Puu Pontutulu 5 - Wunta Mempori

¹ Si madara ungkahio ngangamu, ka siimo ipodadu aroamu moluarako pau i aro-Do Ue Ala, hangano Ondae Ue Ala kongko Ira i suruga ka omue i tolino. Onaemo atuu, po'ineeomo ka itedei koa paumu.

² Hangano, kana'umpe haweno mo'ipi a laro hadiono marepaa, kanatuu koa mbo'u tepopaua benge-benge a laro hadiono pau.

³ Tewala omue montanga ndi Ondae Ue Ala, ronga ihiio, hangano nahi Dopemoiko ira mia mebenge-benge. Ihiiomo pontangamu.

⁴ Moikoopo nahi upontanga sekonopo montanga sine nahi u'ihiio.

⁵ Ngangamu ka siwawako a laro hala, ka sipepau i arodo tinena-Do Ue Ala nine nahi upe'inungakono. Nde laluopoke Ondae Ue Ala tekuda a luwuno pinaumu ka sumolangio hapa anu inanggano kaemu?

⁶ Hangano, kana hadiono mo'ipi, kanatuu koa mbo'u hadiono pinau anu nahina tuduno. Sine doitoako Iramo Ue Ala.

Pompoli anu nahina tuduno 5:7–6:12

⁷ Tewala ukitao pompokonsii a mia mongkokolaro i asa po'ianga ka podadaia songka saru moleoa, siimo kohali-haliakono mongkona atuu. Hangano, potoro mantande anu asa dumagaio anu susua, ka potorodo lalu mantande dumagai ira.

⁸ Asa urano wita a laro nteweweu kanatuu onaemo tewala mokoleno pinelangkai i wita atuu.

⁹ Isema mongkekewoi doi nahi ta mesompoo doi, ka isema mongkekewoi hadio arataa nahi ta mesompoo hinaweno. Ndio mbo'u nahina tuduno.

¹⁰ Tekense hadio arataa, tekense hadio mbo'u mia anu mokopingkoo. Ka i'amba hapake urano anu me'ueo sangkadio kumitao?

¹¹ Rodoomo poturino mia anu mo'angga, moiko tedei ke hadio ipongkaa. Sine mowohino mia mompoli menteeano nahi weweuo ka ipokompoturi.

¹² Hinao urasa'o anu mompokomasusa kukitao i totono mata'oleo: pompoli anu ninaano ueno gagi urasa'ono onaeno.

¹³ Pompoli atuu moliu hangano inangga mosa'o, ranta ka ihina anano nahina maupo hapamo koa ndi onae.

¹⁴ Kana'umpe ipeluarako inso a mpe'anakaano ineno, kanatuu koa mbo'u ba ilako, kolambe-lambe kana tempono ihawe. Nahina ipohawe maupo hapamo koa inso a mpine'iseino anu pinokowawano kaeno.

¹⁵ Ndio mbo'u urasa'o anu mompokomasusa. Kana'umpe ihawe, kanatuu koa mbo'u ba ilako. Ka i'amba hapake urano mia atuu anu me'i'iseiomo mobuani angi?

¹⁶ Tendeano ipingkoo oleo ntumuwuno a laro wongi-wongia, saru hadio pe'o'ole, marasaia, ka tekudaa.

¹⁷ Kitaomo, anu kupemoikoo ka koona ntu'u a mia onaemo mongkaa mo'inu ka mesana-sanaa a laro luwuno rinokuhi anu wineweu pine'isei i totono mata'oleo asa ntinuwu, anu Doweeakono Ue Ala, hangano onaemo tiano.

¹⁸ Ka sompo mia anu Dopoweeakono Ue Ala pompoli ka arataa saru pinoweeako roso ka ipakeo, tumarimao tiano ka mawongko a laro mpe'iseiano. Atuu mbo'u pompowee-Do Ue Ala.

¹⁹ Menteeano nahi mararu irambeo tinuwuno, hangano Dopo'ineeo Ue Ala ka imarepaako sanaano aroano.