hei anano mia, alaomo asa mpole keu ka burio i wawono: Tiano Yehuda ka to Isaraeli, tepo'asano. Ka i'amba alaomo asa mpole keu anu susua ka burio i wawono: Tiano i Yusupu, keu Eparai, ka luwuno suku Isaraeli anu tepo'asa saru onae.

¹⁷ Po'asaomo oruano gagi asa keu, ranta oruano gagi asa a ngkaemu.

¹⁸ Tewala mia pe'asa tongkumu mpesikeno ndi omue: Nahi upepatindake pauakami, hapa pengkonaano andio ndi omue,

¹⁹ potaemo ndi ondae: Kanandiomo pau-Do Ue Ala: Ku'alao keuno i Yusupu, anu a ngkaeno i Eparai saru luwuno suku Isaraeli, tepo'asano, ka mo'asao saru keuno Yehuda. Aku mokogagi ira asa keu ranta ka domegagi asa a ngkae-Ku.

²⁰ Kontongaano keu anu uburi ira atuu kongko a ngkaemu i arodo,

²¹ pauomo ndi ondae: Kanandiomo pau-Do Ue Ala: Mentee ntu'u, Aku umala ira to Isaraeli inso i olodo luwuno tongku ba isua domelako. Aku pumpu ira inso a luwuno siuno ka wawa ira i witado.

²² Aku mokogagi ira asa tongku i witado, a wawo luwuno ntorukuno Isaraeli, ka asa mokole parenta ira luwu. Ondae nahi domegagi mbo'u orua tongku ka nahi tetia mbo'u gagi orua poparentaa.

²³ Ondae nahi domengkokoburutiakono mbo'u koroido luwuno lahumoa ke pinesombaido anu mokoburu ke luwuno polimpaido. Sine, Aku motola ira inso a luwuno wineweudo anu pansia anu hangano onae ka dontehala, ka mokomorina ira, onaemo ka domegagi bawaa-Ku ka Aku gagi Ue Alado.

²⁴ Tetenaa-Ku i Daudi ta gagi mokoledo, ka luwudo ta hinao asa puu mpopakambi. Ira mentuwu montonda luwuno atora-Ku ka mpetenunu meweweuo luwuno pompakosi-Ku.

²⁵ Ira mpo'ia i wita anu Kuweeakono tetenaa-Ku i Yako, i sua dompo'ia uempu'udo. Ondae saru luwuno anado maupo ana'ue ka ana'ue ntukodo ira mpo'ia i ra'ai ranta nahina tampulaano ka tetenaa-Ku i Daudi gagi mokoledo ranta nahina tampulaano.

²⁶ Aku moweweu pedandia manangai saru ondae, ka atuu ta gagi pedandia anu mo'ia mpiha saru ondae. Aku rumonso ira ka weweu ira mehadio ka meweengakono po'ianga mempori-Ku i tonga-tongado ranta nahina tampulaano.

²⁷ Po'ianga-Ku mbo'u ta kongko ndi ondae ka Aku gagi Ue Alado ka ondae gagi bawaa-Ku.

²⁸ Ka luwuno tongku ira mento'orio nine Ongkuemo, Ue, mokomemporio Isaraeli, i tempono po'ianga mempori-Ku kongko i tonga-tongado ranta nahina tampulaano.”