Po'unde-unde 53 - Wunta Mempori

Mosa'ono ntu'u mia 53:1-7

¹ Tiano petewawado anu mpenani. Montonda nanino Mahalati. Penani pompaguruno i Daudi.

² Mia monge-monge motae i laro aroano, ”Nahina Ue Ala!” Mosa'o ntu'u ka mokoburu molengkudo, nahina anu moweweu moiko.

³ Ondae Ue Ala mensiro inso i suruga a luwuno anano mia, Ira kumitao ba hinao anu molino pinewowolono ka anu umungke Ira Ue Ala.

⁴ Sine mepansia iramo luwu, luwudo mpoweweu iramo anu mosa'o ntu'u; nahina anu moweweu moiko, maupo te'asa mia nahina.

⁵ Nahi dompokoto'orio mbo'uke mia anu mpoweweu mosa'o, anu pingko domengkaano bawaa-Ku? Ondae mpongkaa roti, sine nahi dompebooli ndi Ondae Ue Ala?

⁶ I ra'aimo ondae manasa ta umalu ira doitoa, kahinaano nahina anu mompokotededengke; hangano Ondae Ue Ala merawoakono luwuno wukudo anu mengkaduko; omue komokoko'ii ira, hangano nami Dotarima ira Ue Ala.

⁷ Oo, po'ineeomo ka i'awa inso i Sioni tekaduduiano Isaraeli! Tewala Ondae Ue Ala momuleo teweweudo bawaa-Do, i Yako ta kokora-kora mawongko, Isaraeli ta mo'unde.