Sakaria 5 - Wunta Mempori

Pongkita ko'onoo: paluluno wunta anu menee 5:1-4

¹ Mengkita aku mbo'u ngkoraane ka kukitaomo asa paluluno wunta anu menee.

² Motae mala'eka atuu ndi ongkue, ”Hapake anu kinitamu?” Sangkiku, ”Kukitao asa paluluno wunta anu menee; ondauno rua pulu hiku ka molueno hopulu hiku.”

³ Ka i'amba mepau ndi ongkue, ”Onaemo andio totonaa anu meluarako umaluo luwuno wita. Hangano, sompo mia anu monako i ndi'ai, kana'umpe anu inonto a laro kalulu atuu da bebasi inso a mpohuku; kanatuu koa mbo'u, sompo mia anu mesumpa nahi mentee i ndi'ai da bebasi inso a mpohuku.

⁴ Kutenaomo totonaa atuu meluarako, kanandiomo pau-Do Ueno luwuakoano, ka ipewinso a laro rahano mia monako ka rahano mia anu mesumpa nahi mentee a nee-Ku, ka merato a rahado saru rumopuo, moiko keu maupo luwuno watuno.”

Pongkita ko'opitu: beine a laro ngkusi 5:5-11

⁵ Aiwaomo mala'eka anu mepau saru ongkue atuu, ipotae ndi ongkue, ”Pengkitamo ngkoraane ka kitaomo hapa anu me'umbaako atuu!”

⁶ Ka ku'amba mesikeno, ”Hapa atuu?” Sangkino, ”Onaemo kusi anu meluarako!” Ipotae mbo'u, ”Onaemo andio wineweudo anu mosa'o i asa wawo wita!”

⁷ Kitao, ulono ntimano tetandeomo, ka asa beine mentoro i larono!

⁸ Ka i'amba mala'eka atuu mepau, ”Onaemo atuu wineweu mosa'o.” Ka i'amba dumandao beine atuu mekule a laro ngkusi ka ipepasiakono watu tima atuu a ngangano kusi.

⁹ Ka ku'amba mengkita ngkoraane ka kukitao orua mia beine meluarako melolaromeene meneeako panino. Ka ondae andio, panido kana panino manu-manu timba'u. Dowawao kusi atuu i olono tolino ka langi.

¹⁰ Mesikeno aku a mala'eka anu mepau saru ongkue atuu, ”Isua dowawao kusi atuu?”

¹¹ Sangkino ndi ongkue, ”I wita Sineari, ta powangu raha pelahumoaado beine atuu. Tewala tetindaomo, onae ira menaao i ra'ai a mpentadeano onaeno.”