Ruti 3 - Wunta Mempori

I Ruti ka i Boasi ia mposesaa

¹ Onaemo ka i Naomi ponino atuu, motaeakono, ”Anaku nde nahi moiko tokoa ba kupo'ungkeakomu anu ta mekariako ka umanangai?

² Gaagi kanandio, nde i Boasi, anu mompopo'anggaako beine anu upewali-waliako ira atuu, lano io pe'etuto? Nde onae ia wongi andio tekonai moduku jelai ia mposesaa;

³ Pedolomo ka upemina-mina, pesangkaako sangka anu tekosi, ka lakomo a mposesaa. Sine kasi to'oriko mia atuu, se'eluno napi umari mongkaa ka mo'inu.

⁴ Tewala mepomboleomo moturi pepenteeo temoiko pepomboleano. Ka u'amba rangkuhio sungkeo hawuno inso a ngkaruno ka upepombole i tu'ai. Asalakono ta koa pauakomu, hapa anu ta wineweumu.”

⁵ Motaemo i Ruti ndi onae, ”Luwuno anu upauakune aku weweuo.”

⁶ Umari atuu lumakoomo a mponsesaa ka iweweuo kana anu i'oliwiakono ponino.

⁷ Ko'umarino mongkaa ka mo'inu i Boasi mawongkoomo aroano, haweomo ta moturi i tompano pohowua jelai atuu. Haweomo beine atuu meningka-ningka, ka isungkeo hawuno inso a ngkaruno i Boasi, ka ipepombole i tu'ai.

⁸ I tempono porontongawongi, tededengkeomo mia atuu ka iperare i horino, kahinaano asa beine moturi i horino karuno.

⁹ Mesikenoomo, ”isemake omue andio?” Isangkio, ”Ongkue i Ruti, mia tetenaamiu: Ipokomolueo pongkadudui miu nde omiumo anu metoto tumolosi kami.”

¹⁰ Motaeomo i Boasi, ”Doronsoko i Ue, o anaku! Kanandio upopokitaomo ntu'u moputeno aroamu, sekono amba-ambano, nde omue nahi upontondari tama mongura, moiko anu mongkokolaro ke anu mompoli.

¹¹ Onaemo anaku, siimo doito. Nde luwuno anu pinaumu atuu, aku weweuo ndi omue nde luwuno mia asa kota mami andio domento'orio motae omue beine anu moi-moiko.

¹² Kanandio-andio, lano ongkue te'inso ia pe'etumu, anu metoto montolosi, sine maupo kanatuu da hinao mbo'u asa mia pontolosi anu umpedaopo sekono ongkue.

¹³ Po'iamo wongi andio i ndi'ai. Tisomo mo'oru, ba ineheno tumolosiko, po'ineomo onae montolosi. Sine ba nahi behe tumolosiko, ongkuemo anu tumolosiko, ia nee-Do i Ue anu tuwu. Pepombole ka poturimo i ndi'ai ranta tisomo mo'oru.”

¹⁴ Moturiomo ihorino karuno ranta hawe mo'oru, umari atuu mewanguomo, se'eluno mia napi pada dontepoto'ori nde ipotae i Boasi, ”Kasi domento'orio mia motae hinao aasa beine anu hawe a mposesaa.”

¹⁵ Ipotae mbo'u, ”Wee aku bomboni anu pinakemu atuu ka uwileo.” Onaemo ka iwileo bombonino. Umari atuu isa'uomo onoo nsa'u jelai a bombonino. Umarino atuu lumakoomo i Boasi i kota.

¹⁶ Mansano i Ruti hawe ia mponino, mesikeno i Naomi, ”Kana'umpe anaku?” Itutuluomo i Ruti luwuno hapa anu wineweuno ndi onae.

¹⁷ Ka ipotae: Jelai onoo nsa'u atuu iwee aku, ka potaeno, ”Silako pekule mpemoa ia mponimu.”

¹⁸ Ipotae ponino atuu, ”Pesikorimokoa anaku, ranta ka uto'orio, ba kana'umpe poko'ariano teweweuno atuu, hangano mia atuu nahi ta menaa-naa ba napi poko'umario teweweuno atuu oleo andio.”