Yehesikieli 28 - Wunta Mempori

Pinau anu ta gagi umewaio mokole i Tirusi 28:1-10

¹ Ka haweomo pau-Do i Ue ndi ongkue,

² ”Hei anano mia, pauakonomo mokole i Tirusi: Kanandiomo pau-Do Ue Ala: Hangano omue mompelangka-langkai ka motae: Ongkue andio Ue Ala! Ongkue mentoro a ngkadera poparentaa-Do Ue Ala i tonga-tongano tahi malua. Kahinaano omue mia, komba Ondae Ue Ala, maupo aroamu numaao koroimu mengkena saru Ondae Ue Ala.

³ Menteeano ponto'orimu anu mentee lumaloio ponto'ori menteeno i Danieli; nahina rahasia anu tetutuwi ndi omue.

⁴ Saru ponto'ori mentee ka pokonto'oriamu omue mohawe kaeaa. Wulaa ka salaka upumpu ira a laro ponaapa arataamu.

⁵ Saru pandemu ntu'u mebalu-balu omue mokohadioo kaeamu, ka hangano atuu omue gagi mompelangka-langkai.

⁶ Onaemo pu'uno kanandiomo pau-Do Ue Ala, Hangano aroamu numaao koroimu mengkena saru Ondae Ue Ala,

⁷ ka, mentee ntu'u, Aku wawa ira mia hawe umewaiko, tongku anu lalu lambaha, anu ira mebutao ponaido umewaio ponto'ori menteemu anu inunde-unde, ka marambamu kinokoburuti.

⁸ Omue dompotiiko a laro ngkaburu, omue mate kana mia mate pinepate a ntonga ntahi malua.

⁹ Nde da komotaeke, ’Ongkue andio Ue Ala!’ i arodo anu mpepateko? Kahinaano a ngkaeno anu tumoboko omue onaemo mia, komba Ondae Ue Ala.

¹⁰ Omue komate kana mia nahi petindi hangano kaedo mia mehawe. Hangano Ongkue anu pauo, kanandiomo pau-Do Ue Ala.”

Penani ponsabangi mongkona mokole i Tirusi

¹¹ Ka i'amba haweomo pau-Do i Ue ndi ongkue,

¹² ”Hei anano mia, penaniakonomo ponsabangi mongkona mokole i Tirusi ka potaemo ndi onae: Kanandiomo pau-Do Ue Ala: Omuemo pandirino luwuno anu moiko, buke ponto'ori anu mentee ka tedoa tekosi.

¹³ Omue i Paradesi, bonde-Do Ue Ala meramba-rambaako luwuno watu paramata anu masuli olino: yasapisi motaha, kerisoli, ka yasapisi molowulu, paramata pirusu, kerisopara, ka nepiri, lasuaradi, watu rea, ka malakiti. Petakoano wineweu inso a wulaa ka pinatinda a oleo upinokogagi.

¹⁴ Omuemo kerubi, puu mpodagai anu inurapi, kanandiomo Kupakosiko; omue kongko a ntorukuno mempori-Do Ue Ala ka melempa-lempa a laro watu me'api.

¹⁵ Omue nahina tataamu a laro mpelelumu mompu'u a oleo upinokogagi ranta ka ihinawe molengkua ndi omue.

¹⁶ Saru pebalu-balumu anu langkai omue bukeako pompokonsii ka omue moweweu hala. Ka Kutadiko inso a ntorukuno-Do Ue Ala, Kupepateko, hei kerubi puu mpodagai, inso a laro watu me'api.

¹⁷ Omue mompelangka-langkai hangano tekosimu, ponto'orimu anu mentee uropuo hangano marambamu. I tolino Kupetadiakomu, a luwuno mokole Kupeweengakomu gagi kikitaano matado.

¹⁸ Saru hadiono salamu ka molengkua a laro mpebalu-balumu omue lumimpaio memporino po'ianga memporimu. Ka Kupolangao api inso i tongamu anu ta kumaako ka upingko. Kupo'ineeko gagi awu i wawontolino i arodo luwuno anu mengkitako.

¹⁹ I olodo luwuno tongku luwuno anu tumo'oriko ntededengke mengkitao teweweumu. Poko'ariano tuwumu mongkokongiri ka tampulakomo mpiha.”

Pinau anu ta gagi umewaio Sidoni

²⁰ Haweomo pau-Do i Ue ndi ongkue,

²¹ ”Hei anano mia, po'aroomo rupamu i Sioni ka pauomo anu ta gagi umewaio

²² ka potaemo: Kanandiomo pau-Do Ue Ala: Kitao, Ongkue gagi ewaimu, hei Sidoni, ka Aku mopokitao maramba-Ku i tonga-tongamu. Ira mento'orio nine Ongkuemo Ue, i tempono Kudontaiakono pohuku ka tumisoo mempori-Ku ndi onae.

²³ Aku mompotii haki lele ndi onae ka rea ta waa a luwuno salano. Mia ira memate ntebangku i tonga-tongano hangano ponai anu hawe inso a mpehori-horino umewaio. Ira mento'orio nine Ongkuemo Ue.

²⁴ Nahi ta hina mbo'u a nsuku Isaraeli mia inso i olodo luwuno pehori rahano anu mokongkodei ira, gagi rui anu meduhu ke tolungo anu mompokomopoe. Ira mento'orio nine Ongkuemo Ue Ala.

²⁵ Kanandiomo pau-Do Ue Ala: I tempono Kupumpu ira suku Isaraeli inso i olodo luwuno suku tongku tesiarawoado ka tumisoako ira mempori-Ku i arodo luwuno tongku, ka ira mpo'ia i witado anu Kuweeakonomo tetenaa-Ku i Yako.

²⁶ Ira merodo mpo'ia i ra'ai, mpowangu raha, ka mpoweweu lere anggoro. Humbee, ira merodo mpo'ia i ra'ai i tempono Kudontaio pohuku a luwuno pehori rahano anu mpokongkodei ira. Ira mento'orio nine Ongkuemo Ue, Ue Alado.”