Sakaria 1 - Wunta Mempori

LUWUNO ANU KINITA LAMORO 1–8 Petena ka dontepidi 1:1-6

¹ I larono wula ko'oalu a nta'u ko'orua poparentaano i Dariusu, haweomo pau-Do i Ue ndi nabi Sakaria anano i Berekia anano i Ido, kanandio,

² ”Ondae i Ue tedoa Ira tekuda a uempu'umu.

³ Onaemo pu'uno, pauako iramo: Kanandiomo pau-Do Ueno luwuakoano: Impepokulemo ndi Ongkue, kanandiomo pau-Do Ueno luwuakoano, ka Ongkue mbo'u mepokule ndi omiu, pau-Do Ueno luwuakoano.

⁴ Siimo imengkana uempu'umiu anu dompopoto'oriako ira nabi anu i ndi'ipua, kanandio: Kanandiomo pau-Do Ueno luwuakoano: Impepokulemo inso a mpelelumiu anu mosa'o ka wineweumiu anu mokoburu! Sine nahi domebehe merongeo ka nahi domebehe mperio Aku, kanandiomo pau-Do i Ue.

⁵ Isua irake uempu'umiu? Ka luwuno nabi, nde mentuwu ira hawe nahina tampulaano?

⁶ Sine pau ka pompakosi-Ku anu Kuparentaako iramo luwuno tetenaa-Ku, luwuno nabi, kombake atuu i'alu iramo uempu'umiu? Komba ntepidi irake saru mpotae: kanamo tinoo-Do Ueno luwuakoano Ira weweuo ndi ontae menunu saru pelelu ka wineweuto, kanandiomo Dopoweweu ndi ontae?”

Pongkita amba-ambano: anu mesawi a ngara 1:7-17

⁷ A oleo korua pulu ka opaa wula Siebati, wula kohopulu ka asa, a nta'u ko'orua poparentaano i Dariusu, haweomo pau-Do i Ue ndi nabi Sakaria anano i Berekia anano i Ido, motae,

⁸ ”Hieno wongi mohawe aku aasa pongkita: tengkitaomo asa mia anu mesawi a ngara motaha! Onae mentade i olono keu muradi anu a laro wingke; ka i bungkuno hadio ngara anu motaha, anu motaha-taha ka anu mopute.

⁹ Ka ku'amba mesikeno: Hapa pengkonaano luwuno andio, oo Ueku? Sumangki mala'eka anu mepau ndi ongkue: ’Aku koa mopokitao ndi omue hapa pengkonaano luwuno andio!’

¹⁰ Mia anu mentade i olono keu muradi atuu sumangki, ’Ondaemo andio anu tinena-Do i Ue lumako sumompoo tolino!’

¹¹ Ka do'amba mpotae a Mala'eka-Do i Ue anu mentade i olono keu muradi atuu, ’Kimesompoomo tolino, ka menteeano asa wawontolino atuu mpenoro-noro koa ka rodo.’

¹² Sumangki Mala'eka-Do i Ue, ipotae, ’Oo Ueno luwuakoano, hawe te'ipia mbo'u nahi Ipehohawao Yerusale ka luwuno kota Yehuda anu Itekudaako iramo i larono opitu nta'u andio?’

¹³ Ka i'amba Ondae i Ue sumangkiako pau anu mauru ka anu montarero a mala'eka anu mepau ndi ongkue atuu.

¹⁴ Ka i'amba mala'eka anu mepau saru ongkue atuu motae ndi ongkue: Peboolimo kanandio: Kanandiomo pau-Do Ueno luwuakoano: ’Aroa-Ku tedoa mawongkoakono Yerusale ka Sioni.

¹⁵ Sine tedoa langkai tekuda-Ku a luwuno tongku anu rumasao koroino roodo. Tempono nahi Kutekuda lahi ndi ondae, luwuno tongku atuu mpotiangi marasaiado.

¹⁶ Onaemo pu'uno, kanandiomo pau-Do i Ue, Aku wali mehohawao Yerusale. Raha-Ku ta pinontade mbo'u i ra'ai, kanandiomo pau-Do Ueno luwuakoano, ka koloro posongka ta pinadindi mbo'u i Yerusale.’

¹⁷ Umarino atuu pebooliakonomo kanandio: Kanandiomo pau-Do Ueno luwuakoano: Luwuno kota-Ku ta hadioako mbo'u anu moiko. Ondae i Ue Ira tumareroo Sioni ka wali binikio Yerusale.”

Pongkita ko'orua: opaa tandu ka opaa puu mpolabu 1:18-21

¹⁸ Mengkita aku ngkoraane ka kukitaomo opaa tandu.

¹⁹ Ka ku'amba mesikeno a mala'eka anu mepau ndi ongkue atuu, ”Hapa pengkonaano luwuno andio?” Sangkino ndi ongkue, ”Onaemo andio luwuno tandu anu sumiarawo ira Yehuda, Isaraeli ka Yerusale.”

²⁰ Ka i'amba Ondae i Ue mopokitao ndi ongkue opaa puu mpolabu.

²¹ Mesikeno aku, ”Me'aiwa ira mpoweweu hapake mia andiodo?” Mala'eka atuu sumangki, ”Luwuno tandu atuu onaemo anu sumiarawo iramo Yehuda, ranta nahina maupo te'asa mia mosia tumandeo uluno. Luwuno mia andio me'aiwa weweu ira ka domedoito, ka metadiakono tandudo luwuno tongku anu tumandeo tanduno a wita Yehuda ka sumiarawo ira.”