Winali 1 - Wunta Mempori

Pe'oliwino i Musa anu amba-ambano 1–4 Pepuu mpau

¹ Ndiomo pau anu pinohaweno i Musa a luwudo to Isaraeli i asatowano koro Yarade, i pada one, i Araba-Yarade, tepo'aro saru Supi, olono Parani ka Topeli, Labani, Haseroti ka Di-Sahabi.

² Pelempaa inso i Torukuno Hore hawe i Kadesi-Baranea, lumaloo sala mentorukuno Seiri, mo'ala tempo hopulu ka asa oleo.

³ A ntanggala aasa wula hopulu ka aasa ta'u pato pulu, i Musa mepau a nto Isaraeli, menunu saru luwuno anu Doparentaakono i Ue ndi onae tiado.

⁴ Mongkona atuu, umarino numangio i Sihoni, mokoledo to Amori, anu mo'ia i Heberoni, ka i Ogo, mokole i Basani, anu mo'ia i Asitaro, umpeda i Ederei.

⁵ I asatowano koro Yarade, i wita Moabi, i Musa mompu'u popauo songka Taura kana i totono andio.

Parenta mewinso a wita pedandia

⁶ Mepau Ira i Ue, Ue Alato ndi ontae i Hore, kanandio, ”Tehineomo impo'ia i torukuno andio.

⁷ Impelungkamo ka imelakomo a mentorukuno witado to Amori ka a luwuno daera petengi-tengino i Araba-Yarade, i Mentorukuno, i Sepela, i Wita Nege ka i wiwi ntahi, onaemo witado to Kana'a, imelako mbo'u i Libano hawe a ngkoro Eparata, korono anu langkai atuu.

⁸ Kitaomo, Kupopokitaakomiu wita atuu i aromiu. Impewinsokio ka impetorokiomo wita anu dinandi-Do i Ue saru sumpa ndi ondae i Burahima, i Saki ka i Yako, uempu'umiu ta wineeako ndi ondae ka inuledo.”

Pompotoroa petewawa

⁹ I tempo atuu mepau aku ndi omiu, kanandio, ”Nahi kupolio asa-asaku tumembio anggaa wawa komiu.

¹⁰ Ondae i Ue, Ue Alamiu weweu komiumo mehadio. Menteeano, kanandio-andio kana komiumo anano wula i langi hadiono.

¹¹ Po'ineeomo Ondae i Ue, Ue Alado uempu'umiu, tumiangio hadiomiu meluka asa nsowu mbo'u ka rumonso komiu kana anu dinandi-Do ndi omiu.

¹² Sine kana'umpe aku polio asa-asaku tumembio anggaa a masusaamiu, tinembimiu ka kara-karamiu?

¹³ Impontisomo inso a luwuno sukumiu luwuno mia anu pande mompewowolo, molino pinewowolono ka anu horiomo metewawa. Aku motoro ira gagi petewawamiu.”

¹⁴ Ka i'amba mesangki aku, ”Hapa anu pinaumiu kai wineweu atuu lano moiko.”

¹⁵ Umarino atuu ku'ala ira luwuno petewawa sukumiu, luwuno mia anu pande mpopewowolo ka hori iramo mpetewawa, ka kupotoro ira gagi petewawamiu. Ondae gagi petewawa asa nsowu mia, asa etu mia, lima pulu mia ka hopulu mia, saru mbo'u luwuno anu mpo'angga susua tiano sukumiu.

¹⁶ I tempo atuu kuparenta ira luwuno puu mpobitaramiu, kanandio, ”Imperioomo kara-kara i olodo pepaekompomiu ka impoweeako ira pomputusi anu moleo, moiko i larono kara-karano asa mia saru pepaekompono maupo saru mia hawe anu kongko ndi onae.

¹⁷ Si mpompesusua mia i larono impompau kara-kara. Moiko mia kodei tuwuno maupo mia langkai tuwuno, asalakono imperorongeakono. Si medoito maupo ndi semamokoa, hangano pebitaraa pabawa-Do Ue Ala. Sine, kara-kara anu impemotungkoo lahi, asalakono imewawao ndi ongkue, ka kuperorongeakono.”

¹⁸ Kanatuumo i tempo atuu kuparentaa komiu luwuno anu asalakono imeweweuo.

Hopulu ka orua puu mpopadaso

¹⁹ Ka to'amba mpelungka inso i Torukuno Hore ka tompelempa lumaloo luwuno pada one anu malua ka mongkokongiri anu imengkitaomo, te'aro i mentorukuno witado to Amori, kana anu Doparentaa kita i Ue, Ue Alato. Ka to'amba mehawe i Kadesi-Baranea.

²⁰ Mepau aku ndi omiu, ”Mehawe komiumo a mentorukuno witado to Amori, anu Doweeakita i Ue, Ue Alato.

²¹ Kitaomo, Ondae i Ue, Ue Alamiu mopokitao wita atuu i aromiu. Imelako ka impetorokiomo, kana anu Dopauakomiu i Ue, Ue Alado uempu'umiu. Si medoito ka si ntelusa aroa.”

²² Ka i'amba luwumiu merangkuhi aku, ka impotae, ”Aiwamo tompotena ba te'opia mia mese'elungi kita ka domemparesaa kita wita atuu, ka dompowawa lele ndi ontae mongkona sala anu kita melaloo ka luwuno kota anu kita merangkuhio.”

²³ Mongkona atuu kupemoikoo. Gagi, kubiniki ira hopulu ka orua mia inso i olomiu, asa mia inso a sompo suku.

²⁴ Mpelungka ira ka dompelempa te'aro mentorukuno, ka domehawe i lembono Esikoli, ka domemparesao wita atuu.

²⁵ Mpo'ala ira wua ngkeu i wita atuu ka domewawao ndi ontae. Mpowawa ira mbo'u lele ndi ontae, kanandio, ”Moiko ntu'u wita anu Doweeakita i Ue, Ue Alato.”

²⁶ Sine, nahi mebehe mpelempa melako i ra'ai; ime'ewaio parenta-Do i Ue, Ue Alamiu.

²⁷ Mpewuruki komiu i laro kemamiu saru mpotae, ”Hangano Do'o'aliaakita i Ue, onaemo ka Dowawa kita mpeluarako inso i wita Masiri Ira meweengako kita a ngkaedo to Amori, ka domeropu kita.

²⁸ Isua mbo'u kita melako? Ondae pepaekompoto meweweuomo aroato ntelusa, dompotae: Mia atuudo melolangkai ka me'ondau irapo sekono ontae, luwuno kotado langkai ka luwuno bente pekorahakoa hawe i langi, ka kimengkita ira mbo'u to Enaki i ra'ai.”

²⁹ Umarino atuu mepau aku ndi omiu, ”Si mpondende kasi medoitoako ira.

³⁰ Ondae i Ue, Ue Alamiu melempa i aromiu. Ondaemo anu ta meteaakomiu, mengkena kana anu wineweu-Do ndi omiu i wita Masiri i arono matamiu,

³¹ ka i pada one. I ra'aimo imengkitao nine Ondae i Ue, Ue Alamiu baba komiu kana asa mia mobaba anano, asangkeu sala anu tinondamiu, ranta kai mehawe a mpo'ianga andio.”

³² Maupo kanatuu, nahi mpe'ala-ala Ira i Ue, Ue Alamiu,

³³ anu melempa i aromiu a mpelempaamiu. Ondaemo anu mo'ungkeakomiu ba isua komiu mpekema, i tempono wongi saru api ka i tempono meene saru seru, mopokitaakomiu sala anu asalakono komiu mentondao.

Pohuku hangano nahi dompope'ala-ala to Isaraeli

³⁴ Mansa-Do rumongeo i Ue kabaratamiu atuu, gagi Ira tekuda ka mesumpa,

³⁵ ”Nahina maupo te'asa mia inso a luwuno mia andio, asa ntuwua anu lambaha andio ta kumitao wita moiko, anu Kudandiakono sumpa ira mewineeako uempu'umiu.

³⁶ Butu i Kalebi anano i Yepune anu ta kumitao. Ndi onae ka inuleno Aku weeakono wita anu linandano atuu, hangano moleo aroano tumonda Ira i Ue.”

³⁷ Maupo ndi ongkue, tekuda Ira i Ue hangano omiu, ka mepau Ira, ”Omue mbo'u nahi komewinso i ra'ai.

³⁸ I Yosua anano i Nunu, puu pompekakaakomu, onaemo anu ta mewinso i ra'ai. Pokorosoakono aroano, hangano onaemo anu ta wawa ira to Isaraeli mpoko'alao wita atuu.

³⁹ Ka anamiu anu da kodei, anu pinaumiu ta gagi rontuado iwali, luwuno anamiu anu kanandio-andio napi domponto'ori mongkona anu moiko ka anu mosa'o, ondaemo anu ira mpewinso i ra'ai. Ndi ondaemo Aku meweengakono ka ondaemo anu ira mpe'ueo.

⁴⁰ Sine omiu, impewolilimo, mpelungka melako i pada one te'aro i Tahi Teberau.”

Ponsapoi i selata nahi gagi

⁴¹ Ka i'amba mesangki aku, impotae, ”Ntehala kamimo ndi Ondae i Ue. Kami melako mpetea, kanamo anu Doparentaa kami i Ue, Ue Alato.” Onaemo sompo mia i olomiu mompesamba sangka peteano, hangano imengko'aro-aroa moruana lumako me'aro a mentorukuno.

⁴² Sine Ondae i Ue mepau ndi ongkue, ”Pauako ira: Si domelako kasi dompetea, hangano nahi Aku kongko i tonga-tongado, te'ingka domenangi komiu iwalimiu.”

⁴³ Gagi, mepau aku ndi omiu, sine nahi mperorongeakono. Ime'ewaio parenta-Do i Ue. Memosia komiu lahi melako nte'aro i mentorukuno.

⁴⁴ Ka do'amba to Amori anu mpo'ia i mentorukuno atuu mpeluarako sumapoi komiu. Domelulu komiu kana bawaano hoani ka donangi komiu inso i Seiri hawe i Horoma.

⁴⁵ Ka i'amba mpekule ka mpengese i aro-Do i Ue, sine nahi Doperorongeakono i Ue pengesemiu ka nahi doperiokomiu.

⁴⁶ Onaemo kai mpo'ia tehine ntu'u i Kadesi, i larono tempo impo'ia i ra'ai.