TITU 1 - Wunta Mempori

Tabea 1:1-4

¹ Inso ndi Paulu, tetenaa-Do Ue Ala ka tinena-Do i Yesu Kerisituu ka ipekakaakono pompe'ala-alado mia bininiki-Do Ue Ala ka ponto'ori menteea kana anu mengkaa a laro mpesombato,

² ka me'empehiako pomperorohia a ntuwua anu nahina tampulaano anu se'eluno pompu'uano tempo Dodandiomo Ue Ala anu nahi Dopegaupi,

³ ka a tempo anu po'ehe-Do Dopokomengkaaomo pau-Do a pompalelea Lele Mawongkoa anu kupine'ala-alaako menunu saru petena-Do Ue Ala, Puu pongkaduduito.

⁴ Hawe ndi Titu, anu pine'anaku ntu'u montonda pompe'ala-alato luwu: pe'aroa ka rodoa inso ndi Ondae Ue Ala Ama ka Ondae i Kerisituu Yesu, Puu pongkaduduito, kumongkomiko.

Anggaano i Titu i Kereta – atora a penatua, pomparesa bawaa 1:5-16

⁵ Kubintakomo i Kereta saru tinoo andio, ka upatindao hapa anu napi umari ka upakosi ira penatua i sompo kota, kana anu ku'oliwiakomu,

⁶ onaemo mia anu nahina tataado, anu butu aasa beinedo, anu anado mentuwu mpompe'ala-ala ka nahi dompinokotuluri hangano tuwu mosa'o gaudo ke tuwu nahi te'atora.

⁷ Hangano gagi puu mpo'atora a raha-Do Ue Ala aasa petewawa bawaa asalakono nahina tataano, nahi pompelangka-langkai, komba marante'ise, komba marampo'inu, komba marantekuda, nahi pedokoli,

⁸ tendeano ineheno metotoka, ineheno anu moiko, pande mosongka, moleo, mempori, mokompabawaio koroino

⁹ ka me'ini a mpau anu mentee, anu menunu saru pompaguru anu mentee, ka ipolio mompatudu mia me'empehiako pompaguru atuu ka polio tumisoako ira salado anu me'ewaio.

¹⁰ Hangano hadioomo mia mentuwu nahi te'atora, tamoako i olodo anu mpe'ini a songka metindi. Saru mpepau anu nahina tuduno domensosaeloo pinewowolodo.

¹¹ Mia anu kanatuudo asalakono kinomu wiwido, hangano hadio sombori dompokomarisuako ira pompaguru anu nahi mentee ka dompohawe ura anu mompokoko'ii.

¹² Asa mia inso ndi ondae, nabido ondaedo, horio mepau, ”Lano to Kereta mpegaupi, kondehora lambaha, modoko ka moluwe.”

¹³ Ponsakosii atuu mentee. Onaemo pu'uno kuahako iramo ntu'u ka domegagi mentee a pompe'ala-ala,

¹⁴ ka siimo domperioo mbo'u tutu-tutuludo to Yahudi ka luwuno songkano mia anu pansia inso a menteea.

¹⁵ A mia mempori luwuno mempori; sine a mia mokoburu ka a mia nahi pompe'ala-ala maupo te'asa nahina anu mempori, hangano moiko pinewowolo maupo po'o'aroado mokoburu.

¹⁶ Dompotae domento'ori Ira Ondae Ue Ala, sine a mpoweweudo domehapu Ira. Memokoburu ira ka buunto ka nahi domempolio mpoweweu te'asa anu moiko.