Tegagia 22 - Wunta Mempori

Pompe'ala-alano i Burahima inarahako

¹ Umarino gagi luwuno atuu, Ondae Ue Ala umarahakono i Burahima. Mepau Ira ndi onae, ”Burahima,” ka i'amba sumangki, ”Oo Ue.”

² Mepau Ira, ”Alaomo i Saki, anamu anu asa-asano, anu pinehohawamu, lakomo i wita Moria ka pesombaakonomo i ra'ai gagi pesomba tinunu i asa torukuno anu Aku pauakomu.”

³ Tisomono mo'oru i Burahima mewangu, lumampio kalideno ka ipoboio orua ira atano saru i Saki, anano. Ibansio mbo'u keu pontunu pesomba tinunu, ka i'amba melungka lumako a mpo'ianga anu Dopauakono Ue Ala.

⁴ A oleo ko'otolu tempono i Burahima mengkita ngkoraane, ikitao po'ianga atuu inso olai.

⁵ I Burahima motaeako ira orua atano, ”Ipo'iamo i ndi'ai saru kalide andio. Ongkue saru nana'ote andio kami lumako i ra'ai. Kami mesomba, ka ki'amba mekule ndi omiu.”

⁶ I Burahima umalao keu pontunu pesomba tinunu atuu, ka inaao a wawo oweano i Saki, anano, ka onae mowawa api ka piso a ngkaeno. Ka do'amba melempa meronga-ronga.

⁷ Motae i Saki ndi Burahima, amano, ”Amaku.” Sumangki i Burahima, ”Tembio, anaku.” Mesikeno i Saki, ”I ndi'ai hinaomo api ka keu, sine isua ana bimba weweua pesomba tinunu?”

⁸ Sumangki i Burahima, ”Ondae Ue Ala anu mompatinda ana bimba weweua pesomba tinunu tia-Do, Anaku.” Kanandiomo dopelempa orua ira meronga-ronga.

⁹ Ka do'amba hawe a mpo'ianga anu pinau-Do Ue Ala ndi onae. I Burahima mowangu meda pontunua pesomba i ra'ai, motudao keu, ponguo i Saki, anano, ka inaao a meda pontunua pesomba atuu, i wawono keu pontunu.

¹⁰ Ka i'amba i Burahima umalao piso ta sumumbeleo anano.

¹¹ Sine mebooliomo Mala'eka-Do i Ue inso i langi ndi onae, ”Burahima, Burahima!” Sumangki i Burahima, ”Oo Ue.”

¹² Ka Do'amba mepau, ”Si pepateo nana'ote atuu ka si poweweu hapa-hapa ndi onae, hangano kanandio-andio Kuto'oriomo nine omue doitoako Ira Ue Ala ka nahi nanta-nanta aroamu meweengakono anamu anu asa-asano atuu ndi Ongkue.”

¹³ Ka i'amba i Burahima mewolili ka ikitao asa bimba lakino i bungkuno, anu tekai tanduno a haro. I Burahima umalao bimba atuu, ka i'amba mesombaakono gagi pesomba tinunu, euno anano.

¹⁴ I Burahima numeeakono po'ianga atuu, ”Ondae i Ue mompatinda,” kana dompotae mia hawe kanandio-andio, ”A wawo ntorukuno-Do i Ue, ta pinatinda.”

¹⁵ Anu kompenduano Mala'eka-Do i Ue mebooli inso i langi ndi Burahima,

¹⁶ Pau-Do, ”Ongkue mesumpa a ngkoroi-Ku,” kanandiomo pau-Do i Ue, ”hangano moweweukomo kanandio, ka omue nahi nanta-nanta meweengakono anamu anu asa-asano ndi Ongkue,

¹⁷ manasa Aku rumonsoko tehadio ntu'u ka weweuo inulemu hadio ntu'u kana anano wula i langi ka kana one i wiwi ntahi. Inulemu atuu ira mpentorokio luwuno kotado iwalido.

¹⁸ Molalo inulemu luwuno tongku i tolino ira mpohawe ronso, hangano omue momperorongeako pau-Ku.”

¹⁹ Ka i'amba i Burahima mekule a orua atano ka mperonga-ronga ira mpelungka melako i Bereseba. Ka i'amba i Burahima mo'ia i Bereseba.

Inuleno i Nahori

²⁰ Umarino atuu i Burahima mohawe lele, ”I Milika mbo'u me'anaako iramo ana ntama, anano i Nahori, pepaekompomu:

²¹ I Usi, ana aka, ka i Busi, uaino, ka i Kemueli amano i Arami,

²² ka i Kesedi, i Haso, i Piladasi, i Yidalapi ka i Betueli.”

²³ I Betueli hinao anano i Ribeka. Oalu mia andio anano i Nahori, pepaekompono i Burahima atuu, anu pine'anaakono i Milika.

²⁴ Benie mongurano i Nahori, anu neeno i Reuma, me'anaako ira mbo'u i Tebahi, i Gahami, i Tahasi, ka i Ma'aka.