Po'unde-unde 57 - Wunta Mempori

Iluluo iwali, sine Dotulungio Ue Ala

¹ Tiano petewawado anu mpenani. Montonda nanino Si Poropu. Mikitami Inso ndi Daudi, tempono ipolai inso ndi Saulu, a laro kunepo.

² Ipehohawa akumo, oo Ue Ala, Ipehohawa akumo, hangano ndi Omiumo kupepekadudui; a laro mpe'egoano pani-Miu aku mepekadudui, hawe ka itelalo ponsolangia atuu.

³ Mebooli aku ndi Ondae Ue Ala, Anu Tedoa Mantande, ndi Ondae Ue Ala anu Ira mombaloakune.

⁴ Ira montena anu montulungi inso i suruga ka kumadudui aku, tumaroio mia anu lumulu aku. Sela Ondae Ue Ala Ira tumenao pompehohawa ka mentee-Do.

⁵ Mepombole aku i tonga-tongado singa lambaha anu inehedo mperangkami ira anano mia, anu ngisino kana kansai ka pana, ka elono kana ponai montaso.

⁶ Po'ineeomo Ipinokomantande wawoio langi, oo Ue Ala! Po'ineeomo maramba-Miu wawoio asa wawontolino!

⁷ Ondae mpota'o buani a luwuno pelempaaku, dompokompetuunduo sumangaku, ondae mpokeke aa i aroku, sine ondaedo ntedonta i larono. Sela

⁸ Aroaku tetinda, oo Ue Ala, aroaku tetinda; aku menani, aku mo'unde-unde.

⁹ Pewangumo, hei sumangaku, pewangumo, hei gambusu ka katapi, aku wanguo towea!

¹⁰ Aku umunde-unde Komiu i olodo tongku, oo Ue, aku menani umunde-unde Komiu i olodo suku tongku;

¹¹ hangano pompehohawa-Miu langkai hawe i langi, ka mentee-Miu hawe a laro nseru.

¹² Po'ineeomo Ipinokomantande wawoio langi, oo Ue Ala! Po'ineeomo maramba-Miu wawoio asa wawontolino!