Yehesikieli 1 - Wunta Mempori

LUWUNO PINAU ANU TA GAGI UMEWAIO ISARAELI LAMORO 1–24 Nabi kumitao maramba-Do i Ue

¹ A nta'u kotolu pulu, a wula ko'opaa tanggala olima wula atuu, tempono kuperongaako ira mia mentinadi kongko i wiwi Ngkoro Kebari, te'ungkahiomo langi ka kukita ira pongkita mongkona Ondae Ue Ala.

² A ntanggala olima wula atuu, a nta'u ko'olima umarino tinadi mokole Yoyakimi,

³ haweomo pau-Do i Ue ndi sando mpesomba Yehesikieli, anano i Busi, i witado to Kasidimi i wiwi Ngkoro Kebari, ka i ra'aimo pabawa-Do i Ue lumimbuo.

⁴ Ka ku'amba kumitao, mentee ntu'u, angi mokora mepuuri inso i utara saru asa boto seru langkai me'ihi api anu tesosangkilo anu ilimbuo wanta. I tonga-tongano api atuu tengkita asa kana suasa mangkilo.

⁵ Inso i tonga-tongano mbo'u me'umbaako hapa kana anu tuwu merupa opaa. Kanandiomo tadedo: ondae kana mia,

⁶ sine singge hinao opaa rupano ka singge hinao mbo'u opaa panino.

⁷ Karudo moleo ka pelengkarudo kana kukuno ana nsapi. Luwuno karu andio mangkilo kana mala anu da sarai ihinahi.

⁸ A opaa horido, i totono luwuno panino, tengkita kaeno mia. Rupa ka panido opaa ira kanandio:

⁹ panido ntepodanggi. Nahi dompewolili tempono dompelempa, singge melempa moleo i arono.

¹⁰ Rupado tengkita kanandio: Opaa ira merupa mia i arono, rupano singa i koana, rupano sapi i manggali, ka rupano rajawali i bungkuno.

¹¹ Kanandiomo rupado. Luwuno panido domewileo kontahane i wawono. Singge anu tuwu hinao asa pasa panino anu pada tepodanggi ka asa pasa pani anu susua tumutuwio koroido.

¹² Singge melempa moleo i arono. Ba isua te'aroano penaa atuu ta lumako, i ra'aimo domelako; nahi dompewolili tempono dompelempa.

¹³ I tongado anu mentuwu atuu tengkita asa kana waro api anu melanga, kana pansona, anu melelu ngkoraane ngkoramai i olodo anu tuwu atuudo. Api atuu mewanta ka inso a api atuu koliki mpesosawu.

¹⁴ Anu tuwu atuudo mpenee ngkoraane ngkoramai kana koliki.

¹⁵ Kukitao, mentee ntu'u, hinao asa roda a wawo wita i horino nte'osa anu tuwu saru opaa rupa atuu.

¹⁶ Rupano luwuno roda atuu ka tadeno tengkita kana mangkilono paramata pirusu ka opaa ira mpe'asa rupa. Rupa ka tadeno kana roda i tonga-tongano roda.

¹⁷ Tempono melempa luwuno roda atuu polio te'aro a opaa nsala; nahi dompewolili tempono dompelempa.

¹⁸ Ondae hinao gorino anu mantande ka mompokodoito; lumimbuo gorino anu opaa atuu bukeako mata.

¹⁹ Tempono dompelempa anu tuwu atuu, luwuno roda atuu mbo'u melempa i horido; ka luwuno anu tuwu atuu tetande inso a wita, luwuno roda atuu metonda tetande.

²⁰ Te'aro isua penaa atuu ta lumako, i ra'aimo domelako, ka luwuno rodano meronga tetande, hangano penaado anu tuwu atuu kongko i larono luwuno rodano.

²¹ Tempono dompelempa anu tuwu atuu, luwuno roda atuu melempa; tempono dompenaa-naa, luwuno roda atuu menaa-naa; ka tempono dontetande inso a wita, luwuno roda atuu meronga tetande saru ondae; hangano penaado anu tuwu atuu kongko i larono luwuno rodano.

²² A wawo uludo anu tuwu atuu hinao anu kana longkuno langi, anu tengkita kana mangkilono seru baku anu mompokodoito, tepadindi a wawo uludo.

²³ I totono longkuno langi atuu panido tewile moleo, anu asa tepodanggi saru anu susua. Singge hinao asa pasa pani anu tumutuwio koroido.

²⁴ Tempono dompelempa, kurongeo unino panino kana unino uwoi mentoa anu u'uru, kana suara-Do Anu Tedoa Pabawa, kana suara magagado sorodadu. Tempono dompenaa-naa, ipo'inee panino telupe.

²⁵ Ka i'amba terongeomo suara i wawono longkuno langi anu kongko a wawo uludo. Tempono dompena-naa, panino telupe.

²⁶ Iwawono longkuno langi anu iwawono uludo, hinao asa anu kana tadeno kadera poparentaa, tengkita kana paramata lasuaradi. I wawono anu kana tadeno kadera poparentaa atuu hinao asa anu tengkita kana rupano mia.

²⁷ Inso a hapa anu kana tadeno tongano hawe i wawono kukitao kana asa suasa mangkilo ka kana api anu binorungi limbu-limbu; ka inso anu kana tadeno tongano hawe i totono kukitao kana api ilimbuo wanta.

²⁸ Kana longkuno toro'ue, anu tengkita a nseru tempono usa, kanatuumo tengkita wanta anu lumimbuo. Kanatuumo tengkita rupano maramba-Do i Ue. Tempono kukitao ongkue menggolontu mesomba, ka ku'amba rumongeo suara-Do anu mepau.