Ruti 1 - Wunta Mempori

I Ruti ka i Naomi

¹ I tempono puu mpobitara mpoparenta ia nto Isaraeli, i witado to Isaraeli hinao mokoninggoa. Lumakoomo asa mia inso i Beteleme-Yehuda, saru kombiano ka orua ira anado pada tama lumako i wita to Moabi ira mpo'ia i ra'ai kana mia mehawe.

² Neeno mia atuu i Elimele, neeno kombiano i Naomi, ka orua ira anano i Mahaloni ka i Kilioni, luwudo to Eparata inso i Beteleme Yehuda. Hawedo i wita Moabi, mpo'ia iramo i ra'ai.

³ Ka i'amba mateomo i Elimele, tamano i Naomi, beine atuu mo'iaomo saru anano orua ira.

⁴ Orua ira anano atuu pada mongkombia beine to Moabi: anu ko'aasa neeno i Oropa, anu ko'orua neeno i Ruti. Ka mpo'ia ira i ra'ai moro ta tehopulu nta'u tehineno.

⁵ Ka mate iramo mbo'u orua ira anano, i Mahaloni ka i Kilioni, onaemo beine atuu nami hina orua ira anano ka tamano.

⁶ Nahi tehine mepatindaomo saru orua ira ponino, ira mpekule inso i wita Moabi, nde irongeo motae dopehohawa iramo i Ue bawaa-Do ka moweeako ira kaanga.

⁷ Lumakoomo inso ia mpo'iangaano, saru orua ira ponino. Ia laansala pekuledo i wita Yehuda,

⁸ mepauomo i Naomi ia orua ira ponino, ipotae, ”I lakomo i pekulemo pada i rahano inemiu; Ondae i Ue, Ira mokomengkaao pompehohawa-Do ndi omiu kana pompehohawamiu ia mia anu memate iramo ka ndi ongkue!

⁹ A pompehohawa-Do i Ue, komiu mohawe mbo'u anu mekaria komiu i rahado tamamiu.” Onaemo ka iwoowoo ira, sine butu ira mengese meroku

¹⁰ dopotaeakono, ”Naahi, kami tumonda komiu ia tongkumiu.”

¹¹ Sine ipotae i Naomi, ”Ipekulemo anaku, tembio ka komiu tumonda aku? Nde da aku mokompe'ana mbo'uke anu ta gagi tamamiu te'ipua?

¹² Pekulemo anaku lakomo, nde tedoa akumo mota'u ba kupekombia. Bakana pinewowoloku: Hinao tama wongi ndio, aku mekombia, ke bara'ura da aku me'ana ntama,

¹³ Nde da komiu mokosikorio ranta ka domangalitau? Nde tamo onae ka komiu mesikori nahi ipekombia? Sii Kanandio anaku, nde nahi komba laluaopo masukarano anu pinembasaiku sekonopo omiu, hangano kae-Do i Ue Ira humuku aku?”

¹⁴ Mpengese iramo mbo'u tedoa meroku, ka i Oropa iwoowoo ponino, metompa, sine i Ruti kongkono metenunu ndi onae.

¹⁵ Mepauomo i Naomi, ”Mekuleomo pe'asa mpo'alamu ia tongkuno, ka ia ue anu pine'ala-alano, pekulemo tondao pe'asa mpo'alamu atuu.”

¹⁶ Sine ipotae i Ruti, ”Sidadai aku bintakomiu ka kupekule nahi kutonda komiu, nde ba isua ilako i tu'ai kulako, ka ba isua ipoturi i tu'ai kupoturi, tongkumu onae tongkuku, ka Ue Alamiumo, Ondae Ue Alaku;

¹⁷ Isua imate, i ra'ai kumate, ka i ra'ai kukinaburu. Kanandiomo ba Dohuku aku i Ue, ba laluaopo sekono atuu tabulu hapamokoa monsia kita, sangkadio matea!”

¹⁸ Mansano kumitao i Naomi motae moroso aroano i Ruti ta tumondao, menaa-naaomo mepauakono.

¹⁹ Melempa iramo ranta ka dohawe i Beteleme. Mansado mewinso i Beteleme, ntewuka ira luwu asa inia, ka luwuno beine, dompotae, ”Komba i Naomi ke arau?”

²⁰ Sine ipotae, ”Si mpoboi aku i Naomi, impoboi aku Mara, nde anu Pabawa mowee aku hadio mopa'ino tumuwu.

²¹ Anu ka kulako buke kaeku, sine ka Dopokule aku i Ue mooa kaeku. Tembio ka komiu mpoboi aku i Naomi, hangano Ondae i Ue anu sakosii umaropi aku, ka Ondae anu pabawa mowee aku urasa'o.”

²² Kanandiomo i Naomi mekule merongaakono i Ruti, beine to Moabi. Kohawedo i Beteleme, tekonai ira pompu'u konsowia jelai.