Po'unde-unde 61 - Wunta Mempori

Pekakai mo'ema pekadudui 61:1-9

¹ Tiano petewawado anu mpenani. Saru pemaeno katapi. Inso ndi Daudi.

² Po'ineeomo ka Irongeo pebooliku, oo Ue Ala, perioomo pekakaiku!

³ Inso i tompano tolino kupebooli ndi Omiu, hangano telusa aku mokendo; Itaate akumo lumako a ntorukuno watu anu kontasi-tasi ondau i wawoku.

⁴ Mentee ntu'u Omiu gagi Komiumo pepekaduduiaku, menara anu moroso te'aro a iwali.

⁵ Po'ineeomo kupo'ia a laro ngkema-Miu ranta nahina tampulaano, po'ineeomo kupepekadudui i totono pe'egoano pani-Miu! Sela

⁶ Mentee ntu'u, Omiu, oo Ue Ala, Irongeomo pontangaku, Ipowee akumo tia meronga ondae anu doitoakono nee-Miu.

⁷ Tiangiomo tinuwuno mokole, po'ineeomo ka imelai tinuwuno hawe ba opia inule,

⁸ po'ineeomo ka ipo'ia mpiha i aro-Do Ue Ala, pakosiomo pompehohawa ka menteea dumagaio.

⁹ Ka aku menani umunde-undeo nee-Miu ranta nahina tampulaano, umowahio pontangaku oleo me'eu oleo.