Powadi 1 - Wunta Mempori

Tinoono Powadi

¹ Luwuno powadino i Salomo ana ntamano i Daudi, mokoledo to Isaraeli,

² ka itino'ori ponto'ori anu mentee ka pompaguru, ka ipinokonto'ori luwuno pau anu mentudu,

³ ka itinarima pompaguru anu mompokogagi pande; onaemo menteea, moleoa ka nahi pegaupi;

⁴ ka ipinoweeako pande ntu'u a mia anu napi hina pinembasaino, ka ponto'ori saru pandeno mosongka a mia mongura, –

⁵ moikoomo mia pande mosongka moronge ka montiangi ponto'ori ka moikoomo mia anu hinao ponto'orino mohawe anu gagi pontimbanga –

⁶ ka itino'ori powadi ka potundaano, pauno mia pande mosongka ka singgurudo.

⁷ Doitoako Ira i Ue onaemo pompu'uano ponto'ori, sine mia benge-benge tumetewehio ponto'ori anu mentee ka pompaguru.

Patudu a pompopandei

⁸ Hei anaku, rongeomo pompaguruno amamu, ka si pebungkuio pompaguruno inemu,

⁹ hangano kalono bunga anu tekosi atuu tiano ulumu, ka enu-enu tiano we'umu.

¹⁰ Hei anaku, tewala mia tehala popandeiko, si tondao;

¹¹ tewala mpotae ira, ”Aiwa tonda kami, aiwa tompotowoki rea, aiwa topomporaakono mia nahina salano po'ehetomo koa;

¹² aiwa tomentele ira kontuwu-tuwu, kana tolinodo mia mate, bobotoli, kana ondae anu mpetii a laro ngkeke kaburu.

¹³ Kita mpohawe mperupa-rupa arataa anu masuli olino, rahato kita mpokobukeakono parewa rinontu;

¹⁴ tendeomo undi saru omami, asa kadu-kadu tiato luwu.”

¹⁵ Hie anaku, omue si tuwu tumondao peleludo, ontoomo karumu inso a mpesalaado,

¹⁶ hangano karudo mpelulu te'aro a mosa'oa ka mpopari-pari ira mpo'uwu rea.

¹⁷ Hangano nahina tuduno buani pinadindi i arono matado luwuno anu mepani,

¹⁸ kahinaano ondae mentowokio reado ondaedo ka momporaakono penaado ondaedo.

¹⁹ Kanatuumo poko'ariano sompo mia anu modokoako me'uraa nahi pototono, me'uraa atuu umalao penaano anu me'ueo.

Pongkuahako a mia mongura 1:20-33

²⁰ Ponto'ori anu mentee mebooli meroku a luwuno pesalaa, a luwuno tanalapa onae moporongeo suarano,

²¹ i tompano sala maroa onae meboo-booli, a mpesalaa kodeino pewowa langkaino kota onae pauo luwuno pauno.

²² ”Opiapo mbo'u tehineno, hei mia anu napi hina pinembasaino, da imengkekewoio pompenana'otemiu, anu mompoponggari-nggari da ineheno monggari-nggari, ka mia monge-monge umo'aliaakono ponto'ori?

²³ Pewolilimo a mpekuahakoku! Menteeano, aku umuwuo penaaku ndi omue ka pauo pauku ndi omue.

²⁴ Hangano, tempono kupepoboi, nahi mebehe, ka tempono kutasiakono kaeku, nahina anu merioo;

²⁵ tendeano, nahi imperioo patuduku, ka nahi mentarimao pekuahakoku,

²⁶ ka ongkue mbo'u aku mengingisiakomiu tempono i'alukomiu masolaa; aku mompopodeu-deu, tempono mongkokongiria humawekomiu,

²⁷ tempono mongkokongiria humawekomiu kana angi mokora, ka masolaa umaluko kana lompiu, tempono masukaraa ka salalaro hawe umalukomiu.

²⁸ I tempo atuu ira mpebooli ndi ongkue, sine nahi aku sumangki, ira memokua me'ungke aku, sine nahi aku hinawe.

²⁹ Hangano o'aliado a ponto'ori ka nahi domebinikio doitoako Ira i Ue,

³⁰ nahi dobehe mentarimao patuduku, sine mpebungkuio luwuno pekuahakoku,

³¹ ka ira mengkaano wuano wineweudo, ka gagi mowohiako sinongkado.

³² Mentee ntu'u, mia anu napi hina pinembasaino ta mateako moteano aroano, ka mia monge-monge ta mateako nahi pomperiono.

³³ Sine isema anu momperorongeako ndi ongkue, onae ta mo'ia rodo, rodo inso a mongkokongiriako masolaa.”