Po'unde-unde 72 - Wunta Mempori

Pekakai tiano poparentaano mokole anu moleo 72:1-20

¹ Inso ndi Salomo. O Ue Ala, songka-Miu Iweeakonomo mokole ka moleo-Miu a ana ntamano mokole!

² Po'ineeomo ka ibitara ira bawaa-Miu a moleoa ka mia-Miu anu ntepokonsii menunu songka!

³ Po'ineeomo luwuno torukuno mpowawa manangaiano tongku, ka luwuno pongku mpowawa menteea!

⁴ Po'ineeomo ipokomorosoo moleoa tiano mia anu tepokonsii i olodo palili, tumulungi ira anado mia mongkokolaro, sine pirego ira anu mpompokonsii!

⁵ Po'ineeomo ka imelai tinuwuno i larono pebolilino mata oleo, ka i larono wula mewanta, mapa'api-api inule!

⁶ Po'ineeomo ka ikana usa anu metii a wawo mpada ewo, kana usa marombo anu umuwoio tolino!

⁷ Po'ineeomo ka ikomoro-morosono moleoa a tempo poparentaano ka manangaia hadio ntu'u, hawe tempono wula nahi mewanta mbo'u!

⁸ Po'ineeomo ipoparenta inso a ntahi lumako a ntahi, inso a ngkoro Eparata hawe a tompano tolino!

⁹ Po'ineeomo anu mpo'ia a mpada malua mpenggolontu i'arono, ka luwuno iwalino mponsila'e pampawu;

¹⁰ po'ineeomo luwuno mokole inso i Tarasisi ka luwuno togo dompowawa pesomba; po'ineeomo luwuno mokole inso i Sieba ka Seba dompowawa peki'ue!

¹¹ Po'ineeomo luwuno mokole mpenggolontu mpesomba ndi onae, ka luwuno tongku ntepe'ata ndi onae.

¹² Hangano, ipotolao mia mongkokolaro anu mebooli mepetulungi, mia tepokonsii anu nahina tumulungio;

¹³ ipehohawao mia molema ka mia mongkokolaro, ikaduduio penaano mia mongkokolaro.

¹⁴ Itolosi ira inso a pompokonsiia ka pobobarasaia, reado masuli olino a pongkitano.

¹⁵ Tuwu iramo mokole! Po'ineeomo ka ipinesombaako ndi onae wulaa Sieba! Po'ineeomo ka ipinekakaiako mpiha, ka pino'emaako ronso hawe sumoo oleo!

¹⁶ Po'ineeomo ka ihadio ntu'u pinopaho gandu i wita, mebomba a punsuno luwuno torukuno; po'ineeomo luwuno tonggino te'ili kana luwuno keu i Libano, ka palilino kota tetiangi kana ewo i tolino.

¹⁷ Po'ineeomo neeno ka ipo'ia mpiha, po'ineeomo neeno ka itepahe teto'ori i larono oleo metanggolili. Po'ineeomo luwuno tongku mambe ronso a neeno, ka mpotaeakono me'ura.

¹⁸ Inunde-unde Iramo i Ue, Ue Alado to Isaraeli, asa-asa-Do weweuo wineweu kinohali-haliako!

¹⁹ Ka inunde-undeomo nee-Do anu maramba nahina tampulaano, ka po'ineeomo maramba-Do buketio asa wawontolino. Ami, ami.

²⁰ Tompamo i ndi'ai luwuno pekakaino i Daudi anano i Isai.