Sakaria 4 - Wunta Mempori

Pongkita ko'olima: hulu mengkaru wulaa, keu saitu, ka po'anggano i Serubabeli 4:1-14

¹ Mala'eka anu mepau saru ongkue atuu wali hawe, wangu aku kana asa mia anu winangu inso a mpoturino.

² Ipotae ndi ongkue, ”Hapa anu kinitamu?” Sangkiku, ”Kukitaomo asa hulu mengkaru, luwuno inso a wulaa, saru loea kodei ponaapa lana i wawono. A hulu mengkaru atuu hinao opitu pelita ka opitu po'iangano sumbu a sompo pelita anu i wawono.

³ Orua keu saitu kongko i horino, asa i koanano loea kodei atuu ka asa i manggalino.”

⁴ Ka ku'amba mesikeno a mala'eka anu mepau saru ongkue atuu, ”Hapake pengkonaano luwuno andio, ueku?”

⁵ Sumangki mala'eka anu mepau saru ongkue atuu, ipotae ndi ongkue, ”Nahi uto'orioke hapa pengkonaano luwuno andio?” Sangkiku, ”Naahi, ueku!”

⁶ Onae mepau ndi ongkue, ipotae, ”Ndiomo pau-Do i Ue ndi Serubabeli, kanandio: Komba saru mosia ka komba saru roso, tendeano saru penaa-Ku, pau-Do Ueno luwuakoano.

⁷ Isemake omue, torukuno anu langkai? I arono i Serubabeli omue gagi wita melembo. Onae ta wawao watu moiko ntu'u tinondaako pebooli: Moiko ntu'u! Tedoa moiko!”

⁸ Ka i'amba haweomo pau-Do i Ue ndi ongkue, kanandio,

⁹ ”Kaeno i Serubabeli anu weweuomo pondasino Raha andio, ka kaeno mbo'u ta moko'umario.” Ka komiu mento'orio, nine Ondae Ueno luwuakoano anu tumena aku ndi omiu.

¹⁰ ”Ondae anu amba-ambano mpe'uru-uruo pompu'uano anu mengkode-kodei, ira mpo'unde mengkitao watu bininiki a ngkaeno i Serubabeli. Ka opitu hulu atuu, onaemo mata-Do i Ue, anu mensiroio asa wawontolino.”

¹¹ Ka ku'amba motae ndi onae, ”Hapa pengkonaano orua keu saitu anu i koanano ka i manggalino hulu mengkaru andio?”

¹² Kompenduano kupepau ndi onae, ”Hapa pengkonaano orua sampano keu saitu anu teposombu saru orua pipa wulaa anu mowaao anu me'uwoi kana wulaa inso i wawono atuu?”

¹³ Sangkino ndi ongkue, ”Nahi uto'orioke, hapa pengkonaano luwuno andio?” Sangkiku, ”Naahi, ueku!”

¹⁴ Ka i'amba motae, ”Ndiomo orua mia anu inurapi anu mentade umpeda ndi Ondae Ueno asa wawontolino!”