Po'unde-unde 125 - Wunta Mempori

Rodo a pongkadudui-Do i Ue 125:1-5

¹ Penani mekoho. Mia anu mompe'ala-ala ndi Ondae i Ue onaemo kana Torukuno Sioni: nahi telelu ka nahi bali ranta nahina tampulaano.

² Yerusale ilimbuo luwuno torukuno; kanatuumo Dolimbu ira i Ue bawaa-Do, mompu'u kanandio-andio hawe nahina tampulaano.

³ Oo, tuko pabawano mia mosa'o gauno nahi ta mo'ia mpiha a wawo wita anu tiniaako undi a mia mentee, ka si weroo mia mentee kaeno moweweu mosa'o.

⁴ Ipoweweumo moiko, oo Ue, a mia moiko ka a mia anu moleo aroano;

⁵ sine mia anu pansia a nsala anu melengku-lengkuako, po'ineeomo Dosaari ira i Ue meronga luwuno mia anu mpoweweu mosa'o. Rodoa a nto Isaraeli!