Po'unde-unde 42 - Wunta Mempori

Tiano ll: 42–72 Tekewoi ndi Ondae Ue Ala 42:1–43:5

¹ Tiano petewawado anu mpenani. Penani pompaguruno inuleno i Kora.

² Kana rusa anu mongkekewoi korono anu me'uwoi, kanatuumo sumangaku kumekewoi Komiu, oo Ue Ala.

³ Sumangaku mokorangaako Omiu Ue Ala, Omiu Ue Ala anu tuwu. Te'ipiake moiko ku'aiwa kumitao rupa-Miu Ue Ala?

⁴ Uwoi mataku gagi kaangaku meene ka wongi, hangano i larono asa oleo mia mpotae ndi ongkue, ”Isua Ira Ue Alamu?”

⁵ Ndiomo anu aku mewowoloo, kontongaano sumangaku tedoa mompemasusa; kana'umpe kupelempa a laro baresino hadio mia, wawa ira a raha-Do Ue Ala saru suara mengkokora-kora mawongko ka penani po'unde-unde, a laro maroado mia anu mpoweweu porame-ramea.

⁶ Tembio ka upompemapari, hei sumangaku, ka salalaro a laro ngkoroiku? Pomperorohimo ndi Ondae Ue Ala! Hangano aku umunde-unde Ira mbo'u, anu tumulungi aku ka Ue Alaku!

⁷ Sumangaku mompemapari a laro ngkoroiku, onaemo pu'uno, kurambe Komiu inso i wita Koro Yarade ka mentorukuno Heremoni, inso a ntorukuno Misari.

⁸ Luwuno wingke pada mpepobo-poboli a laro u'uruno uwoi mento-Miu; luwuno mowo langkai ka bomba-Miu mpekalu-kalulu umalu aku.

⁹ Ondae i Ue parentao pompehohawa-Do tempono meene, ka tempono wongi ongkue menaniako penani, aasa pekakai ndi Ondae Ue Ala tuwuaku.

¹⁰ Mepau aku ndi Ondae Ue Ala, torukuno watuku, ”Tembio ka Ikolupe aku? Tembio asalakono ka kutuwu mompemasusa i totono pabawano iwali?”

¹¹ Kana petobono matea a laro wukuku iwaliku tumata aku, saru mpotae ndi ongkue i larono asa oleo, ”I sua Ira Ue Alamu?”

¹² Tembio ka upompemapari, hei sumangaku, ka tembio ka udanggara a laro ngkoroiku? Pomperorohimo ndi Ondae Ue Ala! Hangano aku umunde-unde Ira mbo'u, anu tumulungi aku ka Ue Alaku!