WINEWEUDO TINENA 3 - Wunta Mempori

I Peturu mompokotompa mia puungku 3:1-10

¹ Pohona tamo ronga tempono pekakaia, onaemo langku otolu owowa oleo, mewuatakoomo i Peturu ka i Yohane a Raha-Do Ue Ala.

² I tu'ai hinao aasa tama, anu puungku tampu'uno ihina ranta onae asalakono kinati. Sompo-sompo oleo mia atuu ninaa umpeda a mpewowa langkaino Raha-Do Ue Ala, anu meneeako Pewowa Langkai Tekosi, ka ipo'ema pontulungido mia anu mpewinso a Raha-Do Ue Ala.

³ Mansano kumitao mia atuu, nine i Peturu ka i Yohane ira mewinso a Raha-Do Ue Ala, mo'emaomo pompoweedo.

⁴ Mengkita ira ndi onae ka ipotae i Peturu, ”Pengkitamo ndi omami.”

⁵ Ka i'amba mia atuu mengkita ndi ondae saru momperorohi ta hina hinaweno inso ndi ondae.

⁶ Sine motae i Peturu, ”Wulaa ka salaka nahina ndi ongkue, sine hapa anu hina ndi ongkue, kuweeakomu: A nee-Do i Yesu Kerisituu, to Nasare atuu, pelempamo!”

⁷ Ka i'amba uminio kae ngkoanano mia atuu ka ipokowalio mentade. I tempo koa atuu morosoomo karuno mia atuu.

⁸ Melonsoomo ka ipentade ka i'amba melempa ngkoraane ngkoramai ka itonda ira mewinso a Raha-Do Ue Ala, melempa ka ipelonso-lonso saru umunde-unde Ira Ue Ala.

⁹ Luwuno palili atuu mengkitao ipelempa saru umunde-unde Ira Ue Ala,

¹⁰ ka do'amba mento'orio onae mia anu wela mentoro mo'ema pontulungi a Mpewowa Langkaino Raha-Do Ue Ala anu nineeako Pewowa Langkai Tekosi, onaemo ka domengkohali-hali ka ntekokodoho mongkona hapa anu gagiomo ndi onae.

Pontutuluno i Peturu a Ntambino i Salomo 3:11-26

¹¹ Hangano mia atuu kongkono tumonda ira i Peturu ka i Yohane, onaemo ka dome'aiwa luwuno mia hadio anu tedoa mengkohali-hali atuu menggowo ira i tambino anu nineeako Tambino i Salomo.

¹² Ikita ira i Peturu mia hadio atuu ka i'amba motae, ”Hei to Isaraeli, tembio ka imengkohali-haliakono anu gagi atuu ka tembio ka impengkita ndi omami kana-kana omami weweuo mia andio ka ipelempa hangano pabawa ke pesombamami ntu'u?

¹³ Ondae Ue Alano i Burahima, i Saki ka i Yako, Ue Alado uempu'uto Dopokomaramba Iramo Tetenaa-Do, onaemo Ondae i Yesu anu pineweengakomiu ka nahi mentarima Ira i arono i Pilatu, maupo pohaweno i Pilatu, nine Ondae asalakono pinotola.

¹⁴ Sine nahi imentarima Ira Anu Mempori ka Mentee, saru me'ineheakono asa mia anu mompepate gagi pompowee ndi omiu.

¹⁵ Kanandiomo Ondae, Petewawa a ntuwua, impepate Iramo, sine Dowangu Iramo Ue Ala inso i olodo mia mate; ka mongkona luwuno atuu omamimo sakosii.

¹⁶ Ka hangano pompe'ala-ala a Nee-Do i Yesu, ka Neemo atuu mokorosoo mia anu kinitamiu ka anu tino'orimiu andio; ka pompe'ala-alamo atuu anu mokotompao mia andio i aromiu luwu.

¹⁷ Hei luwuno pepaekompo, kuto'orio nine mpoweweu komiumo kanandio hangano nahi imento'orio, mengkena kana luwuno petewawamiu.

¹⁸ Sine kanandiomo pesalaa-Do i Ue umihiio hapa anu Dopauomo se'eluno anu domempauo nabi-Do, onaemo nine i Mesia anu tinena-Do asalakono teweweu nsa'o.

¹⁹ Onaemo pu'uno impokonto'oriomo ka intepidimo, ka i'inonini halamiu,

²⁰ ka Dopoweeakomiu i Ue tempo koloaa, ka tumena Ira i Yesu, anu se'eluomo imempinakosiako gagi i Kerisituu.

²¹ Ondae i Kerisituu atuu asalakono mo'ia i suruga hawe a tempo ka iwali pinokomoiko luwuakoano, kana anu pinau-Do Ue Ala anu pinohawedo nabi-Do anu mempori i ndi'upua.

²² Kombake ipauomo i Musa: Ondae Ue Ala Ira montenaakomiu aasa nabi inso i olodo pepaekompomiu, mengkena kana ongkue: Imperorongeakono a luwuakoano anu ta pauakomiu.

²³ Ka ta gagi, nine luwuno mia anu nahi perorongeakono nabi atuu, ta rinopu inso a bawaato.

²⁴ Ka luwuno nabi anu hori mpepau, mompu'u inso ndi Semueli, ka umarino onae, mpompau iramo anu ta gagi mongkona tempo andio.

²⁵ Omiumo anu mehaweo luwuno pinau anu ta gagi atuu ka mpohawe tia a mpedandia anu wineweu-Do Ue Ala saru uempu'uto, tempono Dopepau ndi Burahima: Hangano inulemu luwuno tongku i wawontolino ira merinonso.

²⁶ Ka omiumo amba-ambano Dowanguakomiu Tetenaa-Do ka tumena Ira ndi omiu, ka Doronso komiu saru wawa komiu singge mia mepokule inso a luwuno wineweumiu anu mosa'o.”