Po'unde-unde 36 - Wunta Mempori

Mosa'ono gauno mia tehala ka pompehohawa-Do Ue Ala anu nahi bali 36:1-13

¹ Tiano petewawa anu mpenani. Inso a ntetenaa-Do i Ue, inso ndi Daudi.

² Hala mepau i laro aroano mia mosa'o gauno; doitoa ndi Ondae Ue Ala nahina a mia atuu,

³ hangano onae umunde-undeo koroino, ranta nahi haweo wineweuno mosa'o ka mo'o'alia.

⁴ Pau inso a ngangano butu mosa'oa ka pompopo'oo, nahi pelelu mbo'u pande mosongka ka moweweu moiko.

⁵ Mosa'oa isongkao a mpoturiano, onae montonda sala anu nahi moiko; hapa anu mosa'o itarimao.

⁶ Oo Ue, pompehohawa-Miu i langi, pokongkomi-Miu hawe a nseru.

⁷ Moleo-Miu kana luwuno torukuno-Do Ue Ala anu ondau, songka-Miu kana luwuno tahi malua anu mongkokongiri. Mia ka pinotuwu ikadudui ira, oo Ue.

⁸ Tedoa masuli olino pompehohawa-Miu, oo Ue Ala! Luwuno anano mia mpepekadudui a laro pe'egoano pani-Miu.

⁹ Dompokomowohiakono taba koroido a raha-Miu; Omiu moweeako ira mpo'inu inso a ngkorono sanaa-Miu.

¹⁰ Hangano ndi Omiu hinao pu'uno tuwua, a laro mewine-Miu omami mpokita mewine.

¹¹ Ipotilaloakonomo pompehohawa-Miu anu nahi bali a mia anu tumo'ori Komiu, ka moleo-Miu a mia anu bobotoli aroano!

¹² Po'ineeomo ka si domelandaakune karudo mia mpompelangka-langkai, ka kaeno mia mosa'o gauno sumaari aku.

¹³ Kanandiomo mia anu mpoweweu mosa'oa ira ntedonta; pinobangku ka nahi pokompewangu mbo'u.