Po'unde-unde 64 - Wunta Mempori

Wineweu-Do Ue Ala a iwali anu lambaha 64:1-11

¹ Tiano petewawado anu mpenani. Penani po'unde-undeno i Daudi.

² Oo Ue Ala, Irongeomo suara pompemasusaku, dagaiomo penaaku inso a iwali anu lambaha.

³ Iwuni akumo inso a gerombolano mia mpoweweu mosa'o, inso a porisuido anu mpoweweu mosa'o.

⁴ Dompokomontasoo elodo kana ponai, ka mpotola ira pau kana ana mpana,

⁵ mempanao mia anu moleo aroano inso a mpewunia; mpepobingko nahi domedoito mempanao.

⁶ Pada ira mpepokomoroso a laro mpoweweua mosa'o, menteriso ira ka nahi teto'ori domponta'o pompete'umala; dompotae, ”Isema anu kumitao?”

⁷ Ondae mposongka luwuno molengkua, ”Ntetinda kamimo, sinongka sompoomo.” Tedoa ntu'u ondalo laro aroano ka aroano mia!

⁸ Sine Ondae Ue Ala pana ira; nahi kinoo-koo memobela ira,

⁹ ka ntetiduako elodo ondaedo; luwuno anu mensakosiio ira mebitu-bitu ulu,

¹⁰ sompo mia gagi doito. Ka domempaleleo wineweu-Do Ue Ala, ka mpekokoongakono hapa anu Doweweuomo.

¹¹ Moikoano mia mentee mpo'unde hangano Ondae i Ue ka mpepekadudui ndi Ondae; ka moikoano mawongkono luwuno mia anu moleo aroano.