Puu Pontutulu 7 - Wunta Mempori

Ponto'ori anu mentee

¹ Nee moiko moikoopo sekono lana anu masuli olino, ka oleo matea moikoopo sekono oleo hinaa.

² Lumako a raha matea moikoopo sekono lumako a mpogawea, hangano a raha matea pokotampulaano sompo mia; asalakono mia anu tuwu mekokoongakono.

³ Masusaa moikoopo sekono pengingisi, hangano rupa anu mompemasusa weweuo aroa pande mompewowolo.

⁴ Aroano mia monto'ori kongko a raha matea, sine aroano mia benge-benge kongko a raha mawongkoa.

⁵ Moikoopo moronge pontekudano mia monto'ori sekonopo moronge penanino mia benge-benge.

⁶ Hangano, kana beti-betino rui mo'ai a ntoto kawali, kanatuumo pengingisino mia benge-benge. Ndio mbo'u nahina tuduno.

⁷ Mentee ntu'u, morontu doi mokobenge-bengeo mia monto'ori, ka doi pompowee nahi pototono monsolangi aroa.

⁸ Poko'ariano asa rupa moikoopo sekono pompu'uano. Tedoa sabara moikoopo sekono pompelangka-langkai.

⁹ Siimo ronga tekuda i laro aroa, hangano tekuda mo'ia mpiha a laro radano mia benge-benge.

¹⁰ Sii potae, ”Tembio tempo i ndi'ipua moikoopo sekono tempo kanandio-andio?” Hangano, komba me'empehiako ponto'ori upesikenoakono mongkona atuu.

¹¹ Ponto'ori mengkena moikono saru pusaka ka asa me'urado mia anu mengkitao mata'oleo.

¹² Hangano, dagaiano ponto'ori mengkena dagaiano doi. Me'uraomo anu tumo'orio nine ponto'ori mekariao tuwuno anu me'ueo.

¹³ Pekokoongakonomo hapa anu wineweu-Do Ue Ala! Isema polio mokoleoo hapa anu Dolongkuomo?

¹⁴ A oleo me'ura mawongkomo, sine a oleo urasa'o pewowoloomo nine maupo oleo urasa'o andio Dopokogagio Ue Ala kana koa mbo'u oleo me'ura, ka mia si pohawe maupo hapa mongkona oleo ramaino.

¹⁵ A laro ntumuwuku anu nahina tuduno kukitaomo luwu mongkona andio: hinao mia mompe'ala-ala anu mate a laro pompe'ala-alano, hinao mia mosa'o gauno anu tuwu ranta mota'u a laro wineweuno mosa'o.

¹⁶ Si petenunu lahi, pelelumu si ponto'ori lahi. Tembio ka komepateo koroimu omuemu?

¹⁷ Si pelelu lahi mosa'o, si benge-benge! Tembio omue inehemu mate napi tempono?

¹⁸ Moikoomo tewala omue uminio anu asa, sine anu susua mbo'u si potolao, hangano mia anu doitoako Ira Ue Ala umolaiakono oruano.

¹⁹ Ponto'ori mompowee roso a mia mpande laluaopo sekono hopulu anu pabawa a laro ngkota.

²⁰ Menteeano, i tolino nahina mia moleo anu moweweu moiko, nahi hori moweweu hala!

²¹ Osi'i mbo'u pekokoongakono sompo pau anu pinauno mia, kasi urongeo itotonaako anu mekakaakomu.

²² Hangano, ito'orio aroamu nine omue mbo'u mararu montotonaa mia susua.

Po'ungkea ponto'ori anu pine'o'oleako 7:23–8:1

²³ Luwuno atuu kuparesaakonomo ponto'ori, kupotae, ”ineheku gagi mia monto'ori,” sine ponto'ori atuu olai inso ndi ongkue.

²⁴ Hapa anu hina, atuu olai ka tedoa ondalo, isema anu mokohaweo?

²⁵ Kupo'aroo pompekokoongakoku ka kupokonto'orio, paresao, ka mo'ungke ponto'ori ka tepakosiano, saru ka kuto'orio tedoa benge-bengeno gau mosa'o atuu ka tedoa nahina tuduno benge-benge atuu.

²⁶ Mohawe aku asa rupa anu lalu mopa'i sekonopo matea: beine anu onaemo buani, anu aroano onaemo oho ka kaeno onaemo pompongu. Mia anu pinemoiko-Do Ue Ala teliahako inso ndi onae, sine mia anu tehala irakoomo.

²⁷ Kitao, ipotae Puu Mpontutulu, ndiomo anu hinaweku: Nte'o'asa kupotudao ka kuhaweo tepakosiano.

²⁸ Hapa anu da inungkeku sine nahi kupohawe, kuhaweo butu a asa mia i olono asa nsowu sine nahi kupohawe maupo a asa mia i olono beine.

²⁹ Kitaomo, butu onae ndio hinaweku: Dopokogagiomo Ue Ala mia anu moleo, sine mpo'ungke ira hadio pepokomenteedo.